ആതിര ഇനി തനിച്ച്... നടുക്കം മാറാതെ കണ്ണീര്പാടമായി കാവുംപാടം; വീട്ടില് നിന്നുമിറങ്ങി മിനിറ്റുകള്ക്കം കാറിന്റെ രൂപത്തില് എത്തിയ അപകടത്തില് സഹോദരിമാരും മാതാവ് ലിജിയും യാത്രയായപ്പോള് താങ്ങാനാകാതെ ആതിരയും അച്ഛനും
ശിവരാത്രി പ്രമാണിച്ച് വൈക്കം ക്ഷേത്രത്തില് ദര്ശനം നടത്താനും അതുവഴി ലിജിയുടെ വീട്ടിലേക്കു പോകുന്നതിനുമായി മൂവരും ബസ് സ്റ്റോപ്പിലേക്കു നടക്കും വഴിയായിരുന്നു പേരൂര് ഗ്രാമത്തെ നൊമ്ബരപ്പെടുത്തിയ അപകടം. ഏറ്റുമാനൂര്-മണര്കാട് ബൈപാസ് റോഡില് അമിതവേഗതയിലെത്തിയ കാര് നിയന്ത്രണം വിട്ടു വഴിയാത്രക്കാര്ക്കുമേല് പാഞ്ഞുകയറിയാണ് അമ്മയും കൗമാരക്കാരായ രണ്ടുപെണ്മക്കളും മരിച്ചത്. പേരൂര് കാവുംപാടം കോളനിയില് ആതിരയില് ബിജുവിന്റെ ഭാര്യ ലിജി(46) മക്കളായ അന്നു(19), നൈനു (16) എന്നിവരാണു മരിച്ചത്. കാറോടിച്ച പേരൂര് മൂല്ലൂര് ഷോണ് മാത്യു(19) തെള്ളകത്തെ സ്വകാര്യ ആശുപത്രിയില് ചികിത്സയിലാണ്. അന്നുവിന്റെയും നൈനുവിന്റെയും മൂത്ത സഹോദരി ആതിരയുടെ വിലാപവും നാടിനെയൊന്നാകെ ദുഖത്തിലാഴ്ത്തിയിരിക്കുകയാണ്. രാവിലെ എറണാകുളത്തെ ജോലിസ്ഥലത്തേക്കു കൂടെപ്പിറപ്പുകളോട് യാത്ര പറഞ്ഞിറങ്ങിയ ആതിര കരുതിയില്ല വലിയൊരു ദുരന്ത വാര്ത്തയാകും തന്നെ കാത്തിരിക്കുകയെന്ന്. അപകട വിവരം ആദ്യം ആതിരയെ അറിയിച്ചിരുന്നില്ല, വേഗം വീട്ടില് എത്തണമെന്നു മാത്രമേ പറഞ്ഞിരുന്നുള്ളൂ.
വളരെ വേഗം എറണാകുളത്തു നിന്നു ഏറ്റുമാനൂരില് എത്തിയ ആതിരയെ ബന്ധുക്കള് ചേര്ന്നു കൂട്ടിക്കൊണ്ടുവരികയായിരുന്നു. വീടിനു സമീപത്തെ ആള്ക്കൂട്ടം കണ്ടപ്പോള് തന്റെ കൂടെപ്പിറപ്പുകള്ക്ക് എന്തോ അപകടം സംഭവിച്ചതായി ആതിരയ്ക്കു മനസിലായി. വീട്ടിലെത്തി അമ്മയെയും അനിയത്തിമാരെയും തെരഞ്ഞ ആതിരയോട് എന്തു പറയുമെന്നറിയാതെ നാട്ടുകാരും കുഴങ്ങി. ഏറെ നേരത്തിനു ശേഷം മെഡിക്കല് കോളജ് ആശുപത്രിയില് നിന്നു വീട്ടിലെത്തിയ അച്ഛന് ബിജു കാര്യങ്ങള് പറഞ്ഞതോടെ അലമുറയിട്ട് കരഞ്ഞ ആതിര തളര്ന്നു വീണു. ബൈപാസ് രണ്ടാംഘട്ട നിര്മാണം പൂര്ത്തിയായിക്കൊണ്ടിരിക്കുന്ന റോഡില് കണ്ടന്ചിറ കവലയ്ക്കും പള്ളിക്കൂടം കവലയ്ക്കും മധ്യേ പേരൂര്കാവ് ക്ഷേത്രത്തിനുപിന്നില് ഇന്നലെ ഉച്ചകഴിഞ്ഞ് 1.45 നായിരുന്നു അപകടം. ഏറ്റുമാനൂര് ഭാഗത്തുനിന്ന് അമിതവേഗതയിലെത്തിയ മാരുതി റിറ്റ്സ് കാര് നിയന്ത്രണം വിട്ടു മൂവരുടെയും മേല് ഇടിച്ചു കയറുകയായിരുന്നുവെന്നു നാട്ടുകാര് പറയുന്നു. ഇടിയുടെ ആഘാതത്തില് മൂന്നുപേരും പത്തുമീറ്ററോളം ദൂരെ തെറിച്ചു വീണു. നൈനു തൊട്ടടുത്ത പറമ്ബിലെ തെങ്ങിന്ചുവട്ടിലേക്കും ലിജിയും അന്നുവും വഴിയരുകിലേക്കുമാണു വീണത്. അപകടശേഷം കാര് തൊട്ടടുത്ത താഴെത്തപറപ്പള്ളില് സജികുമാറിന്റെ പുരയിടത്തിലെ തേക്ക് മരത്തില് ഇടിച്ചാണു നിന്നത്. മൂവരെയും ഉടന് ആശുപത്രിയിലെത്തിച്ചെങ്കിലും നൈനുവും അന്നുവും മരണമടഞ്ഞിരുന്നു.
https://www.facebook.com/Malayalivartha
