ലോകം എന്ത് പുരോഗമിച്ചു. എങ്കിലും കേരളത്തില്‍ ഇപ്പോഴും കള്ളവോട്ട് സുഗമമായി നടക്കുന്നുണ്ടെന്നാണ് ഇന്നലെ പുറത്തുവന്ന തെളിവുകളോടെ മനസിലായത്. ജനങ്ങള്‍ ഓരേ പേരില്‍ പറ്റിപ്പ് നടത്താതിരിക്കാന്‍ എന്തെല്ലാം സംവിധാനങ്ങള്‍ നാട്ടിലുണ്ട്. ഏറ്റവും അവസാനം കൊണ്ടു വന്നതാണ് ആധാര്‍. എന്തൊക്കെ കുറ്റം പറഞ്ഞാലും സേവനം യഥാര്‍ത്ഥ ആളിന് തന്നെ കിട്ടിത്തുടങ്ങി. ബയോമെട്രിക് സംവിധാനം പോലും നിലവിലുണ്ട്. വിരലടയാളമോ കണ്ണിന്റെ അടയാളമോ വച്ച് ആളിനെ തിരിച്ചറിയാന്‍ പറ്റുന്ന ബയോമെട്രിക് സമ്പ്രദായം ഇപ്പോള്‍ സര്‍വത്രമായുണ്ട്. നമ്മുടെ തെരഞ്ഞെടുപ്പ് സമ്പ്രദായം അതിലേക്ക് മാറിയാല്‍ തന്നെ കള്ള വോട്ടേ ഇല്ലാതാകും. അതിലേക്കുള്ള ഒരു വഴിയായിരിക്കുകയാണ് പുറത്തു വരുന്ന ദൃശ്യങ്ങള്‍.

കാസര്‍ഗോഡ് മണ്ഡലത്തില്‍ കളളവോട്ട് നടന്നതിന്റെ ദൃശ്യങ്ങള്‍ പുറത്ത് വന്നത് സിപിഎമ്മിനെ പ്രതിരോധത്തിലാക്കിയിരിക്കുകയാണ്. ഇതില്‍ താരമായതാകട്ടെ സിപിഎം എഴുതി തള്ളിയ കണ്ണൂരിലെ യുഡിഎഫ് സ്ഥാനാര്‍ത്ഥി കെ സുധാകരന്‍. കോണ്‍ഗ്രസാണ് കളളവോട്ടിന്റെ ദൃശ്യങ്ങള്‍ പുറത്ത് വിട്ടത്. എരമംകുറ്റൂര്‍ പഞ്ചായത്തിലും ചെറുതാഴം പഞ്ചായത്തിലും വ്യാപകമായി കള്ളവോട്ട് നടന്നു എന്നാണ് കോണ്‍ഗ്രസ് ആരോപിക്കുന്നത്. അതേസമയംതന്നെ കെ സുധാകരന്‍ സിപിഎമ്മിനെതിരെ ആഞ്ഞടിച്ച് രംഗത്ത് വരികയും ചെയ്തു. 

കള്ളവോട്ടിന്റെ ദൃശ്യങ്ങള്‍ പുറത്ത് വന്നതോടെ ഇതിനെതിരെ കോണ്‍ഗ്രസ് നിയമയുദ്ധം നടത്തുമെന്ന് കെ സുധാകരന്‍ വ്യക്തമാക്കി. സുപ്രീം കോടതിയെ സമീപിക്കാനാണ് കോണ്‍ഗ്രസ് നീക്കം. അന്നും ഇന്നും കളളവോട്ട് കണ്ണൂരില്‍ ഒരു സത്യമാണെന്ന് കെ സുധാകരന്‍ പറഞ്ഞു.

ജനഹിതം അട്ടിമറിക്കുന്ന ഒരു രാഷ്ട്രീയ പ്രവര്‍ത്തന ശൈലിയാണ് സിപിഎം സ്വീകരിക്കുന്നതെന്നും കെ സുധാകരന്‍ ആരോപിച്ചു. ആണത്തത്തോടെ കളളവോട്ടില്ലാതെ തെരഞ്ഞെടുപ്പില്‍ മത്സരിക്കാന്‍ സിപിഎം തയ്യാറുണ്ടോ എന്ന് സുധാകരന്‍ വെല്ലുവിളിച്ചു. അതിന് സിപിഎം തയ്യാറായാല്‍ കണ്ണൂരിലെ 11 നിയോജക മണ്ഡലങ്ങളില്‍ രണ്ടിലേറെ സീറ്റുകളില്‍ അവര്‍ക്ക് വിജയിക്കാന്‍ സാധിക്കില്ലെന്ന് സുധാകരന്‍ പറഞ്ഞു.

കണ്ണൂരിലെ മറ്റ് മണ്ഡലങ്ങളില്‍ എല്ലാം സിപിഎം അതിജീവിക്കുന്നത് കളളവോട്ടുകള്‍ കൊണ്ടാണെന്നും സുധാകരന്‍ ആരോപിച്ചു. ഡബിള്‍ വോട്ട് ചെയ്യാനുളള സാഹചര്യം അക്രമത്തിലൂടെ സിപിഎം ഒരുക്കുന്നു. പ്രതികരിക്കാന്‍ പോലും കഴിയാത്ത സമൂഹത്തെയാണ് സിപിഎം സൃഷ്ടിക്കുന്നതെന്നും സുധാകരന്‍ പറഞ്ഞു. 

അതേസമയം കാസര്‍കോട്ടെ കള്ളവോട്ട് ആരോപണത്തില്‍ റിട്ടേണിങ് ഓഫീസര്‍മാരോട് റിപ്പോര്‍ട്ട് തേടിയിട്ടുണ്ടെന്ന് മുഖ്യ തിരഞ്ഞെടുപ്പ് ഓഫീസര്‍ ടിക്കാറാം മീണ വ്യക്തമാക്കി. കണ്ണൂര്‍, കാസര്‍കോട് കളക്ടര്‍മാരോടാണ് റിപ്പോര്‍ട്ട് തേടിയിരിക്കുന്നത്. 

കള്ളവോട്ട് നടന്നിട്ടുണ്ടെങ്കില്‍ അത് ഗുരുതരമായ തെറ്റാണ്. കളക്ടര്‍മാരോട് ഇക്കാര്യത്തില്‍ അടിയന്തര റിപ്പോര്‍ട്ടാണ് തേടിയിരിക്കുന്നത്. റിപ്പോര്‍ട്ട് ലഭിച്ച ശേഷം നടപടികള്‍ എടുക്കുമെന്നും ടിക്കാറാം മീണ പറഞ്ഞു.

അസി.റിട്ടേണിങ് ഓഫീസറുടേയും പ്രിസൈഡിങ് ഓഫീസറുടെയും ഒത്താശയില്ലാതെ കള്ളവോട്ടുകള്‍ നടത്താന്‍ സാധിക്കില്ല. റിപ്പോര്‍ട്ട് വരുന്നത് വരെ നമുക്ക് കാത്തിരിക്കാമെന്നും അദ്ദേഹം വ്യക്തമാക്കി. 

ബൂത്ത് പിടിത്തം സംബന്ധിച്ച് നിരവധി തവണ കളക്ടര്‍മാര്‍ക്ക് പരാതി നല്‍കിയിരുന്നെങ്കിലും നടപടി എടുത്തിരുന്നില്ലെന്നും യുഡിഎഫ് സ്ഥാനാര്‍ഥികളായ രാജ്‌മോഹന്‍ ഉണ്ണിത്താനും കെ.സുധാകരനും ആരോപിച്ചിരുന്നു.

കള്ളവോട്ട് ആരോപണം നിഷേധിച്ച് സി.പി.എം.കണ്ണൂര്‍ ജില്ലാ സെക്രട്ടറി എം.വി. ജയരാജന്‍. പാര്‍ട്ടി കള്ളവോട്ട് ചെയ്യാറില്ലെന്നും പഞ്ചായത്തംഗം ഉള്‍പ്പെടെയുള്ളവര്‍ കള്ളവോട്ട് ചെയ്തുവെന്ന് ആരോപിക്കുന്നത് രാഷ്ട്രീയ ദുഷ്ടലാക്കോടെയെന്നും അദ്ദേഹം പറഞ്ഞു. പഞ്ചായത്തംഗം മറ്റൊരു ബൂത്തില്‍ വോട്ട് ചെയ്തത് വോട്ട് ഓപ്പണ്‍ വോട്ടാണെന്നാണ് അദ്ദേഹം വാദിച്ചത്.