സര്‍ക്കാരിന് എന്നും കണ്ണില്‍ കരടായ പോലീസ് ഉദ്യോഗസ്ഥനാണ് ജേക്കബ് തോമസ്. ശബരിമലയിലെ നിരോധനാജ്ഞയെ പരിഹസിച്ച് ഡിജിപി ജേക്കബ് തോമസ്. അഞ്ച് പേരുള്ള വീടുകളിലും നിരോധനാജ്ഞ നടപ്പിലാക്കണമെന്നായിരുന്നു ജേക്കബ് തോമസിന്റെ പരിഹാസം. നടപ്പിലാക്കാത്ത ഒരുപാട് കോടതി വിധികള്‍ ഉണ്ടെന്നും താന്‍ വിശ്വാസികള്‍ക്കൊപ്പമാണെന്നും അദ്ദേഹം കൂട്ടിച്ചേര്‍ത്തു.

ഇത്രയും ധൃതി പിടിച്ച് നടപ്പാക്കേണ്ടിയിരുന്നില്ല. ശബരി മലയില്‍ സ്ത്രീകള്‍ക്ക് വിലക്കില്ലെന്നും യുവതികള്‍ക്ക് മാത്രമാണ് വിലക്കുള്ളതെന്നും അദ്ദേഹം പറഞ്ഞു. അവര് തന്നെ സാവകാശമാണ് ചോദിച്ചതെന്നും ജേക്കബ് തോമസ് പറഞ്ഞു. 

അവിശ്വാസികള്‍ എന്നൊരു വിഭാഗം കേരളത്തില്‍ രൂപപ്പെടുന്നു. താന്‍ അവര്‍ക്കൊപ്പമല്ലെന്നും ജേക്കബ് തോമസ് പറഞ്ഞു. യുവതികള്‍ കാത്തിരിക്കണമെന്നും റെഡി ടു വെയ്റ്റ് ക്യാംപയിന്‍ സ്വാഗതം ചെയ്യുന്നുവെന്നും ജേക്കബ് തോമസ് പമ്പയില്‍ പറഞ്ഞു. ശബരിമല ദര്‍ശനം നടത്തിയ ശേഷമായിരുന്നു അദ്ദേഹത്തിന്റെ പ്രതികരണം.

അതേസമയം നിരോധനാജ്ഞ ലംഘിച്ച് സന്നിധാനത്ത് നാമജപം നടത്തിയ 80 സംഘപരിവാര്‍ പ്രവര്‍ത്തകര്‍ അറസ്റ്റിലായി. ഇന്നലെ രാത്രി 11ന് അറസ്റ്റ് ചെയ്ത ഇവരെ പൊലീസ് വലയത്തില്‍ പമ്ബയിലേക്ക് കൊണ്ടുപോയി. രാത്രി പത്തേകാലോടെയാണ് നിയന്ത്രണം ഏര്‍പ്പെടുത്തിയിരുന്ന വാവര്‌നടയ്ക്ക് സമീപം ബാരിക്കേടിനുള്ളില്‍ തള്ളികയറിയും പുറത്ത് നിന്നും നാമജപം നടത്തിയത്.

എസ്.പി മാരായ ശിവവിക്രം, പ്രതീഷ് കുമാര്‍ എന്നിവരുടെ നേതൃത്വത്തില്‍ വന്‍ പൊലീസ് സംഘവും നിലയുറപ്പിച്ചു. ഹരിവരാസനം കേട്ടതോടെ പ്രവര്‍ത്തകര്‍ അത് ഏറ്റുചൊല്ലി. തുടര്‍ന്നായിരുന്നു അറസ്റ്റ്. സന്നിധാനത്തുണ്ടായിരുന്ന ഐ.ജി വിജയ്‌സാഖറെയുടെ നിര്‍ദ്ദേശ പ്രകാരമായിരുന്നു അറസ്റ്റ് ചെയ്തത്. പ്രവര്‍ത്തകര്‍ ശരണഘോഷം മുഴക്കിയാണ് പൊലീസിനൊപ്പം നീങ്ങിയത്. ഇവരെ മണിയാര്‍ ക്യാമ്ബിലേക്ക് കൊണ്ടുപോകാനണ് സാദ്ധ്യത.