കേരളത്തില്‍ ലോക്‌സഭാ തിരഞ്ഞെടുപ്പിലേക്കുള്ള വോട്ടെടുപ്പ് കഴിഞ്ഞതോടെ തിരഞ്ഞെടുപ്പിലെ പ്രകടനത്തെക്കുറിച്ചുള്ള വിലയിരുത്തലിലേക്ക് പാര്‍ട്ടികള്‍ കടന്നു. കഴിഞ്ഞ ദിവസം കൊച്ചിയില്‍ നടന്ന ആര്‍.എസ്.എസ് യോഗത്തില്‍ സംസ്ഥാനത്ത് ബി.ജെ.പിയുടെ വിജയ സാധ്യതയെകുറിച്ച് വിശദമായ ചര്‍ച്ച നടന്നു. കൊച്ചിയിലെ ആര്‍.എസ്.എസ് കാര്യാലയത്തിലായിരുന്നു യോഗം. വോട്ടെടുപ്പും പ്രചാരണവും വിലയിരുത്തിയ യോഗത്തില്‍ തിരുവനന്തപുരവും പത്തനംതിട്ടയിലും താമരവിരിയുമെന്ന് ഉറപ്പാക്കിയിരിക്കുകയാണ്.

ഇതില്‍ തലസ്ഥാനത്തെ വിജയം സുനിശ്ചിതമാണെന്നും പത്തനംതിട്ടയില്‍ ആകെ പോള്‍ ചെയ്ത പത്തു ലക്ഷം വോട്ടുകളില്‍ നാലുലക്ഷത്തിനടുത്ത് വോട്ട് സുരേന്ദ്രന്‍ നേടുമെന്നും ബാക്കി എല്‍.ഡി.എഫിനും യു.ഡി.എഫിനും തുല്യമായി ലഭിച്ചാല്‍ സുരേന്ദ്രന്‍ വിജയിക്കുമെന്നും കണക്കുകൂട്ടി. തിരുവനന്തപുരവും പത്തനംതിട്ടയും കഴിഞ്ഞാല്‍ ബി.ജെ.പി ഏറെ പ്രതീക്ഷ വച്ചിരുന്ന സീറ്റാണ് തൃശൂര്‍. കെ.സുരേന്ദ്രനെ അവിടെ മത്സരിപ്പിക്കണമെന്ന് കരുതി വളരെ മുന്‍പേ തൃശൂരില്‍ ഗ്രൗണ്ട് വര്‍ക്കുകള്‍ പാര്‍ട്ടി പൂര്‍ത്തീകരിച്ചിരുന്നു. എന്നാല്‍ ബി.ഡി.ജെ.എസുമായുള്ള സീറ്റ് വിഭജനചര്‍ച്ചകള്‍ നീണ്ട് പോയതോടെ വൈകിയാണ് സുരേഷ് ഗോപിക്ക് അവിടെ പ്രവര്‍ത്തനം തുടങ്ങാന്‍ കഴിഞ്ഞത്.

എന്നാല്‍ വ്യക്തി പ്രഭാവം കൊണ്ട് അതെല്ലാം മറികടക്കാന്‍ സുരേഷ്ഗോപിക്ക് കഴിഞ്ഞു. മറ്റു കക്ഷികള്‍ പ്രചരണത്തിന്റെ രണ്ടാം ഘട്ടം പൂര്‍ത്തിയാക്കിയ വേളയിലാണ് സുരേഷ് ഗോപി സ്ഥാനാര്‍ത്ഥിയായി മണ്ഡലത്തിലെത്തിയത്. അതിന് ശേഷം മണ്ഡലത്തിലെ പ്രചാരണവിഷയങ്ങള്‍ സുരേഷ് ഗോപിയെ ചുറ്റിയുള്ളതായിരുന്നെന്നും യോഗം വിലയിരുത്തി. കഴിഞ്ഞ ലോക്‌സഭാ തിരഞ്ഞെടുപ്പിനേക്കാള്‍ ഇരട്ടിയിലധികം വോട്ടുകള്‍ സുരേഷ് ഗോപിയുടെ പ്രചാരണ മികവില്‍ ബി.ജെ.പി നേടുമെന്നു കണക്കാക്കിയ യോഗം മണ്ഡലത്തിലെ വിജയസാധ്യത സുരേഷ് ഗോപിയുടെ വ്യക്തിപ്രഭാവത്തെ അനുസരിച്ചായിരിക്കുമെന്നും കണക്കാക്കി.