ശബരിമലയിലെ സ്ത്രീ പ്രവേശന നിയന്ത്രണം റദ്ദാക്കിയ സുപ്രീംകോടതി വിധിയെ വെല്ലുവിളിച്ച് തന്ത്രി കുടുംബാംഗമായ രാഹുല്‍ ഈശ്വര്‍ രംഗത്തെത്തി. വിധി ദൂരവ്യാപകമായ പ്രത്യാഘാതങ്ങളുണ്ടാക്കുമെന്നും കലാപത്തിലേക്ക് നയിക്കുമെന്നും ദേശീയമാധ്യമങ്ങളോട് രാഹുല്‍ ഈശ്വര്‍ പ്രതികരിച്ചു. ഭക്തര്‍ പ്രതിഷേധവുമായി റോഡിലിറങ്ങിയാല്‍ ാേദിക്കാന്‍ വരരുത്. അയ്യപ്പന്‍ നൈഷ്ഠിക ബ്രഹ്മചാരിയായതിനാലാണ് വിധിയെ എതിര്‍ക്കുന്നതെന്നും രാഹുല്‍ ഈശ്വര്‍ പറയുന്നു. മലകയറാന്‍ യുവതികള്‍ എത്തുമ്പോള്‍ മറ്റ് ഭക്തര്‍ തടഞ്ഞാല്‍ അത് അവരുടെ വികാരമായി കോടതി കാണണമെന്നും പ്രതികരിച്ചു.

കോടതിയില്‍ നിന്ന് നീതി ലഭിച്ചില്ലെന്നും ഏകപക്ഷീയമായ വിധിയാണെന്നും ഇത് ആയിരക്കണക്കിന് ഭക്തരില്‍ നിരാശയുണ്ടാക്കിയെന്നും രാഹുല്‍ പറയുന്നു. അതിനാല്‍ വിധിക്കെതിരെ അടുത്ത ആഴ്ച റിവ്യൂ പെറ്റീഷന്‍ നല്‍കും. പാരമ്പര്യമായ ആചാരങ്ങളെ നിയന്ത്രിക്കരുത്. കാലങ്ങളായി ശീലിച്ച് പോകുന്ന ദൈവീകമായ പ്രക്രീയയാണ്. ഇതിനെ ഭരണഘടനയുമായി ബന്ധപ്പെടുത്തുന്നത് ശരിയല്ല. ആചാരങ്ങളുടെ ഭാഗമായി യുക്തിരഹിതമായ പല കാര്യങ്ങളും നടപ്പാക്കേണ്ടിവരുമെന്ന് ജസ്റ്റിസ് ഇന്ദു മല്‍ഹോത്ര പറഞ്ഞത് ശ്രദ്ധേയമാണെന്നും രാഹുല്‍ പറയുന്നു.

ചീഫ് ജസ്റ്റിസ് ദീപക് മിശ്ര വിരമിക്കുന്നതിന് ഏതാനും ദിവസം മുമ്പാണ് ഈ സുപ്രധാനമായ വിധി പറഞ്ഞത്. അതിനാല്‍ പുതിയ ചീഫ് ജസ്റ്റിസിനെ സമീപിക്കുമെന്നാണ് രാഹുല്‍ ഈശ്വര്‍ പറയുന്നത്. മുസ്്‌ലിം വിശ്വാസപ്രകാരം മസ്ജിദ് അഭിഭാജ്യമല്ലെന്ന 1994ലെ സുപ്രീംകോടതി വിധി പുനപരിശോധിക്കാന്‍ ഏഴംഗ ഭരണഘടനാ ബെഞ്ചിന് വിടണമെന്ന ആവശ്യം കഴിഞ്ഞ ദിവസം സുപ്രീംകോടതി അംഗീകരിച്ചില്ല. അതിനാല്‍ ശബരിമലകേസിലും വിശാലബെഞ്ചിന് വിടാനുള്ള സാധ്യത കുറവാണ്.

അടുത്ത ചീഫ് ജസ്റ്റിസ് രഞ്ജന്‍ ഗോഗോയി ആണ്. ഇന്ത്യയിലിന്നുള്ള പ്രഗല്‍ഭനായ ന്യായാധിപരില്‍ ഒരാളാണ് അദ്ദേഹം. അതിനാല്‍ സുപ്രധാനമായ ഈ വിധി പുന:പരിശോധിക്കാന്‍ അദ്ദേഹം തയ്യാറാകുമെന്ന് കരുതുന്നില്ല. മാത്രമല്ല ഇപ്പോഴത്തെ ചീഫ് ജസ്റ്റിസ് ദീപക് മിശ്ര കോടതിയില്‍ കേസുകള്‍ കൈമാറുന്നതിലും മറ്റും കാണിക്കുന്ന വിവേചനത്തിനെതിരെ വാര്‍ത്താസമ്മേളനം നടത്തിയ ജസ്റ്റിസുമാരില്‍ ഒരാളായിരുന്നു രഞ്ജന്‍ ഗോഗോയി.