വിവാദങ്ങള്ക്കിടെ ഗവര്ണര് മല കയറുന്നു... രാഷ്ട്രീയ പാര്ട്ടികള് ചേരിതിരിഞ്ഞ് പോരടിക്കുമ്പോള് ഗവര്ണര് പി. സദാശിവം ഇരുമുടിക്കെട്ട് മുറുക്കി ശബരിമലയിലേക്ക്
യുവതി പ്രവേശനത്തിന്റെ പേരില് മുഖ്യധാര രാഷ്ട്രീയ പാര്ട്ടികള് ചേരിതിരിഞ്ഞ് മത്സരിക്കുമ്പോള് ഗവര്ണര് പി. സദാശിവം ഇരുമുടിക്കെട്ട് മുറുക്കി ശബരിമലേക്ക്. ദേവസ്വംമന്ത്രി കടകംപള്ളി സുരേന്ദ്രന് അനുഗമിക്കും. ഡിസംബറിലാവും ഗവര്ണര് കന്നി അയ്യപ്പനായി മലകയറുന്നത്. ശനിയാഴ്ച തന്നെ കാണാനെത്തിയ കടകംപള്ളി സുരേന്ദ്രനോടാണ് ഗവര്ണര് ആഗ്രഹം അറിയിച്ചത്.
താന് ഡിസംബറില് ശബരിമലക്ക് പോകാന് ആഗ്രഹിക്കുന്നെന്നും കൂടെ വരുമോ എന്നും അദ്ദേഹം ആരാഞ്ഞു. ഒപ്പംവരാമെന്ന് മന്ത്രി മറുപടി നല്കുകയും ചെയ്തു. സന്നിധാനത്ത് പൊലീസ് രാജാണെന്നും ഭക്തര് ഭയന്ന് അവിടേക്ക് പോകുന്നില്ലെന്നും ബി.ജെ.പിയും കോണ്ഗ്രസും ആക്ഷേപിക്കുമ്പോഴാണ് ഗവര്ണറുടെ മലകയറ്റം. ഗവര്ണറുടെ മല കയറ്റം ആര്ക്ക് നേട്ടമെന്ന് കണ്ടറിയാം.
ഗവര്ണര് ശബരിമല സന്ദര്ശിക്കുമെന്ന് അറിയിച്ചതായി ശബരിമല കര്മ സമിതി പ്രവര്ത്തകരും നേരത്തെ അറിയിച്ചിരുന്നു. കേട്ടയം നാട്ടകം ഗസ്റ്റ് ഹൗസിലെത്തിയ ഗവര്ണറുമായി നടത്തിയ കൂടിക്കാഴ്ചയ്ക്കുശേഷം പുറത്തിറങ്ങിയ നിവേദനസംഘമാണു ജസ്റ്റീസ് പി. സദാശിവം ശബരിമല സന്ദര്ശിക്കുന്ന കാര്യം മുമ്പ് അറിയിച്ചത്.
ശബരിമലയിലെ പ്രശ്നങ്ങളും അയ്യപ്പഭക്തര്ക്ക് ശബരിമലയിലുണ്ടാകുന്ന ബുദ്ധിമുട്ടുകളും ഗവര്ണറുടെ ശ്രദ്ധയില്പ്പെടുത്തിയതായും കര്മസമിതി പ്രവര്ത്തകര് പറഞ്ഞു.
https://www.facebook.com/Malayalivartha
