തെച്ചിക്കോട്ട്കാവ് രാമചന്ദ്രനുള്ള വിലക്ക് തുടരുമെന്ന് തൃശൂർ ജില്ലാ കളക്ടർ അറിയിച്ചതിന് പിന്നാലെ തൃശൂര്‍ ജില്ലാ കളക്ടര്‍ ടി.വി.അനുപമയുടെ ഫെയ്‌സ്ബുക്ക് പേജില്‍ സേവ് രാമന്‍ പ്രതിഷേധം. തെച്ചിക്കോട്ട്കാവ് രാമചന്ദ്രനെ പൂരം എഴുന്നള്ളത്തിന്‌ വിട്ട് തരണമെന്നാവശ്യപ്പെട്ട് ആനപ്രേമികളെന്ന് അവകാശപ്പെടുന്ന നിരവധി ആളുകളാണ് രംഗത്തെത്തിയിരിക്കുന്നത്.

ഒരു ജനതയുടെ ആവേശമാണ്, വിശ്വാസമാണ് തെക്കേഗോപുര നടയില്‍ രാമന്‍ ഉണ്ടാവണം, ദയവ് ചെയ്ത് വിലക്ക് നീക്കണം തുടങ്ങിയ ആവശ്യങ്ങളാണ് ഇവര്‍ ഉന്നയിക്കുന്നത്. അതേ സമയം രാമനെ വിലക്കുക, ജനങ്ങളെ രക്ഷിക്കുക എന്ന ഹാഷ്ടാഗോടെ ഇതിനെതിരെ മറുവിഭാഗവും രംഗത്തെത്തിയിട്ടുണ്ട്.

ഫെബ്രുവരിയില്‍ ഗുരുവായൂരില്‍ ഗൃഹപ്രവേശനത്തിനെത്തിച്ച തെച്ചിക്കോട്ട്കാവ് രാമചന്ദ്രന്‍ ഇടഞ്ഞത് രണ്ട് പേരുടെ മരണത്തിനിടയാക്കിയിരുന്നു. തുടര്‍ന്നാണ് എഴുന്നുള്ളിപ്പിന് ആനയ്ക്ക്‌ താത്ക്കാലിക വിലക്കേര്‍പ്പെടുത്തിയത്. തുടര്‍ന്ന് ഓരോ പതിനഞ്ച് ദിവസം കൂടുമ്പോഴും പരിശോധനക്ക് ശേഷം വിലക്ക് നീട്ടുകയാണ് ചെയ്തിരുന്നത്. തൃശൂര്‍ പൂരത്തിന് എഴുന്നുള്ളിക്കാനാകുന്ന സാഹചര്യമല്ലെന്നും തെച്ചിക്കോട്ട്കാവ് രാമചന്ദ്രനുള്ള വിലക്ക് തുടരുമെന്നും കളക്ടര്‍ അനുപമ കഴിഞ്ഞ ദിവസം അറിയിച്ചിരുന്നു. ഇതിനെതിരെയാണ് ഒരു വിഭാഗം ആളുകളുടെ പ്രതിഷേധം.

വിലക്ക് നീക്കിയില്ലെങ്കില്‍ പൂരത്തില്‍ നിന്ന് മുഴുവന്‍ ആനകളെയും പിന്‍വലിക്കുമെന്ന് ആനയുടമകള്‍ നിലപാടെടുത്തിരിക്കുകയാണ്‌. നിയമവശങ്ങള്‍ പരിശോധിച്ച് ഉടന്‍ നടപടിയെടുക്കുമെന്നാണ് മന്ത്രി വി എസ് സുനില്‍കുമാര്‍ വ്യക്തമാക്കിയത്.