കാറപകടത്തിൽ ഗുരുതരമായി പരിക്കേറ്റ് അടിയന്തിര ശസ്ത്രക്രിയയ്ക്ക് വിധേയനായ വയലിനിസ്റ്റും സംഗീത സംവിധായകനുമായ ബാലഭാസ്‌കറിന്റെയും ഭാര്യയുടെയും ആരോഗ്യ നിലയില്‍ നേരിയ പുരോഗതി. ബാലഭാസ്‌കര്‍ ചെറുതായി കണ്ണു തുറന്നുവെന്നും, എന്നാൽ ഇപ്പോൾ അബോധാവസ്ഥയിൽ വീണ്ടും തുടരുകയാണ്.

ലക്ഷ്മിയുടെ കണ്ണില്‍ നിന്നും കണ്ണുനീര്‍ വന്നുവെന്നും ആശുപത്രിയില്‍ നിന്നുള്ള അടുത്ത വൃത്തങ്ങള്‍ അറിയിച്ചിരുന്നു. ശരീരം മരുന്നുകളോട് പ്രതികരിക്കുന്നുണ്ടെന്നാണ് ഡോക്ടര്‍മാര്‍ നല്‍കിയ ശുഭവാര്‍ത്ത. അതേസമയം, രക്തസമ്മര്‍ദ്ദവുമായി ബന്ധപ്പെട്ട പ്രശ്‌നം ബാലാഭാസ്‌ക്കറിന്റെ ചികിത്സയെ ചെറിയ രീതിയില്‍ ബാധിക്കുന്നുണ്ടെന്നും ഡോക്ടര്‍മാര്‍ വ്യക്തമാക്കി.

കഴിഞ്ഞ ദിവസമാണ് ബാലാഭാസ്‌ക്കറും കുടുംബവും സഞ്ചരിച്ചിരുന്ന കാര്‍ മരത്തിലിടിച്ച് അപകടമുണ്ടായത്. അപകടത്തില്‍ ഇവരുടെ രണ്ട് വയസുകാരി മകള്‍ തേജസ്വിനി മരിച്ചിരുന്നു. നട്ടെല്ലിന് ഗുരുതര പരിക്കേറ്റ ബാലാഭാസ്‌ക്കറിനെ ശസ്ത്രക്രിയയ്ക്ക് വിധേയനാക്കിയിരുന്നു.

ചികിത്സയില്‍ കഴിയുന്ന ലക്ഷ്മിക്ക് ഇടയ്ക്ക് ബോധം വന്നപ്പോള്‍ മകളെ അന്വേഷിച്ചിരുന്നതായി അടുത്ത വൃത്തങ്ങള്‍ പറഞ്ഞു. തേജസ്വിനിയുടെ മൃതദേഹം പോസ്റ്റമോര്‍ട്ടത്തിന് ശേഷം എംബാം ചെയ്ത് സൂക്ഷിച്ചിരിക്കുകയാണ്. അച്ഛനെയും അമ്മയെയും കാണിച്ച ശേഷം മൃതദേഹം സംസ്‌കരിക്കാനാണ് ബന്ധുക്കളുടെ തീരുമാനം.