ആദ്യ തവണ വീട്ടില്‍ നിന്നും ഇറങ്ങാനായില്ല, രണ്ടാമത്തെ ശ്രമം റെയില്‍വേ സ്‌റ്റേഷനില്‍ അവസാനിച്ചു, മൂന്നാമത് ഇറങ്ങേണ്ടി വന്നത് നീലിമലയില്‍ നിന്നും, ഒടുവില്‍ നിലയ്ക്കലില്‍ നിന്ന് തന്നെ കെട്ട് കെട്ടിച്ചു.

ശബരിമല ദര്‍ശനത്തില്‍ രേഷ്മാ നിശാന്ത് തോറ്റത് നാലാം തവണ. ശബരിമല ദര്‍ശനത്തിനായി രേഷ്മ നിഷാന്തും ഷാനിലയും വീണ്ടും എത്തി. നിലയ്ക്കലില്‍ എത്തിയ ഇരുവരെയും പോലീസ് തടഞ്ഞു. ഇരു യുവതികളെയും കണ്‍ട്രോള്‍ റൂമിലേക്ക് മാറ്റി. ബുധനാഴ്ച ഇവര്‍ മലകയറാന്‍ എത്തിയിരുന്നു. എന്നാല്‍ ഭക്തരുടെ വന്‍ പ്രതിഷേധത്തെ തുടര്‍ന്ന് പോലീസ് ബലം പ്രയോഗിച്ച് തിരികെ ഇറക്കുകയായിരുന്നു.
പിന്നീട് പോലീസ് നിലയ്ക്കലില്‍നിന്ന് എരുമേലിയിലേക്കു മടക്കി അയച്ചു.

ശബരിമല ദര്‍ശനത്തിനു സുരക്ഷ നല്‍കാന്‍ കഴിയില്ലെന്നു പോലീസ് യുവതികളെ അറിയിച്ചു. മല കയറാന്‍ ശ്രമിച്ചാല്‍ വന്‍ പ്രതിഷേധമുണ്ടാകുമെന്നും പോലീസ് മുന്നറിയിപ്പ് നല്‍കി. ഇതിനുശേഷമാണ് തിരിച്ചയയ്ക്കാന്‍ തീരുമാനിച്ചത്. സംഘര്‍ഷാവസ്ഥ കണക്കിലെടുത്ത് സ്ഥലത്ത് കൂടുതല്‍ പോലീസിനെ വിന്യസിച്ചിട്ടുണ്ട്. ബുധനാഴ്ച ദര്‍ശനത്തിനെത്തിയ ഇവരെ പ്രതിഷേധക്കാര്‍ നീലിമലയില്‍ തടഞ്ഞിരുന്നു. വ്രതം എടുത്താണ് ദര്‍ശനത്തിനായി എത്തിയതെന്നും പിന്‍മാറാന്‍ തയാറല്ലെന്നും ഇവര്‍ പോലീസിനെ അറിയിച്ചു. എന്നാല്‍ മുന്നോട്ടു പോകാന്‍ അനുവദിക്കില്ലെന്നു പ്രതിഷേധക്കാര്‍ നിലപാടെടുത്തു. ഇതോടെ പോലീസ് ഇടപെട്ട് ഇവരെ മടക്കി അയയ്ക്കുകയായിരുന്നു. മണ്ഡലകാലത്ത് 41 ദിവസത്തെ വ്രതമെടുത്ത് ശബരിമല കയറുമെന്ന് ഫേസ്ബുക്കില്‍ കുറിച്ച രേഷ്മയ്ക്കുനേരേ ഭീഷണി ഉയര്‍ന്ന സാഹചര്യവുമുണ്ടായി. ഇതേതുടര്‍ന്ന് ജില്ലാ പോലീസ് മേധാവിക്ക് ഇവര്‍ പരാതി നല്‍കുകയും രേഷ്മയുടെ വീട്ടുപരിസരത്ത് പോലീസ് സുരക്ഷ ഏര്‍പ്പെടുത്തുകയും ചെയ്തു. പോലീസ് ഏറെ പണിപ്പെട്ടാണ് ഇവരെ മടക്കി അയച്ചത്.