സുപ്രീംകോടതിയില് തെറ്റായ വിവരം പോലും നല്കി ശബരിമല വിഷയം ആളിക്കത്തിച്ച് സംഘര്ഷം നിലനിര്ത്താനുള്ള ഹീനശ്രമമാണ് സംസ്ഥാന സര്ക്കാര് നടത്തുന്നതെന്ന് പ്രതിപക്ഷനേതാവ് രമേശ് ചെന്നിത്തല ആരോപിച്ചു
സുപ്രീംകോടതിയില് തെറ്റായ വിവരം പോലും നല്കി ശബരിമല വിഷയം ആളിക്കത്തിച്ച് സംഘര്ഷം നിലനിര്ത്താനുള്ള ഹീനശ്രമമാണ് സംസ്ഥാന സര്ക്കാര് നടത്തുന്നതെന്ന് പ്രതിപക്ഷനേതാവ് രമേശ് ചെന്നിത്തല ആരോപിച്ചു. യുവതീ പ്രവേശന വിഷയത്തില് സുപ്രീംകോടതിയെ കബളിപ്പിക്കാന് സര്ക്കാര് നടത്തിയ ശ്രമം ലജ്ജാകരമാണ്. അയ്യപ്പഭക്തരുടെ വികാരം വൃണപ്പെടുത്താനാണ് സര്ക്കാര് ആവര്ത്തിച്ചു ശ്രമിക്കുന്നത്. ജനാധിപത്യപരമായി തിരഞ്ഞെടുക്കപ്പെട്ട ഒരു സര്ക്കാരിന് ചേര്ന്ന നടപടിയല്ല ഇതൊന്നും. സുപ്രീംകോടതി വിധിക്ക് ശേഷം 50 വയസിന് താഴെയുള്ള 51 സ്ത്രീകള് ശബരിമലയില് ദര്ശനം നടത്തിയെന്നാണ് സുപ്രീംകോടതിയില് സര്ക്കാര് ലിസ്റ്റ് നല്കിയത്. പക്ഷേ ഈ സ്ത്രീകളെ മാദ്ധ്യമങ്ങള് നേരിട്ട് ബന്ധപ്പെട്ടപ്പോള് അവര്ക്ക് അന്പത് വയസ്സില് കൂടുതല് പ്രായമുണ്ടെന്നാണ് തെളിഞ്ഞത്.
ആ നിലയക്ക് സുപ്രീംകോടതിയില് എന്തിന് തെറ്റായ വിവരം നല്കി എന്നതിന് മുഖ്യമന്ത്രി പിണറായി വിജയന് വിശദീകരണം നല്കണം. സുപ്രീംകോടതിയില് സംസ്ഥാന സര്ക്കാര് ഒരു വിവരം നല്കുമ്പോള് അത് പൂര്ണ്ണമായും സത്യസന്ധമാകേണ്ടതുണ്ട്. തെറ്റായ വിവരം സുപ്രീംകോടതിയ്ക്ക് നല്കുക വഴി അക്ഷന്തവ്യമായ തെറ്റാണ് സംസ്ഥാന സര്ക്കാര് ചെയ്തിരിക്കുന്നത്. ശബരിമല വിഷയത്തില് തുടക്കം മുതലേ കള്ളക്കളിയാണ് സംസ്ഥാന സര്ക്കാര് നടത്തുന്നത്. അതിന്റെ ഏറ്റവും ഒടുവിലത്തെ തെളിവാണ് ഇപ്പോള് സുപ്രീംകോടതിയെ തെറ്റിദ്ധരിപ്പിക്കാനുള്ള ശ്രമം വഴി പുറത്തു വന്നിരിക്കുന്നതെന്നും രമേശ് ചെന്നിത്തല പറഞ്ഞു.
ശബരിമല യുവതീപ്രവേശനത്തില് ഭക്തരുടെ വികാരം മനസിലാക്കാതെ സര്ക്കാര് ഏകപക്ഷീയമായ നിലപാടുകളാണ് തുടക്കം മുതല് സ്വീകരിക്കുന്നതെന്ന് പ്രതിപക്ഷനേതാവ് ആരോപിച്ചിരുന്നു. ബി.ജെ.പിയും സി.പി.എമ്മും യുവതീപ്രവേശനത്തിന്റെ മറവില് അക്രമം നടത്തി സംസ്ഥാനത്തെ സമാധാന അന്തരീക്ഷം തകര്ക്കുകയാണെന്നും അദ്ദേഹം ആരോപിച്ചിരുന്നു. ഇതേ തുടര്ന്ന് വിവേകാനന്ദജയന്തിക്ക് പ്രത്യേക പരിപാടിയും യു.ഡി.എഫ് സംഘടിപ്പിച്ചിരുന്നു. യുവതീപ്രവേശന വിധി വന്നപ്പോള് സ്വാഗതം ചെയ്ത പ്രതിപക്ഷനേതാവ് ഭക്തരുടെ പ്രതിഷേധങ്ങളെ തുടര്ന്ന് നിലപാട് മാറ്റുകയായിരുന്നു.
യുവതീപ്രവേശനം ആചാരലംഘനമാണെന്നും അത് പുനപരിശോധിക്കണമെന്നും ആവശ്യപ്പെട്ട് കോണ്ഗ്രസ് സുപ്രീംകോടതിയില് ഹര്ജി നല്കിയിരിക്കുകയാണ്. ഹര്ജി നല്കിയ ഏക രാഷ്ട്രീയ പാര്ട്ടി കോണ്ഗ്രസാണ്. വിശ്വാസികള്ക്കൊപ്പം അക്രമരഹിത സമരം നടത്തുകയാണ് കോണ്ഗ്രസിന്റെ ലക്ഷ്യമെന്ന് രമേശ് ചെന്നിത്തല തുടക്കത്തിലേ വ്യക്തമാക്കിയിരുന്നു. എന്നാല് വിധി മറികടക്കാന് ഓര്ഡിനന്സ് ഇറക്കണമെന്ന് ആവശ്യപ്പെട്ട് കേന്ദ്രസര്ക്കാരിനെ സമീപിക്കാനുള്ള കെ.പി.സി.സിയുടെ തീരുമാനത്തിനെതിരെ മുന് കോണ്ഗ്രസ് അധ്യക്ഷ സോണിയാഗാന്ധി രംഗത്ത് വന്നു. അതോടെ സംസ്ഥാനനേതൃത്വം പിന്മാറുകയായിരുന്നു. യുവതീപ്രവേശനത്തില് തുടക്കംമുതല് കോടതി വിധിക്കൊപ്പം നിന്ന കോണ്ഗ്രസ് അധ്യക്ഷന്റെ നിലപാടില് അയവ് വരുത്താന് പ്രതിപക്ഷനേതാവിനും സംസ്ഥാനത്തെ കോണ്ഗ്രസ് നേതൃത്വത്തിനും കഴിഞ്ഞു. തീര്ച്ചയായും അത് രാഷ്ട്രീയ വിജയം തന്നെയാണ്.
https://www.facebook.com/Malayalivartha
