കന്യാസ്ത്രീയെ ബലാത്സംഗം ചെയ്ത കേസില്‍ അറസ്റ്റിലായ ബിഷപ്പ് ഫ്രാങ്കോ മുളയ്ക്കലിന് ലൈംഗിക ശേഷിയുണ്ടെന്ന് പരിശോധനാഫലം. കോട്ടയം മെഡിക്കല്‍ കോളജ് ആശുപത്രിയില്‍ നടത്തിയ പരിശോധനയുടെ പ്രാഥമിക റിപ്പോര്‍ട്ടിലാണ് ലൈംഗികശേഷി പോസിറ്റിവാണെന്ന് വ്യക്തമായത്. റിപ്പോര്‍ട്ട് അന്വേഷണ സംഘത്തിന് കൈമാറി. കന്യാസ്ത്രീയെ ലൈംഗികമായി പീഡിപ്പിച്ച കേസില്‍ ജയിലിലുള്ള ബിഷപ്പിനെതിരെ ഇത് നിര്‍ണായക തെളിവാകുമെന്ന് അന്വേഷണ സംഘം സൂചന നല്‍കി. ഒപ്പം ഡി.എന്‍.എ ടെസ്റ്റും നടത്തിയിരുന്നു. മെഡിക്കല്‍ കോളജ് ഫോറന്‍സിക് വിഭാഗത്തിലെ ഡോ. ജയിംസ് കുട്ടിയാണ് പ്രാഥമിക റിപ്പോര്‍ട്ട് കൈമാറിയത്.

അതേസമയം, അന്വേഷണം അട്ടിമറിക്കാനും ബിഷപ്പിനെ സഹായിക്കാനുമായി ഇരയായ കന്യാസ്ത്രീയുടെ ചിത്രം പ്രചരിപ്പിച്ച കേസില്‍ മിഷനറീസ് ഓഫ് ജീസസ് പി.ആര്‍.ഒ സിസ്റ്റര്‍ അമലക്ക് കുറവിലങ്ങാട് പൊലീസ് നോട്ടീസ് അയച്ചു. ഒരാഴ്ചക്കകം ഹാജരാകാനാണ് നോട്ടീസ്. ബിഷപ്പിനെ ന്യായീകരിച്ച് മിഷനറീസ് ഓഫ് ജീസസ് ഇറക്കിയ വാര്‍ത്തക്കുറിപ്പിലാണ് ഇരയുടെ ചിത്രം നല്‍കിയത്.

ബിഷപ് അറസ്റ്റിലായതോടെ ജലന്ധര്‍ രൂപതയിലെ കൂടുതല്‍ വൈദികരും കന്യാസ്ത്രീകളും തിരുവസ്ത്രം ഉപേക്ഷിച്ചവരും മൊഴി നല്‍കുമെന്ന പ്രതീക്ഷയിലാണ് അന്വേഷണസംഘം. ബിഷപ്പിനെ ജലന്ധറിലേക്ക് കൊണ്ടുപോകാനുള്ള സാധ്യത പരിശോധിക്കുന്നുണ്ട്. പൊലീസ് അവിടെയെത്തിയാല്‍ മൊഴിനല്‍കാന്‍ തയാറാണെന്ന് പലരും അറിയിച്ചിട്ടുണ്ട്. ആദ്യ അന്വേഷണത്തില്‍ പലരും പൊലീസുമായി സഹകരിച്ചിരുന്നു. അതിനാല്‍ ജലന്ധറില്‍ പോയി മൊഴിയെടുക്കാനാണ് തീരുമാനം. ബിഷപ്പിന്റെ പലമൊഴികളും പൊലീസ് പൂര്‍ണവിശ്വാസത്തിലെടുത്തിട്ടില്ല. കന്യാസ്ത്രീ നല്‍കിയ പരാതിയില്‍ സഭ നടപടിയെടുത്തിരുന്നുവെന്ന മൊഴി പരിശോധിക്കും. കന്യാസ്ത്രീകളെ സ്വാധീനിക്കാന്‍ ശ്രമിച്ച കേസില്‍ ഫാ. ജയിംസ് ഏര്‍ത്തയിലിനെ വിളിച്ചുവരുത്താനും അന്വേഷണ സംഘം തീരുമാനിച്ചു.