എംസി റോഡില്‍ മോട്ടോര്‍ ബൈക്കുകാര്‍ സ്ഥിരം ശല്യം. ആളുകളുടെ സൈര്യ ജീവിതത്തിന് ഇവര്‍ വിഘാതം സൃഷ്ടിക്കുന്നു. ആധുനിക സൗകര്യമുള്ള ബൈക്കുകാര്‍ സ്റ്റണ്ടിംഗിനും റേസിങ്ങിനും ഈ റോഡാണ് തിരഞ്ഞെടുക്കുന്നത്. എസ് വളവുകളില്‍ ഇവര്‍ മത്സരിച്ചാണ് ഓവര്‍ടേക്കിംഗ് നടത്താറ്. ഇന്നലെ നടന്ന അപകടവും റേസിംഗിന് ഇടെയായിരുന്നു. അപകടം ഉണ്ടായതോടെ കൂട്ടുബൈക്ക് നിര്‍ത്താതെ പോകുകയായിരുന്നു. ഡ്രൈവറും കണ്ടക്ടറും തക്കസമയത്ത് ഇടപെട്ടില്ലായിരുന്നെങ്കില്‍ അപകടം വന്‍ ദുരന്തമായേനെ. ബൈക്ക് ബസിനടിയിലേക്കു പാഞ്ഞുകയറുകയും പുക ഉയരുകയും ചെയ്തതോടെ ബസ് ഡ്രൈവറും കണ്ടക്ടറും ചേര്‍ന്നു യാത്രക്കാരെ ഉടന്‍ പുറത്തിറക്കി. എല്ലാവരും ബസില്‍ നിന്ന് അകലേക്ക് ഓടിമാറിയതിനു തൊട്ടുപിന്നാലെയായിരുന്നു പൊട്ടിത്തെറിയും തീപിടിത്തവും.
ബസിനടിയിലേക്കു തെറിച്ചുവീണ അനൂപിനെ നാട്ടുകാര്‍ പുറത്തെടുത്ത് ആദ്യം മൂവാറ്റുപുഴയിലെ ആശുപത്രിയിലും പിന്നീടു കോട്ടയം മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു. തലയിലുള്‍പ്പെടെ ഗുരുതരമായി പരുക്കേറ്റിരുന്നു. മൂന്നു ബൈക്കുകള്‍ ഓരോന്നായി മുന്നിലുണ്ടായിരുന്ന കാറിനെ മറികടക്കുന്നതിനിടെയാണ് അപകടം. ബസ് ബൈക്കുമായി 50 മീറ്ററോളം റോഡിലൂടെ ഉരഞ്ഞുനീങ്ങി.
അപകടത്തില്‍ ബൈക്ക് യാത്രികനായ അനൂപ് (17) മരിച്ചു.കൊട്ടാരക്കര നെല്ലിക്കുന്നം പറങ്കിമാംവിള പുത്തന്‍പുരവീട്ടില്‍ അലക്‌സാണ്ടറുടെ മകനാണ് അനൂപ്. തൃശൂരില്‍ നിന്ന് കോട്ടയത്തേക്ക് പോവുകയായിരുന്ന കെഎസ്ആര്‍ടിസി സൂപ്പര്‍ഫാസ്റ്റ് ബസാണ് അപകടത്തില്‍പ്പെട്ടത്.മൂവാറ്റുപുഴ ഭാഗത്തേക്കു പോകുകയായിരുന്നു ബൈക്ക്. ചൊവ്വാഴ്ച വൈകീട്ട് നാല് മണിയോടെയായിരുന്നു സംഭവം. അമിതവേഗത്തില്‍ വന്ന രണ്ട് ബൈക്കുകളിലൊന്ന് ബസിനടിയിലേക്ക് ഇടിച്ച് കയറുകയായിരുന്നുവെന്നാണ് ദൃക്‌സാക്ഷികള്‍ പറഞ്ഞത്.
ബസിനടിയില്‍പ്പെട്ട അനൂപിന് തലയിലുള്‍പ്പെടെ ഗുരുതരമായി പരിക്കേറ്റിരുന്നു. അനൂപിനെ ബസിനടിയില്‍ നിന്നും പുറത്തെടുത്ത് നാട്ടുകാര്‍ മൂവാറ്റുപുഴയിലെ ആശുപത്രിയില്‍ പ്രവേശിപ്പിച്ചിരുന്നു. ഇവിടെ നിന്ന് പിന്നീട് കോട്ടയം മെഡിക്കല്‍ കോളേജിലേക്കും മാറ്റി. എന്നാല്‍ ജീവന്‍ രക്ഷിക്കാനായില്ല. മൂവാറ്റുപുഴ, കൂത്താട്ടുകുളം എന്നിവിടങ്ങളില്‍ നിന്നുള്ള നാലു ഫയര്‍ യൂണിറ്റുകള്‍ ഒരു മണിക്കൂറോളം പ്രയത്‌നിച്ചാണു തീ അണച്ചത്. എംസി റോഡില്‍ കിലോമീറ്ററുകളോളം നീളുന്ന ഗതാഗത സ്തംഭനവുമുണ്ടായി. ഗതാഗതക്കുരുക്ക് രാത്രി വൈകിയും തുടര്‍ന്നു.