രണ്ടു ദിവസം മുമ്പ് മരണം നടന്ന വീട് ജപ്തിചെയ്യാന് അധികൃതര് എത്തി, ആത്മഹത്യാ ഭീഷണി മുഴക്കിയ ഗൃഹനാഥന്, വീട്ടിലെ മരണാനന്തരച്ചടങ്ങ് കഴിയുന്നതുവരെ ജപ്തി മാറ്റിവയ്ക്കാമെന്ന് ഉറപ്പ് നല്കി
ഇലകമണ് മൃഗാശുപത്രിക്കു സമീപം ആരോമല് നിവാസില് മധുസൂദനന്റെ അമ്മ രണ്ടുദിവസം മുന്പ് മരണപ്പെട്ടിരുന്നു. തിങ്കളാഴ്ച ഉച്ചയ്ക്ക് വീടും പുരയിടവും ജപ്തിചെയ്യാനുള്ള കോടതി ഉത്തരവുമായി ബാങ്ക് ഓഫ് ബറോഡയുടെ ഉദ്യോഗസ്ഥരും കോടതി നിയോഗിച്ച കമ്മിഷനും പോലീസും സ്ഥലത്തെത്തി. ഉച്ചയ്ക്ക് മൂന്നോടെയായിരുന്നു സംഭവം.
മരണവീട്ടില് ജപ്തിക്കെത്തിയതറിഞ്ഞ് നാട്ടുകാരും സ്ഥലത്തെത്തി. അതിനിടെ മധുസൂദനന് വീടിന്റെ മട്ടുപ്പാവില് കയറി ശരീരത്ത് മണ്ണെണ്ണയൊഴിച്ച് ആത്മഹത്യാ ഭീഷണി മുഴക്കി. ജപ്തിക്കെത്തിയവര് അനുനയിപ്പിച്ചെങ്കിലും ഒരു കൈയില് ലൈറ്ററുമായി അദ്ദേഹം ഭീഷണിയില് ഉറച്ചുനിന്നു. വിവരമറിഞ്ഞ് അഗ്നിരക്ഷാസേന സ്ഥലത്തെത്തി. അവരും അനുനയിപ്പിക്കാന് ശ്രമിച്ചെങ്കിലും ഫലമുണ്ടായില്ല.
തുടര്ന്ന് അഗ്നിരക്ഷാസേനാംഗങ്ങള് വീടിന് മുകളിലെത്തി ഉടമയോട് അനുനയ സംഭാഷണം നടത്തി. ഇതിനിടെ ബലം പ്രയോഗിച്ച് ലൈറ്റര് പിടിച്ചെടുക്കുകയായിരുന്നു. പിന്നീട് ഇയാളെ താഴെയെത്തിച്ചു. വീട്ടിലെ മരണാനന്തരച്ചടങ്ങ് കഴിയുന്നതുവരെ സാവകാശം നല്കാന് ബാങ്കും അഡ്വക്കേറ്റ് കമ്മിഷനും ഉടമസ്ഥനും തമ്മില് ധാരണയായി. ഇതോടെ ജപ്തിനടപ്പാക്കാനെത്തിയവര് മടങ്ങി.
വര്ക്കല അഗ്നിരക്ഷാനിലയം അസി.സ്റ്റേഷന് ഓഫീസര് നസീറിന്റെ നേതൃത്വത്തില് ലീഡിങ് ഫയര്മാന്മാരായ വിനോദ്കുമാര്, സജിത്ത്ലാല്, ഫയര്മാന്മാരായ ബാബു, മുകേഷ്, അരുണ്, ഷിബിന് ഗിരീഷ്, ഷമ്മി, ഷാലു എന്നിവരുടെ നേതൃത്വത്തിലാണ് രക്ഷാപ്രവര്ത്തനം നടത്തിയത്.
https://www.facebook.com/Malayalivartha
