സംസ്ഥാന സര്ക്കാര് ജീവനക്കാരുടെയും പെന്ഷന്കാരുടെയും മെഡിക്കല് ഇന്ഷുറന്സ് പദ്ധതിക്ക് മന്ത്രിസഭ യോഗത്തിന്റെ അംഗീകാരം
സംസ്ഥാന സര്ക്കാര് ജീവനക്കാരുടെയും പെന്ഷന്കാരുടെയും മെഡിക്കല് ഇന്ഷുറന്സ് പദ്ധതിക്ക് മന്ത്രിസഭ യോഗം അംഗീകാരം നല്കി. ജൂണ് ഒന്നിന് നിലവില് വരുന്ന പദ്ധതിയുടെ നടത്തിപ്പ് ചുമതല റിലയന്സ് ജനറല് ഇന്ഷുറന്സ് കമ്പനിക്കാണ്. രണ്ടു ലക്ഷം രൂപ വരെ അടിസ്ഥാന പരിരക്ഷയും ആറു ലക്ഷം രൂപ വരെ അധിക പരിരക്ഷയും ലഭ്യമാക്കുന്ന പദ്ധതി അവയവമാറ്റം പോലെയുള്ള കാര്യങ്ങള്ക്ക് വേണ്ടിവന്നാല് മൂന്നു ലക്ഷവും കൂടി ലഭ്യമാക്കും.ജീവനക്കാരുടെ ശമ്പളത്തില്നിന്ന് പ്രതിമാസം 250 രൂപ വീതം പ്രീമിയമായി പിടിക്കും. പെന്ഷന്കാര്ക്ക് മെഡിക്കല് അലവന്സായി നല്കിവരുന്ന 300 രൂപയില്നിന്ന് ഈ തുക കുറവ് ചെയ്യും.
പ്രീമിയം മൂന്നു ഗഡുക്കളായി സര്ക്കാര് ഇന്ഷുറന്സ് കമ്പനിക്ക് മുന്കൂറായി നല്കും. ഔട്ട് പേഷ്യന്റ് ചികിത്സകള്ക്ക് നിലവിലെ മെഡിക്കല് റീഇംബേഴ്സ്മെന്റ് സ്കീം തുടരും.
ഗവണ്മെന്റ് മെഡിക്കല് അറ്റന്ഡന്റ് ചട്ടങ്ങള് ബാധകമായ ഹൈകോടതിയിലേതുള്പ്പെടെ സംസ്ഥാന സര്ക്കാര് ജീവനക്കാര്, പാര്ട്ട് ടൈം കണ്ടിന്ജന്റ് ജീവനക്കാര്, എയ്ഡഡ് മേഖലയിലേതടക്കം അധ്യാപകര്അനധ്യാപകര്, പാര്ട്ട് ടൈം അധ്യാപകര്, തദ്ദേശ സ്ഥാപനങ്ങള്, സര്വകലാശാലകള് എന്നിവയിലെ ജീവനക്കാര്, പേഴ്സനല് സ്റ്റാഫ് അംഗങ്ങള് എന്നിവരും ഈ വിഭാഗങ്ങളിലെ പെന്ഷന്കാരും കുടുംബ പെന്ഷന്കാരുമാണ് ഗുണഭോക്താക്കള്.
ഇവരുടെ ചട്ടപ്രകാരമുള്ള ആശ്രിതര്ക്കും പരിരക്ഷ ലഭ്യമായിരിക്കും. ഇപ്പോള് നിലവില് വരുന്ന ഇന്ഷുറന്സ് പദ്ധതിയുടെ കാലാവധി മൂന്നു വര്ഷമാണ്.2017-18 ലെ ബജറ്റ് പ്രസംഗത്തിലാണ് മെഡിസെപ് പ്രഖ്യാപിച്ചത്. ഇന്ഷുറന്സ് റെഗുലേറ്ററി അതോറിറ്റിയുടെ അംഗീകാരമുള്ള കമ്പനികളില്നിന്ന് താല്പര്യപത്രം ക്ഷണിക്കുകയും അതിന്റെ അടിസ്ഥാനത്തില് ഇടെന്ഡര് വിളിക്കുകയും ചെയ്തു. ടെന്ഡറില് ഏറ്റവും കുറഞ്ഞ വാര്ഷിക പ്രീമിയം തുകയായ 2992.48 രൂപ (ജി.എസ്.ടി അടക്കം) യാണ് റിലയന്സ് രേഖപ്പെടുത്തിയത്. ജീവനക്കാര്ക്കും പെന്ഷന്കാര്ക്കും സര്ക്കാര് നല്കിയ ഏറ്റവും സുപ്രധാനമായ വാഗ്ദാനമാണ് നടപ്പാക്കുന്നതെന്ന് ധനമന്ത്രി ഡോ. തോമസ് ഐസക് അറിയിച്ചു.
മെഡിസെപ്: മൂന്നുതരം പരിരക്ഷ
മെഡിക്കല് ഇന്ഷുറന്സ് സ്കീം ഫോര് സ്റ്റേറ്റ് എംപ്ലോയീസ് ആന്ഡ് പെന്ഷനേഴ്സ് (മെഡിസെപ്) എന്നാണ് പദ്ധതിയുടെ പേര്. മൂന്നു വിഭാഗത്തില്പെടുന്ന പരിരക്ഷയായിരിക്കും ലഭിക്കുക.
അടിസ്ഥാന പരിരക്ഷ: ഓരോ കുടുംബത്തിനും ഇന്ഷുറന്സ് കാലയളവില് പ്രതിവര്ഷം രണ്ടു ലക്ഷം രൂപയുടെ അടിസ്ഥാന ഇന്ഷുറന്സ് പരിരക്ഷ.
അധിക പരിരക്ഷ: അവയവമാറ്റം ഉള്പ്പെടെ ഗുരുതര രോഗങ്ങള്ക്ക് ചികിത്സക്ക് മൂന്നു വര്ഷക്കാലത്ത് ഒരു കുടുംബത്തിന് പരമാവധി ആറുലക്ഷം രൂപയുടെ അധിക പരിരക്ഷ. അടിസ്ഥാന പരിരക്ഷക്ക് പുറമെയായിരിക്കുമിത്.
ആറുലക്ഷം രൂപയുടെ അധിക പരിരക്ഷയും ഗുരുതരരോഗ ചികിത്സച്ചെലവിന് തികയുന്നില്ലെങ്കില്, ഇതിനു പുറമെ പോളിസി കാലയളവില് പരമാവധി ഒരു കുടുംബത്തിന് മൂന്നുലക്ഷം രൂപ വരെ ലഭ്യമാക്കും. ഇതിനായി ഇന്ഷുറന്സ് കമ്പനി പ്രതിവര്ഷം 25 കോടി രൂപയുടെ സഞ്ചിതനിധി രൂപവത്കരിക്കും. ഇതില് നിന്നായിരിക്കും ഈ അധിക സഹായം നല്കുക.
L
https://www.facebook.com/Malayalivartha
