ഫ്രാങ്കോയ്ക്ക് ഇന്ന് നിര്ണായകം... കന്യാസ്ത്രീക്കെതിരെ നടപടിയെടുത്തതിന്റെ വൈരാഗ്യമാണ് കേസ് നല്കാൻ കാരണമെന്ന് ഫ്രാങ്കോ... ജാമ്യം നൽകിയാൽ കേസിൽ നിന്നും രക്ഷപ്പെടുമെന്ന് പോലീസ്; ബലാത്സംഗക്കേസില് അറസ്റ്റിലായ ബിഷപ്പ് ഫ്രാങ്കോ മുളയ്ക്കലിന്റെ ജാമ്യാപേക്ഷ ഹൈക്കോടതി ഇന്ന് പരിഗണിക്കും
ഫ്രാങ്കോയ്ക്ക് ഇന്ന് നിര്ണായകം. കന്യാസ്ത്രീക്കെതിരെ വിവിധ കോണുകളില് നിന്നും ഉയര്ന്ന പരാതിയില് നടപടിയെടുത്തതിന്റെ വൈരാഗ്യമാണ് തനിക്കെതിരെ കേസ് നല്കാനുള്ള കാരണം എന്ന് ബിഷപ്പ് ഹര്ജിയില് ഉന്നയിക്കുന്നു. ബലാത്സംഗക്കേസില് അറസ്റ്റിലായ ബിഷപ്പ് ഫ്രാങ്കോ മുളയ്ക്കലിന്റെ ജാമ്യാപേക്ഷ ഹൈക്കോടതി ഇന്ന് പരിഗണിക്കും. പാല മജിസ്ട്രേറ്റ് കോടതി ബിഷപ്പിന്റെ ജാമ്യാപേക്ഷ തള്ളിയതിനെ തുടര്ന്ന് പാല സബ് ജയിലിലാണ് ബിഷപ്പ് ഫ്രാങ്കോ മുളയ്ക്കല് ഇപ്പോള്. ഒക്ടോബര് ആറുവരെയാണ് ബിഷപ്പിനെ പാല കോടതി റിമാന്ഡ് ചെയ്തത്.
മുന്കൂര് ജാമ്യാപേക്ഷ ഹൈക്കോടതിയില് പരിഗണനയിലിരിക്കെ, അറസ്റ്റ് ചെയ്തത് നിയമലംഘനമാണെന്നാണ് ബിഷപ്പിന്റെ വാദം. ഇക്കാര്യത്തില് സര്ക്കാര് ഇന്ന് കോടതിയില് നിലപാട് അറിയിക്കും. കസ്റ്റഡിയില് ഇരിക്കെ തന്റെ വസ്ത്രങ്ങള് അടക്കം നിര്ബന്ധപൂര്വം വാങ്ങിയ പൊലീസ്, കേസില് കള്ളതെളിവുകള് ഉണ്ടാക്കാന് ശ്രമിക്കുകയാണെന്നും ബിഷപ്പ് ഫ്രാങ്കോ മുളയ്ക്കല് ആരോപിക്കുന്നു. വസ്തുത അറിയാത്ത ചില ആളുകളുടെ താല്പ്പര്യത്തിന് വേണ്ടിയാണ് അറസ്റ്റ് ചെയ്തതെന്നും ബിഷപ്പ് ജാമ്യ ഹര്ജിയില് വാദിക്കുന്നു.
അതേസമയം പൊലീസ് ജാമ്യാപേക്ഷയെ എതിര്ത്തേക്കും. ബിഷപ്പിന് ജാമ്യം നല്കുന്നത് കേസിലെ സ്വാധീനിക്കുന്നതിന് ഇടയാക്കുമെന്ന് പൊലീസ് അറിയിക്കും. ചോദ്യം ചെയ്യലിനോട് സഹകരിക്കാത്ത സാഹചര്യത്തില് ബിഷപ്പിനെ നുണ പരിശോധനയ്ക്ക് വിധേയനാക്കേണ്ടതുണ്ടെന്നും പൊലീസ് അറിയിക്കും.
ബിഷപ്പിന് ലൈംഗികശേഷിയില് പ്രശ്നങ്ങളില്ലെന്ന് പരിശോധനയില് വ്യക്തമായിരുന്നു. തിങ്കളാഴ്ച ബിഷപ്പിന്റെ ജാമ്യഹര്ജി പരിഗണിച്ച ഹൈക്കോടതി, പൊലീസിന്റെ നിലപാട് അറിയാനായി ഹര്ജി വ്യാഴാഴ്ചയിലേക്ക് മാറ്റുകയായിരുന്നു.
https://www.facebook.com/Malayalivartha
