അധികാരത്തിലിരുന്നാല്‍ ആനപ്പുറത്താണെന്ന് മന്ത്രിമാര്‍ കരുതരുതെന്ന രൂക്ഷ വിമര്‍ശനവുമായി മന്ത്രി ജി.സുധാകരന്‍. ശബരിമല സന്ദര്‍ശനത്തിനായി എത്തിയ കേന്ദ്രമന്ത്രി പൊന്‍ രാധാകൃഷ്ണനും എസ്.പി യതീഷ് ചന്ദ്രയുമായുണ്ടായ വാക്കുതര്‍ക്കത്തിന്റെ പശ്ചാത്തലത്തിലാണ് മന്ത്രിയുടെ വിമര്‍ശനം.

സംസ്ഥാനത്തെ ക്രമസമാധാനപാലനം സംസ്ഥാന സർക്കാറി​െൻറ ഉത്തരവാദിത്തമാണെന്നും അത‌് ചോദ്യംചെയ്യാൻ ആർക്കും അധികാരമില്ലെന്നും ജി. സുധാകരൻ പറഞ്ഞു. കൽപറ്റയിൽ പൊതുമരാമത്ത‌് വകുപ്പ‌് പ്രവൃത്തികളുടെ അവലോകന യോഗശേഷം മാധ്യമപ്രവർത്തകരോട‌് സംസാരിക്കുകയായിരുന്നു അദ്ദേഹം.

കേന്ദ്രമന്ത്രിമാർ അവരുടെ ഉത്തരവാദിത്തം നിർവഹിച്ചാൽ മതി. സംസ്ഥാന സർക്കാറിന്റെ ക്രമസമാധാനപാലനത്തിൽ ഇടപെടാൻ ഒരു കേന്ദ്രമന്ത്രിക്കും അധികാരമില്ല. സംസ്ഥാനത്തിന്റെ അധികാരപരിധിയിൽ കേന്ദ്രമന്ത്രിമാർ കടന്നുകയറുന്നത് വിലകുറഞ്ഞ പബ്ലിസിറ്റിക്കു​ വേണ്ടിയാണ്. അധികാരത്തിലെത്തിയാൽ ആനപ്പുറത്താണെന്ന തോന്നൽ പാടില്ലെന്നും മന്ത്രി പറഞ്ഞു.

ശബരിമല ദര്‍ശനത്തിനെത്തിയ കേന്ദ്രമന്ത്രി പൊന്‍ രാധാകൃഷ്ണന്‍ കഴിഞ്ഞ ദിവസം സര്‍ക്കാരിനെയും പൊലീസിനെയും വിമര്‍ശിച്ചിരുന്നു. പമ്പയിലേക്ക് സ്വകാര്യവാഹനങ്ങള്‍ കടത്തിവിടണമെനന്ന് പൊന്‍ രാധാകൃഷ്ണന്‍ ആവശ്യപ്പെടുകയുണ്ടായി. എന്നാല്‍ സുരക്ഷ മുന്‍നിര്‍ത്തി സ്വകാര്യ വാഹനങ്ങള്‍ കടത്തി വിടാനാകില്ലെന്ന് എസ് പി യതീഷ് ചന്ദ്ര വ്യക്തമാക്കുകയും ചെയ്തിരുന്നു. എന്നാല്‍ ഉത്തരവാദിത്വം ഏറ്റെടുക്കുമോ എന്ന എസ്പിയുടെ മന്ത്രിയോടുള്ള ചോദ്യത്തിനെതിരെ ബിജെപി രംഗത്തെത്തുകയും ചെയ്തു. കേന്ദ്രമന്ത്രിയെ അപമാനിച്ചുവെന്നായിരുന്നു ആരോപണം.