തിരുവനന്തപുരം പാർലെമെന്റിലെ ഇടതു സ്ഥാനാർത്ഥി സി.ദിവാകരന്റെ കുടുംബം തികഞ്ഞ വിജയപ്രതീക്ഷയിൽ. 10,000 വോട്ടിനെങ്കിലും ദിവാകരൻ ജയിക്കുമെന്നാണ് അദ്ദേഹത്തിന്റെ കുടുംബം വിശ്വസിക്കുന്നത്.

ലോക്‌സഭാ തിരഞ്ഞെടുപ്പ് ദിവസം തിരുവനന്തപുരം ശ്രീപത്മനാഭ സ്വാമി ക്ഷേത്രത്തില്‍ സി ദിവാകരന്റെ പേരില്‍ അന്നദാനം നടത്തിയത് ഭഗവാനുള്ള കുടുംബത്തിന്റെ പ്രത്യുപകാരമായി കരുതുന്നു. അതേ സമയം അന്നദാനത്തിന്റെ പേരിൽ സി പി ഐ യിൽ അമർഷം പുകഞ്ഞു തുടങ്ങി.

സിപിഐ നേതാവിനായി ഭാര്യ ഹേമലതയാണ് അന്നദാനം വഴിപാടായി ചീട്ടാക്കിയത്. പിന്നീട് ക്ഷേത്ര നോട്ടീസ് ബോര്‍ഡില്‍ വഴിപാട് സംഭാവനം ചെയ്ത സി ദിവാകരന്‍ എന്ന പേരില്‍ പതിക്കുകയും ചെയ്തു.

സി ദിവാകരന്‍ മകയിരം നക്ഷത്രമെന്ന പേരിലാണ് അന്നദാനം നടത്തിയത്. 20000 രൂപയാണ് ക്ഷേത്രം ഈടാക്കിയത്. സ്ഥാനാര്‍ത്ഥിയുടെ കുടുംബം പഴവങ്ങാടി ഗണപതി ക്ഷേത്രത്തില്‍ തേങ്ങയുടയ്ക്കുകയും ചെയ്തിരുന്നു. പ്രചാരണ കാലത്ത് ക്ഷേത്രത്തിലെ പൊങ്കാല ഉള്‍പ്പെടെ ചടങ്ങുകളില്‍ ദിവാകരന്‍ പങ്കെടുത്തത് വാര്‍ത്തയായിരുന്നു.

ദിവാകരൻ പണ്ടേ ഈശ്വര വിശ്വാസിയായിരുന്നു. എന്നാൽ കമ്യൂണിസ്റ്റുകാരൻ വിശ്വാസിയാകാൻ പാടില്ലെന്ന ധാരണ പുലരുന്നതു കാരണം തന്റെ വിശ്വാസ രഹസ്യം അദ്ദേഹം പുറത്തു പറഞ്ഞില്ല. ദിവാകരന്റെ കുടുംബത്തിന് വിശ്വസിക്കാൻ തടസമില്ല. നായനാരുടെയും കോടിയേരിയുടെയും കുടുംബം വിശ്വാസം പിന്തുടർന്നത് പലവട്ടം വാർത്തയായിരുന്നു. എന്നാൽ തങ്ങളുടെ വിശ്വാസത്തെ കുടുംബത്തിന്റെ വിശ്വാസവുമായി കൂട്ടികുഴയ്ക്കേണ്ടതില്ലെന്നായിരുന്നു നേതാക്കളുടെ വാദം.

മൂന്നു ദിവസം മുമ്പ് തന്നെ സി.ദിവാകരന്റെ നേർച്ച ബിജെപി അനുകൂല ഗ്രൂപ്പുകളിൽ സജീവമായി ചർച്ച ചെയ്തിരുന്നു. ഇക്കാര്യം സാമൂഹ്യ മാധ്യമങ്ങളും ഏറ്റെടുത്തു. എന്നാൽ ദിവാകരൻ വാർത്തകൾ നിഷേധിച്ചില്ല.തന്റെ കുടുംബം വിശ്വാസികളാണെന്ന് ദിവാകരനുമായി ബന്ധപ്പെട്ടവർ പറയുന്നു.

സി പി ഐ യിലെ നേതാക്കളാരും വിശ്വാസികളല്ല. അവർ സി പി എമ്മുകാരെക്കാളും അവിശ്വാസികളാണ്. ദൈവത്തിൽ വിശ്വസിക്കുന്നവർ കമ്യൂണിസ്റ്റുകളല്ല എന്നാണ് സി പി ഐ ക്കാരുടെ വിശ്വാസം. സി പി ഐയാണ് യഥാർത്ഥ കമ്യൂണിസ്റ്റ് പാർട്ടി.

അതിനിടെ ഇടതു മുന്നണിയും ദിവാകരൻ ജയിക്കുമെന്നു തന്നെയാണ് വിശ്വസിക്കുന്നത്. ശശി തരൂരിന് ലഭിക്കേണ്ട വോട്ടുകൾ കുമ്മനത്തിന് മറിഞ്ഞതായും ഇടത് വോട്ടുകൾ തങ്ങൾക്ക് തന്നെ ലഭിച്ചതായും അവർ കരുതുന്നു. ചുരുങ്ങിയത് പതിനായിരം വോട്ടിനെങ്കിലും ജയിക്കുമെന്ന് തന്നെയാണ് ഇടത് മുന്നണിയും വിശ്വസിക്കുന്നത്. മലപ്പുറത്തും വയനാട്ടിലും ഒഴികെ ബാക്കിയെല്ലാ സീറ്റുകളിലും തങ്ങൾ ജയിക്കുമെന്നാണ് അവരുടെ പ്രതീക്ഷ. അപ്പോൾ ദിവാകരന്റെ കുടുംബത്തെ എങ്ങനെയാണ് കുറ്റം പറയുക?