വോട്ടെടുപ്പ് ദിവസം തിരുവനന്തപുരം ശ്രീപത്മനാഭസ്വാമി ക്ഷേത്രത്തില് സി.ദിവാകരന്റെ പേരില് ഭാര്യ ഹേമലത വഴിപാട് നടത്തി, ക്ഷേത്രത്തിലെ നോട്ടീസ് ബോര്ഡില് വഴിപാടും പേരും നക്ഷത്രവും പ്രദര്ശിപ്പിച്ചപ്പോഴാണ് വിവരം പുറത്തായത്
കമ്മ്യൂണിസ്റ്റാണ്, മത വിശ്വാസങ്ങളില് വിശ്വാസമില്ലെങ്കിലും തെരഞ്ഞെടുപ്പ് വിജയിക്കാന് ഏത് വിശ്വാസത്തിന്റെയും അന്ധവിശ്വാസത്തിന്റെയും പുറകേ പോകും. അതാണ് നവലിബറല് കമ്മ്യൂണിസ്റ്റ് ലൈന്. തിരുവനന്തപുരം ലോക്സഭാ മണ്ഡലം എല്.ഡി.എഫ് സ്ഥാനാര്ത്ഥി സി.ദിവാകരന് തെരഞ്ഞെടുപ്പ് പ്രചരണം തുടങ്ങിയത് തന്നെ പ്രശസ്തമായ ആറ്റുകാല് ക്ഷേത്രത്തിന് അടുത്തുള്ള കൊഞ്ചിറവിള ദേവീക്ഷേത്രത്തില് നിന്നാണ്. അന്നേ ദിവാകരന് പറഞ്ഞു, വിശ്വാസം രക്ഷിക്കും. അത് വോട്ടെടുപ്പിന്റെ അന്ന് വരെ തുടര്ന്നു. വോട്ടെടുപ്പ് ദിവസം തിരുവനന്തപുരം ശ്രീപത്മനാഭസ്വാമി ക്ഷേത്രത്തില് സി.ദിവാകരന്റെ പേരില് ഭാര്യ ഹേമലത വഴിപാട് നടത്തി. ക്ഷേത്രത്തിലെ നോട്ടീസ് ബോര്ഡില് വഴിപാടും പേരും നക്ഷത്രവും പ്രദര്ശിപ്പിച്ചപ്പോഴാണ് വിവരം പുറത്തായത്.
സി. ദിവാകരന്, മകയിരം നക്ഷത്രം. അന്നദാനം. 20000 രൂപ. പഴവങ്ങാടി ഗണപതി ക്ഷേത്രത്തില് തേങ്ങയുടയ്ക്കുകയും ചെയ്തു. തെരഞ്ഞെടുപ്പ് പ്രചാരണ സമയത്ത് പൊങ്കാല ഉള്പ്പെടെയുള്ള ചടങ്ങുകളില് സി. ദിവാകരന് പങ്കെടുത്തത് വലിയ വാര്ത്തയായിരുന്നു. ശബരിമല യുവതീപ്രവേശനം അനുവദിച്ചപ്പോഴും മണ്ഡലകാലത്ത് യുവതികള് പ്രവേശിച്ചപ്പോഴും സി.ദിവാകരന് യാതൊരു തരത്തിലുമുള്ള പ്രതികരണങ്ങളും നടത്തിയിരുന്നില്ല. ഇടത്പക്ഷത്തുള്ളവരില് കൂടുതലും വിശ്വാസികളാണെന്നാണ് ദിവാകരന് പറയുന്നത്. മന്ത്രിയായിരുന്നപ്പോള് അദ്ദേഹം ക്ഷേത്രങ്ങളില് പോയിട്ടുണ്ട്. ഭാര്യ ഹേമലത വലിയ ഭക്തയാണ്. അവര് വഴിപാട് നടത്തിയതിന് പാര്ട്ടിക്കോ, മുന്നണിക്കോ യാതൊരു ബന്ധവുമില്ലെന്നാണ് സി.പി.ഐ, എല്.ഡി.എഫ് വൃത്തങ്ങള് പറയുന്നത്. ഭാര്യ എന്ന നിലയില് ഹേമലതയ്ക്ക് വഴിപാട് നടത്താന് അവകാശമുണ്ടെന്നും അതിനെ എതിര്ക്കാനാവില്ലെന്നും അവര് ചൂണ്ടിക്കാട്ടുന്നു.
ക്ഷേത്ര ആചാരങ്ങളെയും വിശ്വാസങ്ങളെയും പരസ്യമായി തള്ളിക്കളയുകയും രഹസ്യമായി അത് ചെയ്യുകയുമാണ് കമ്മ്യൂണിസ്റ്റ്കാരുടെ രീതിയെന്ന് കോണ്ഗ്രസുകാരും ബി.ജെ.പിയും ആരോപിക്കുന്നു. വി.എസ് അച്യൂതാനന്ദന്റെ മകന് പതാവായി ശബരിമല ദര്ശനം നടത്താറുണ്ട്. പാര്ട്ടികുടുംബങ്ങള് മതാചാരങ്ങളില് പങ്കെടുക്കരുതെന്ന് മുമ്പ് പറഞ്ഞപ്പോഴും അരുണ്കുമാര് ശബരിമല ഉള്പ്പെടെയുള്ള ക്ഷേത്രങ്ങളില് ദര്ശനം നടത്തിയിരുന്നു. അത് പോലെ സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന് ആഭ്യന്തരമന്ത്രിയായിരുന്ന കാലത്ത് അദ്ദേഹത്തിന്റെ പേരില് കാടാമ്പുഴ ക്ഷേത്രത്തില് പൂ മുടല് നടത്തിയത് വിവാദമായിരുന്നു. കഴിഞ്ഞ മണ്ഡലകാലത്ത് കോടിയേരിയുടെ മകന് ബിനീഷും വി.എസിന്റെ മകന് അരുണ്കുമാറും ഒരുമിച്ചാണ് ശബരിമലയില് പോയത്. അത് വലിയ വാര്ത്തയായിരുന്നു. ഡിവൈഎഫ്ഐ കമ്മിറ്റികളിലെ അംഗമാണ്.
കണ്ണൂര് ഉള്പ്പെടെ സി.പി.എമ്മിന് ശക്തമായ വേരോട്ടമുള്ള പ്രദേശങ്ങളില് അമ്പലക്കമ്മിറ്റികളില് പ്രാദേശികനേതാക്കള് കടന്ന് കൂടണമെന്ന് നേതൃത്വം പലപ്പോഴായി ആവശ്യപ്പെട്ടിട്ടുണ്ട്. ശബരിമല യുവതീപ്രവേശനത്തെ തുടര്ന്ന് ഇൗ നിലപാട് ശക്തമാക്കിയിരുന്നു. എന്നാല് ശബരിമല വിഷയത്തില് പാര്ട്ടിയും മുന്നണിയും കര്ശന നിലപാട് സ്വീകരിച്ചതില് കണ്ണൂരില് ഉള്പ്പെടെയുള്ള പാര്ട്ടി കുടുംബങ്ങള്ക്ക് ശക്തമായ പ്രതിഷേധം ഉണ്ടായിരുന്നു. ഇതേ തുടര്ന്ന് കണ്ണൂരില് വീടുകള്ക്ക് മുന്നില് സ്ഥാപിച്ചിരുന്ന പാര്ട്ടി പതാക പലരും അഴിച്ച് മാറ്റിയിരുന്നു. തൃശൂര് പൂരത്തിന് വെടിക്കെട്ടിന് നിയന്ത്രണം വേണമെന്ന കോടതി ഉത്തരവ് മറികടനക്കാന് സി.പി.ഐ മന്ത്രിയായ വി.എസ് സുനില്കുമാര് ഉള്പ്പെടെ ശ്രമിച്ച് വിജയിച്ചിരുന്നു. എന്നാല് ശബരിമല കാര്യത്തില് സി.പി.എമ്മിന്റെ ഭാഗത്ത് നിന്ന് അത്തരമൊരു നീക്കം ഉണ്ടാകാത്തതില് പാര്ട്ടി കുടുംബങ്ങളിലെ സ്ത്രീകള്ക്ക് ഉള്പ്പെടെ പ്രതിഷേധമുണ്ട്.
https://www.facebook.com/Malayalivartha
