കെ. സുരേന്ദ്രന്‍ എന്ന ബിജെപി യുവ നേതാവ് ബിജെപിയുടെ മാത്രം താരമല്ല. യുവാക്കളെയാകെ ആവേശം കൊള്ളിച്ച നേതാവാണ്. ഇടയ്‌ക്കൊക്കെ സുരേന്ദ്രനെ ട്രോളുമെങ്കിലും ഇത്രയും ചങ്കൂറ്റത്തോടെ നിന്ന മറ്റ് യുവ നേതാവില്ല. അത്രയ്ക്കല്ലേ സുരേന്ദ്രന്‍ പോലീസിനോട് കട്ടയ്ക്ക് നിന്നത്. ജയിലിലാകുന്നതിന് തൊട്ട് മുമ്പുള്ള സുരേന്ദ്രന്റെ പ്രകടനം കേരളം ആവേശത്തോടെയാണ് കണ്ടത്. 

വെടി വച്ചോ എന്നാലും മാറില്ല. ഇരുമുടി കെട്ടില്‍ തൊട്ടാലുണ്ടല്ലോ. അപ്പോ നമ്മുക്ക് പോകാമല്ലേ... നിലയ്ക്കലില്‍ ഹീറോയായ സുരേന്ദ്രന്‍ കേരളത്തെ വിറപ്പിക്കുമെന്നാണ് കരുതിയത്. എന്നാല്‍ സുരേന്ദ്രന്‍ പോലീസിനെ മറി കടന്നപ്പോള്‍ ഇതാകും അവസ്ഥയെന്ന് ആരും കരുതിയില്ല. കരുതല്‍ തടങ്കലില്‍ എടുത്ത സുരേന്ദ്രനെതിരെ ഡസണോളം കേസുകള്‍ കുത്തിപ്പൊക്കി. ഇതില്‍ കള്ളക്കേസു പോലുമുണ്ടായിരുന്നു.

വലിയൊരു യുവ നേതാവ് സങ്കടത്തോടെയാണ്. എന്താണ് താന്‍ ചെയ്ത കുറ്റം. കേവലം ജാമ്യം ലഭിച്ച് വരേണ്ട കേസ് ഊരാക്കുടുക്കായിരിക്കുന്നു. അവസാനം സുരേന്ദ്രന്‍ ആവശ്യപ്പെട്ടത് ഭാര്യയേയും മക്കളേയും വിളിക്കാന്‍ കഴിയണം. ശരിക്കും വല്ലാത്തൊരവസ്ഥ. ഇത്രയും വലിയ നേതാവായിട്ടും സുരേന്ദ്രനെ രക്ഷപ്പെടുത്താന്‍ ആരും സഹായിക്കുന്നില്ല. സ്വന്തം പാര്‍ട്ടിക്കാര്‍ പോലും. 

ശബരിമല സന്നിധാനത്ത് സ്ത്രീയെ ആക്രമിച്ച കേസില്‍ ബി.ജെ.പി സംസ്ഥാസുരേന്ദ്രന്റെ ജാമ്യാപേക്ഷ കഴിഞ്ഞ ദിവസവും തള്ളിയിരുന്നു. റാന്നി ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതിയാണ് ജാമ്യാപേക്ഷ തള്ളിയത്.

വധശ്രമത്തോട് അനുബന്ധിച്ചുള്ള ഗൂഢാലോചനയായതിനാല്‍ ജാമ്യം അനുവദിക്കാനാകില്ല എന്ന് കോടതി വ്യക്തമാക്കി. ചിത്തിര ആട്ടവിശേഷത്തിന് സന്നിധാനത്ത് 52 വയസുള്ള സ്ത്രീയെ ഒരു സംഘം ആളുകള്‍ അക്രമിച്ചതിലെ ഗൂഢാലോചനക്കാണ് കെ. സുരേന്ദ്രനെ പ്രതിചേര്‍ത്തിരുന്നത്.

ജാമ്യാപേക്ഷയെ പ്രോസിക്യൂഷന്‍ എതിര്‍ത്തിരുന്നു. ജയില്‍ സൂപ്രണ്ടിന്റെ സാന്നിധ്യത്തില്‍ ഇന്നുതന്നെ പമ്പാ പൊലീസിന് ഒരു മണിക്കൂര്‍ ചോദ്യം ചെയ്യാം. വൈകിട്ട് ഏഴുമണിക്കു മുന്‍പ് ചോദ്യംചെയ്യണം. ജയിലിലെ ടെലിഫോണ്‍ പ്രവര്‍ത്തനക്ഷമമാണെങ്കില്‍ സുരേന്ദ്രനു സൂപ്രണ്ടിന്റെ സാന്നിധ്യത്തില്‍ കുടുംബത്തെ വിളിക്കാമെന്നും കോടതി വ്യക്തമാക്കി. ജയില്‍മാറ്റം സംബന്ധിച്ച് തിങ്കളാഴ്ച തീരുമാനമെടുക്കും.

സുപ്രീംകോടതിവിധി പരസ്യമായി ലംഘിക്കുകയാണ് കെ സുരേന്ദ്രന്‍ ചെയ്തതെന്ന് പ്രോസിക്യൂഷന്‍ കോടതിയില്‍ വാദിച്ചു. സുരേന്ദ്രനെ പങ്കാളിത്തം വ്യക്തമാക്കുന്ന ദൃശ്യങ്ങള്‍ കോടതിയില്‍ ഹാജരാക്കുമെന്നും പ്രോസിക്യൂഷന്‍ വ്യക്തമാക്കി.

കെ സുരേന്ദ്രനെ കുടുക്കുന്നതിനായി സന്നിധാനം കേസില്‍ പതിമൂന്നാം പ്രതിയായി കൂട്ടിച്ചേര്‍ക്കുകയാണ് ഉണ്ടായതെന്ന് പ്രതിഭാഗം വാദിച്ചു. അസ്വാഭാവിക മരണക്കേസ് ഉള്‍പ്പെടെ സുരേന്ദ്രനെതിരെ ചുമത്തിയിട്ടുണ്ടെന്നും പ്രതിഭാഗം പറഞ്ഞു. പ്രതിഭാഗത്തിന്റെ ആവശ്യപ്രകാരം കെ സുരേന്ദ്രന് ജയില്‍ സൂപ്രണ്ടിന്റെ സാന്നിധ്യത്തില്‍ ബന്ധുക്കളെ ഫോണില്‍ വിളിക്കുന്നതിന് കോടതി അനുമതി നല്‍കി.