ശബരിമലയില്‍ 51 യുവതികള്‍ ദര്‍ശനം നടത്തിയെന്നുള്ള പട്ടികയുടെ പൂര്‍ണ ഉത്തരവാദിത്തം സര്‍ക്കാരിനാണെന്നും ദേവസ്വം ബോര്‍ഡിനല്ലെന്നും പ്രസിഡന്റ് എ.പത്മകുമാര്‍. ഇതോടെ യുവതീപ്രവേശനം സംബന്ധിച്ച് സര്‍ക്കാരുമായുള്ള ഭിന്നത ദേവസ്വം പ്രസിഡന്റ് പരസ്യമാക്കിയിരിക്കുകയാണ്. സര്‍ക്കാരിന്റെ പക്കല്‍ വ്യക്തമായ കണക്ക് കാണും. ദേവസ്വം ബോര്‍ഡല്ല കോടതിയില്‍ പട്ടിക നല്‍കിയതെന്നും അദ്ദേഹം തിരുവനന്തപുരത്ത് മാധ്യമങ്ങളോട് പറഞ്ഞു. പൊലീസാണ് പട്ടിക തയ്യാറാക്കിയത്. യുവതികള്‍ കയറുന്നുണ്ടോ എന്ന് നോക്കാന്‍ ബോര്‍ഡിന്റെ പക്കല്‍ സംവിധാനമില്ലെന്നും പത്മകുമാര്‍ പറഞ്ഞു.

51 യുവതികള്‍ ദര്‍ശനം നടത്തിയ വാര്‍ത്ത ഇന്നലെ പുറത്ത് വന്നെങ്കിലും പത്മകുമാര്‍ പ്രതികരിച്ചിരുന്നില്ല. ബോര്‍ഡ് മെമ്പര്‍മാരായ ശങ്കര്‍ദാസും വിജയകുമാറും പറഞ്ഞത് സര്‍ക്കാരിന്റെ കണക്ക് ശരിയായിരിക്കാം എന്നാണ്. യുവതികള്‍ പ്രവേശിച്ചോ ഇല്ലയോ എന്ന് പറയാന്‍ ദേവസ്വംബോര്‍ഡിന്റെ പക്കല്‍ സംവിധാനങ്ങളില്ലെന്നും ശങ്കര്‍ദാസ് വ്യക്തമാക്കിയിരുന്നു. സര്‍ക്കാരിന് ആശയക്കുഴപ്പമില്ലെന്നും സുപ്രീംകോടതിയില്‍ നല്‍കിയ പട്ടികയില്‍ അവ്യക്തതയില്ലെന്നും ദേവസ്വം മന്ത്രി കടകംപള്ളി സുരേന്ദ്രന്‍ വ്യക്തമാക്കി. പത്മകുമാറിനൊപ്പമാണ് മന്ത്രിയും ഉണ്ടായിരുന്നത്. അതേസമയം പട്ടികയുടെ ഉത്തരവാദിത്തം സര്‍ക്കാരിനാണെന്നും പാര്‍ട്ടി ഓഫീസില്‍ പട്ടിക സൂക്ഷിച്ചിട്ടില്ലെന്നും സി.പി.ഐ സംസ്ഥാ സെക്രട്ടറി കാനം രാജേന്ദ്രന്‍ പറഞ്ഞു.

യുവതീപ്രവേശന വിഷയത്തില്‍ പാര്‍ട്ടിക്കും സര്‍ക്കാരിനും വിരുദ്ധമായ നിലപാട് സ്വീകരിച്ച എ. പത്മകുമാറിനെ വിമര്‍ശിക്കേണ്ടി വന്നെന്ന് പാര്‍ട്ടി സംസ്ഥാന സെക്രട്ടറി കോടിയേരി ബാലകൃഷ്ണന്‍ വ്യക്തമാക്കിയിരുന്നു. യുവതീ പ്രവേശന വിഷയത്തില്‍ തുടക്കം മുതല്‍ പത്മകുമാര്‍ സര്‍ക്കാര്‍ വിരുദ്ധനിലപാടാണ് സ്വീകരിച്ചത്. തുടര്‍ന്ന് മുഖ്യമന്ത്രി പിണറായി രൂക്ഷമായി വിമര്‍ശിച്ചിരുന്നു. വിധി വന്ന ശേഷം മുഖ്യമന്ത്രിയുമായി കൂടിക്കാഴ്ച നടത്തിയ ശേഷം പുറത്ത് വന്ന പത്മകുമാര്‍ ദേവസ്വം ബോര്‍ഡ് റിവ്യൂഹര്‍ജി നല്‍കുമെന്ന് മാധ്യമങ്ങളോട് പറഞ്ഞു. ഇത് ആശയക്കുഴപ്പം സൃഷ്ടിച്ചിരുന്നു. അങ്ങനെയൊരു തീരുമാനം എടുത്തിട്ടില്ലെന്ന് മുഖ്യമന്ത്രി വ്യക്തമാക്കി. പ്രസിഡന്റ് മറ്റാരുടെയോ ചട്ടുകമായി പ്രവര്‍ത്തിക്കുകയാണെന്നും അദ്ദേഹം തിരുത്തണമെന്നും മുഖ്യമന്ത്രി പത്തനംതിട്ടയില്‍ ആവശ്യപ്പെട്ടിരുന്നു.

തന്റെ കുടുംബത്തില്‍ നിന്ന് യുവതികളാരും ശബരിമലയില്‍ പോകില്ലെന്ന് പത്മകുമാര്‍ പറഞ്ഞതും വിവാദമായിരുന്നു. ഭാര്യ ഭര്‍ത്താവിന്റെ സ്വത്തല്ലെന്ന സുപ്രീംകോടതി വിധി വന്നതിന്റെ അടുത്ത ദിവസമായിരുന്നു ദേവസ്വം പ്രസിഡന്റിന്റെ പ്രതികരണം. അതോടെ അദ്ദേഹം യുവതീപ്രവേശന വിഷയത്തില്‍ മൗനം തുടര്‍ന്നു. പിന്നീട് യുവതികള്‍ ദര്‍ശനത്തിന് എത്തരുതെന്നാണ് തന്റെ വ്യക്തിപരമായ നിലപാടെന്നും എന്നാല്‍ പാര്‍ട്ടിയുടെയും സര്‍ക്കാരിന്റെയും നിലപാടിന് വഴങ്ങി പ്രവര്‍ത്തിക്കുമെന്നും പറഞ്ഞു.

മകരവിളക്ക് സമയത്ത് വലിയതിരക്കായതിനാല്‍ യുവതികള്‍ എത്തരുതെന്ന് പറഞ്ഞതും വിവാദമായിരുന്നു. ശ്രീലങ്കന്‍ യുവതി ദര്‍ശനം നടത്തിയത് സ്ഥിരീകരിക്കാനും അദ്ദേഹം തയ്യാറായില്ല. ഇതിനെല്ലാം പുറമേയാണ് സര്‍ക്കാര്‍ കോടതിയില്‍ നല്‍കിയ പട്ടികയ്‌ക്കെതിരെയും രംഗത്തെത്തിയത്.