ആശുപത്രിയില്‍ പ്രവേശിപ്പിക്കുന്ന രോഗികള്‍ക്ക് നല്‍കുന്ന മരുന്നടക്കം സാധനങ്ങള്‍ക്ക് നികുതി ഈടാക്കാനാവില്ലെന്ന് ഹൈക്കോടതി. മരുന്നുകള്‍, ജീവന്‍രക്ഷാ ഉപകരണങ്ങള്‍, ശസ്ത്രക്രിയ സാമഗ്രികള്‍, മറ്റ് സാധനങ്ങള്‍ എന്നിവക്ക് നികുതി ബാധകമല്ലെന്നാണ് ജസ്റ്റിസുമാരായ കെ. വിനോദ് ചന്ദ്രന്‍, എ. മുഹമ്മദ് മുഷ്താഖ്, അശോക് മേനോന്‍ എന്നിവരടങ്ങിയ ഫുള്‍ ബെഞ്ച് ഉത്തരവ്. ഫാര്‍മസിയില്‍നിന്ന് വാങ്ങുന്ന മരുന്നിന്റെ നികുതി വിഷയം പരിഗണിക്കാനായി ഡിവിഷന്‍ ബെഞ്ചിന് മടക്കിയയച്ചു. അവശ്യ മരുന്നുകള്‍ക്കും ജീവന്‍ രക്ഷാ ഉപകരണങ്ങള്‍ക്കും നികുതി ഈടാക്കുന്നതിനെതിരെ നല്‍കിയ ഒരു കൂട്ടം ഹരജികളാണ് കോടതി പരിഗണിച്ചത്.
നേരത്തേ ഡിവിഷന്‍ ബെഞ്ച് പരിഗണിച്ച വിഷയം പിന്നീട് ഫുള്‍ബെഞ്ച് പരിഗണനക്കെത്തുകയായിരുന്നു. ആശുപത്രിയിലെത്തിക്കുന്ന രോഗികള്‍ക്ക് മരുന്നും മറ്റും നല്‍കുന്നതിന് നികുതി ഈടാക്കരുതെന്ന നിലപാടാണ് ഡിവിഷന്‍ ബെഞ്ച് സ്വീകരിച്ചതെങ്കിലും നികുതി ആകാമെന്ന് മറ്റൊരു ബെഞ്ച് നേരത്തേ വിധി പറഞ്ഞ സാഹചര്യത്തിലാണ് ഹര്‍ജികള്‍ അന്തിമ തീരുമാനത്തിന് ഫുള്‍ബെഞ്ചിന് വിട്ടത്.
രോഗിയുടെ ജീവന്‍ രക്ഷിക്കാനുള്ള ചികിത്സയുടെ ഭാഗമായി നല്‍കുന്ന മരുന്നുകളും മറ്റും വില്‍പനയായി കണക്കാക്കാനാവില്ലെന്നും ഇതിന്റെ തുക ആശുപത്രി ബില്ലിനൊപ്പം ഈടാക്കുമ്പോള്‍ കേരള വാറ്റ് പ്രകാരമുള്ള നികുതി ഈടാക്കരുതെന്നും ഫുള്‍ബെഞ്ച് വിധിച്ചു. രോഗികള്‍ക്ക് ആവശ്യമായ ചികിത്സയാണ് ആശുപത്രികളില്‍ നല്‍കുന്നത്.
രോഗിയുടെ താല്‍പര്യ പ്രകാരമല്ല, ഡോക്ടറുടെയോ സര്‍ജന്റെയോ വിദഗ്‌ധോപദേശ പ്രകാരമാണ് മരുന്ന് നല്‍കുന്നത്. ആശുപത്രികളുടെ സേവന വശം പരിഗണിക്കുമ്പോള്‍ മരുന്ന് വില അപ്രസക്തമാണ്. രോഗം ഭേദമാക്കലാണ് ചികിത്സയുടെ ലക്ഷ്യം. ചികിത്സ എന്ന സേവനത്തെ അതിന്റെ ഭാഗമായി നല്‍കുന്ന മരുന്നുകളുടെ വിലയുടെ പേരില്‍ നിയന്ത്രിക്കാനാവില്ലെന്നും കോടതി വ്യക്തമാക്കി.