തിരുവനന്തപുരത്ത് യോഗത്തിന് പോണെന്ന പേരില്‍ പോയ് അവസാനം ശബരിമലയില്‍ പൊങ്ങിയ കനകദുര്‍ഗ വീട്ടില്‍ തിരിച്ചെത്തിയപ്പോള്‍ ലഭിച്ച സ്വീകരണം എല്ലാവരും കണ്ടതാണ്. അമ്മായിയമ്മ തല്ലിയെന്ന പേരില്‍ അവസാനം കനകദുര്‍ഗ ആശുപത്രിയിലുമായി. കനക ദുര്‍ഗയാണ് 70 വയസുള്ള അമ്മായിയമ്മയെ തല്ലിയതെന്നും പറയുന്നു. ഈയൊരു തര്‍ക്കം നില്‍ക്കുന്ന സമയത്താണ് ബിന്ദു സ്വന്തം വീട്ടിലെത്തിയത്. ഒരു പ്രകോപനം പ്രതീക്ഷിച്ചവര്‍ക്ക് തെറ്റി.

ശക്തമായ പോലീസ് കാവലില്‍ വീട്ടിലെത്തിയ ബിന്ദുവിനെ വീട്ടുകാര്‍ സ്വീകരിച്ചു. ബിന്ദു വരുന്ന കാര്യമറിഞ്ഞ് സിപിഎം പ്രവര്‍ത്തകരും മാധ്യമപ്രവര്‍ത്തകരും വീട്ട് പരിസരത്ത് തമ്പടിച്ചിരുന്നു. പൊയില്‍ക്കാവിലെ ഭര്‍തൃവീട്ടിലാണ് ബിന്ദു എത്തിയത്. ബിന്ദുവിനൊപ്പം ശബരിമല കയറി തിരികെ എത്തിയ കനകദുര്‍ഗയെ വീട്ടില്‍ കയറ്റിയിരുന്നില്ല.

സര്‍ക്കാര്‍ വനിത മതില്‍ സംഘടിപ്പിച്ച ജനുവരി ഒന്നിന് തൊട്ടടുത്ത ദിവസമാണ് ബിന്ദുവും കനകദുര്‍ഗയും ശബരിമലയിലെത്തി ദര്‍ശനം നടത്തിയത്. തുടര്‍ന്ന് കനകദുര്‍ഗ മടങ്ങി എത്തിയപ്പോള്‍ ഭര്‍തൃവീട്ടില്‍ സംഘര്‍ഷമുണ്ടായി. ഭര്‍തൃമാതാവും കനകദുര്‍ഗയുമായി കൈയ്യേറ്റമുണ്ടായി

ബിന്ദുവിനും കനകദുര്‍ഗയ്ക്കും പൂര്‍ണ സുരക്ഷ ഒരുക്കാന്‍ സുപ്രീം കോടതി ഉത്തരവിട്ടിരുന്നു. ഒറു വിദേശ മാധ്യമപ്രവര്‍ത്തകയ്‌ക്കൊപ്പമാണ് ബിന്ദു വീട്ടിലെത്തിയത്. സാധാരണ ജീവിതത്തിലേക്ക് മടങ്ങുകയെന്നുള്ളതാണ് ഇനി തങ്ങളുടെ ആവശ്യമെന്ന് ബിന്ദു പറയുന്നു. ഇതിനായാണ് പൊലീസ് സുരക്ഷ തേടി സുപ്രീംകോടതിയെ സമീപിച്ചത്. കോടതി യാഥാര്‍ത്ഥ്യം മനസിലാക്കുന്നുണ്ടെന്നാണ് തങ്ങള്‍ക്ക് സുരക്ഷ അനുവദിച്ചുകൊണ്ട് ഉത്തരവിട്ടതില്‍ നിന്ന് മനസിലാകുന്നതെന്നും ബിന്ദു പറഞ്ഞിരുന്നു.

കഴിഞ്ഞ മാസം 22നാണ് ശബരിമല ദര്‍ശനത്തിനായി ബിന്ദുവും കനകദുര്‍ഗയും വീട് വിട്ടിറങ്ങിയത്. പിന്നീട് വീട്ടിലേക്ക് തിരികെ പോകാന്‍ വയ്യാത്ത അവസ്ഥയായിരുന്നു. ഫോണിലും സോഷ്യല്‍ മീഡിയയിലും നിരന്തരമായി ഭീഷണികളുണ്ടായി, ഇപ്പോഴും തുടരുന്നുണ്ട്. ചില സാധനങ്ങള്‍ കൈമാറാനായി ജോലി ചെയ്യുന്ന കണ്ണൂര്‍ സര്‍വകലാശാല പാലയാട് ക്യാമ്പസില്‍ ഭര്‍ത്താവ് എത്തിയപ്പോഴാണ് അദ്ദേഹത്തെ അര മണിക്കൂര്‍ കാണാനായത്. ബിന്ദു പറയുന്നു.

അതേസമയം മുഴുവന്‍ സമയ സുരക്ഷ നല്‍കാന്‍ സുപ്രീംകോടതിയും നിര്‍ദ്ദേശിച്ചതോടെ കനകദുര്‍ഗ പൊലീസ് സുരക്ഷയിലാണ് കനകദുര്‍ഗ്ഗ. യാതൊരു പ്രശ്‌നങ്ങളും ഇല്ലെന്ന് പരിശോധനയില്‍ വ്യക്തമായിട്ടും കോഴിക്കോട് മെഡിക്കല്‍ കോളേജില്‍ പൊലീസ് കാവലില്‍ കഴിയുകയാണ് യുവതി. ഗവ.മെഡിക്കല്‍ കോളജ് ആശുപത്രിയില്‍ ചികിത്സയില്‍ കഴിയുന്ന കനകദുര്‍ഗയെ എംആര്‍ഐ സ്‌കാനിങ്ങിനു വിധേയയാക്കിയപ്പഴാണ് പ്രശ്‌നങ്ങളൊന്നുമില്ലെന്ന് വ്യക്തമായത്.

സഹോദരിയായ കനകദുര്‍ഗ ചെയ്ത ആചാരലംഘനത്തിന് ഭക്തര്‍ക്ക് മുന്നില്‍ കൈകൂപ്പി മാപ്പപേക്ഷിച്ച് കനകദുര്‍ഗയുടെ സഹോദരന്‍ ഭരത് ഭൂഷണ്‍ ഇന്നലെ അയ്യപ്പ ഭക്ത സംഗമത്തില്‍ എത്തിയിരുന്നു.

കോടിക്കണക്കിന് ഭക്തരുടെ മനസ്സില്‍ മുറിവേല്‍പ്പിച്ച കനക ദുര്‍ഗയെ, അവരോട് മാപ്പപേക്ഷിക്കാതെ വീട്ടില്‍ കയറ്റാന്‍ താന്‍ തയ്യാറല്ല. പല മാധ്യമങ്ങളും, ഇടത് നേതാക്കളും ചേര്‍ന്ന് പ്രചരിപ്പിക്കുന്നത് കനകദുര്‍ഗയെ ഭര്‍തൃമാതാവ് തല്ലിയെന്ന രീതിയിലാണ്. എന്നാല്‍ സത്യം മറിച്ചാണ്. സര്‍ക്കാരിന്റെയും, കമ്മ്യൂണിസ്റ്റ് നേതാക്കളുടെയും ബലത്തില്‍ കനകദുര്‍ഗ ഭര്‍തൃമാതാവിനെ മര്‍ദ്ദിക്കുകയായിരുന്നുവെന്നും ഭരത് ഭൂഷണ്‍ പറഞ്ഞു. ശബരിമല യുവതീപ്രവേശത്തിനു പിന്നില്‍ സിപിഎം നടത്തിയ ഗൂഢാലോചനയാണ്.

കനകദുര്‍ഗയെ ഒളിപ്പിച്ചത് കണ്ണൂരിലെ പാര്‍ട്ടി ഗ്രാമത്തിലാണ്. ഇതിനു പിന്നില്‍ കോട്ടയം എസ്പി ഹരിശങ്കര്‍ ആണെന്നും, അതിന്റെ തെളിവുകള്‍ നല്‍കാന്‍ തയ്യാറാണെന്നും ഭരത് ഭൂഷണ്‍ പറഞ്ഞു.