ശബരിമലയില്‍ സ്ത്രീകള്‍ക്ക് ഏര്‍പ്പെടുത്തിയിരുന്ന നിയന്ത്രണം സുപ്രീംകോടതി റദ്ദാക്കിയതിനൊപ്പം മറ്റൊരു സുപ്രധാനകാര്യം കൂടിയാണ് കേരളത്തില്‍ സംഭവിച്ചിരിക്കുന്നത്. ആര്‍ത്തവകാലത്ത് സ്ത്രീകള്‍ക്ക് ക്ഷേത്രങ്ങളില്‍ പ്രവേശിക്കാം എന്ന അനുവാദം കൂടി കോടതി നല്‍കിയിരിക്കുന്നു. 1965ലെ കേരള ഹിന്ദുആരാധനാലയ പ്രവേശനാധികാര ചട്ടത്തിലെ മൂന്ന് (ബി) വകുപ്പു പ്രകാരം ആര്‍ത്തവകാലത്ത് സ്ത്രീകള്‍ക്കു നിരോധനമേര്‍പ്പെടുത്തിയത്. വെള്ളിയാഴ്ചത്തെ കോടതി വിധിയോട് കൂട് അത് റദ്ദായി. മൗലികാവകാശങ്ങള്‍ ഹനിക്കുന്നതാണെങ്കില്‍ വ്യക്തിനിയമങ്ങളും മാറ്റിയെഴുതണമെന്നാണ് ജസ്റ്റിസ് ഡി.വൈ ചന്ദ്രചൂഡ് വിധിയില്‍ നിര്‍ദ്ദേശിക്കുന്നത്.

ഹിന്ദുമതത്തിന്റെ ഭാഗമാണ് ശബരിമല ക്ഷേത്രം. അല്ലാതെ മറ്റ് സവിശേഷതകള്‍ ശബരിമലയ്ക്കില്ലെന്നും കോടതി വ്യക്തമാക്കി. പത്തിനും അന്‍പതിനും ഇടയില്‍ പ്രായമുള്ള സ്ത്രീകള്‍ ശബരിമലയില്‍ പ്രവേശിക്കുന്നതിന് വിലക്കുന്നതിനൊപ്പം ആര്‍ത്തവകാലത്ത് അമ്പലങ്ങളില്‍ പോകുന്നതും വിലക്കുന്നതാണ് കേരള ഹിന്ദു ക്ഷേത്ര പ്രവേശന നിയമത്തിലെ മൂന്ന് ബി വകുപ്പ്. അത് റദ്ദാക്കിയതോടെ വിധിയുടെ ചരിത്രപരമായ പ്രാധാന്യം വര്‍ദ്ധിക്കുകയാണ്. 

സ്ത്രീകള്‍ക്ക് വിലക്കുള്ള മറ്റ് ആരാധനാലയങ്ങള്‍ക്ക് ഈ വിധി ബാധകമല്ലെന്നാണ് അറിയുന്നത്. സമാന സ്വഭാവമുള്ള ഹര്‍ജികള്‍ കോടതികളിലെത്തിയാല്‍ ഈ വിധി ആധാരമാകും. അത് പോലെ നിയമത്തിന് മേലെയാണ് മതാചാരങ്ങളുടെ ഭാഗമായുള്ള വ്യക്തിനിയമങ്ങള്‍ എന്നുള്ള പരമ്പരാഗത രീതിയും പൊളിച്ചെഴുതുകയാണ്. കാരണം മൗലികഅവകാശങ്ങളുടെ ലംഘനമാണെങ്കില്‍ മതാചാരത്തിന്റെ ഭാഗമായുള്ള ആചാരങ്ങള്‍ റദ്ദാക്കണമെന്നാണ് ജസ്റ്റിസ് വൈ.വി ചന്ദ്രചൂഡ് വിധിയില്‍ പറയുന്നത്. ഇത് ഏകീകൃത സിവില്‍കോഡിലേക്ക് നയിക്കുമോ എന്ന സംശയവും ബലപ്പെടുത്തുന്നു. ആര്‍ത്തവകാലത്തെ സ്ത്രീ പ്രവേശനം വിലക്കാനാവില്ലെന്ന് മുതിര്‍ന്ന അഭിഭാഷക ഇന്ദിരാ ജെയ്‌സിംഗും വ്യക്തമാക്കി.