കള്ളവോട്ടും ഓപ്പണ്‍ വോട്ടുമാണ് കേരളം മൊത്തത്തില്‍ ചര്‍ച്ചചെയ്യുന്നത്. അതിനിടെ സിപിഎം വല്ലാത്തൊരു പ്രതിരോധത്തിലേക്ക് പോകുകയാണ്. കണ്ണൂര്‍, കാസര്‍കോഡ് ജില്ലകളില്‍ ഉള്‍പ്പെട്ട കാസര്‍കോഡ് ലോക്‌സഭാ മണ്ഡലത്തില്‍ കള്ളവോട്ട് നടന്നതായി കളക്ടര്‍മാരുടെ പ്രാഥമിക റിപ്പോര്‍ട്ടില്‍ സ്ഥിരീകരിച്ചെന്ന് അറിയുന്നു. റിപ്പോര്‍ട്ടുകള്‍ ഇന്നലെ മുഖ്യതിരഞ്ഞെടുപ്പ് ഓഫീസര്‍ ടിക്കാറാം മീണയ്ക്ക് സമര്‍പ്പിച്ചു. ആരോപണത്തില്‍ പറയുന്ന വിഡിയോദൃശ്യങ്ങള്‍ വ്യാജമല്ലെന്നാണ് പ്രാഥമിക പരിശോധനയില്‍ മനസിലായതെന്ന് റിപ്പോര്‍ട്ടിലുണ്ട്. കള്ളവോട്ട് നടന്നെന്ന് സ്ഥിരീകരിച്ച സാഹചര്യത്തില്‍ വിശദമായ റിപ്പോര്‍ട്ട് സമര്‍പ്പിക്കാന്‍ മുഖ്യതിരഞ്ഞെടുപ്പ് ഓഫീസര്‍ കളക്ടര്‍മാരോട് നിര്‍ദ്ദേശിച്ചു.

തിരഞ്ഞെടുപ്പ് കമ്മിഷന്റെ നേതൃത്വത്തില്‍ പൊതുമേഖലാസ്ഥാപനമായ കെല്‍ട്രണ്‍ ആണ് സി.സി.ടി.വി. സ്ഥാപിച്ചത്. ഇതിന്റെ ഫുട്ടേജുകള്‍ രഹസ്യമല്ല. സ്ഥാനാര്‍ത്ഥികള്‍ക്കും നടപടിക്രമങ്ങള്‍ പാലിച്ച് ഇതിന്റെ പകര്‍പ്പ് ലഭ്യമാക്കാന്‍ അവകാശമുണ്ട്. ഈ ഫുട്ടേജുകള്‍ പരിശോധിച്ചും പ്രിസൈഡിംഗ് ഓഫീസര്‍മാര്‍,പോളിംഗ് ഓഫീസര്‍മാര്‍ എന്നിവരില്‍ നിന്ന് തെളിവെടുത്തുമാണ് കളക്ടര്‍മാര്‍ റിപ്പോര്‍ട്ട് തയ്യാറാക്കിയത്. വിശദ റിപ്പോര്‍ട്ട് തേടി എത്ര കള്ളവോട്ട് നടന്നു, എങ്ങിനെ നടന്നു, ആരൊക്കെയാണ് ഉത്തരവാദികള്‍, ഉദ്യോഗസ്ഥര്‍ക്ക് നേരിട്ട് പങ്കുണ്ടോ, രാഷ്ട്രീയപാര്‍ട്ടി പ്രതിനിധികളുടെ പങ്കാളിത്തം, സാന്നിദ്ധ്യം, ഭീഷണി, സുരക്ഷാവീഴ്ച എന്നിവയൊക്കെ ഉള്‍പ്പെടുത്തിയുള്ള വിശദമായ റിപ്പോര്‍ട്ടാണ് തേടിയത്. വിശദമായ റിപ്പോര്‍ട്ട് ലഭിച്ചതിന് ശേഷം അന്തിമ തീരുമാനമുണ്ടാകുമെന്ന് ടിക്കാറാം മീണ പറഞ്ഞു.

കള്ളവോട്ട് തെളിഞ്ഞാല്‍ ജയിലും പിഴയും. കള്ളവോട്ട് ചെയ്തവരെ തിരഞ്ഞെടുപ്പ് നിയമത്തിലെ ചട്ടം 32 അനുസരിച്ച് പ്രോസിക്യൂട്ട് ചെയ്യാം. രണ്ടുവര്‍ഷം വരെ തടവും പിഴയും ശിക്ഷ ലഭിക്കും. കൂടാതെ ഇന്ത്യന്‍ ശിക്ഷാനിയമത്തിലെ 171 സി. ഡി, എഫ്. വകുപ്പുകളനുസരിച്ച് ആള്‍മറാട്ടം, വഞ്ചന തുടങ്ങിയ കുറ്റങ്ങള്‍ ആരോപിച്ച് ക്രിമിനല്‍ കേസെടുക്കാം. ഒരു വര്‍ഷം വരെ തടവും പിഴയും ശിക്ഷ ലഭിക്കും.കള്ളവോട്ട് പ്രാഥമികമായി കണ്ടെത്തിയ സാഹചര്യത്തില്‍ പൊലീസ് നടപടികള്‍ ആരംഭിക്കേണ്ടതാണ്.

കള്ളവോട്ടില്‍ തിരഞ്ഞെടുപ്പ് ഉദ്യോഗസ്ഥര്‍ ഉള്‍പ്പെട്ടിട്ടുണ്ടെങ്കില്‍ 1951 ലെ ഇന്ത്യന്‍ തിരഞ്ഞെടുപ്പ് നിയമത്തിലെ ചട്ടം 134 അനുസരിച്ച് കൃത്യവിലോപം, തിരഞ്ഞെടുപ്പ് നടപടികള്‍ തടസപ്പെടുത്തല്‍ തുടങ്ങിയ കുറ്റങ്ങള്‍ ചുമത്തി പ്രോസിക്യൂട്ട് ചെയ്യാം.റീപോളിംഗ്കള്ളവോട്ട് നടന്നതായി തെളിഞ്ഞാലും മണ്ഡലത്തിലെ തിരഞ്ഞെടുപ്പ് റദ്ദാക്കാന്‍ കമ്മിഷന് കഴിയില്ല.തിരഞ്ഞെടുപ്പ് റദ്ദാക്കാന്‍ കോടതിക്കാണ് അധികാരം.വോട്ടെണ്ണുന്നതിന് മുമ്പ് കള്ളവോട്ട് തെളിഞ്ഞാല്‍ തിരഞ്ഞെടുപ്പ് കമ്മിഷന് ഈ ബൂത്തുകളില്‍ റീപോളിംഗ് നടത്താം.

അതേസമയം കണ്ണൂര്‍,കാസര്‍കോട് ജില്ലകളിലെ ചില ബൂത്തുകളില്‍ വ്യാപകമായ കള്ളവോട്ട് നടന്നുവെന്ന വീഡിയോതെളിവ് സഹിതം വാര്‍ത്ത പുറത്തുവന്നതോടെ പ്രതിരോധിക്കാന്‍ ഇടതുമുന്നണി പറഞ്ഞ ഓപ്പണ്‍ വോട്ട് വാദം അബദ്ധം. രാജ്യത്തെ തിരഞ്ഞെടുപ്പ് നിയമം അനുസരിച്ച് പൊതുതിരഞ്ഞെടുപ്പില്‍ ഓപ്പണ്‍വോട്ട് എന്ന സംവിധാനമില്ലെന്ന് മുഖ്യതിരഞ്ഞെടുപ്പ് ഓഫീസര്‍ ടിക്കാറാം മീണ വ്യക്തമാക്കി.

പൊതുതിരഞ്ഞെടുപ്പില്‍ ഓപ്പണ്‍വോട്ട് സമ്പ്രദായം നിയമവിധേയമല്ല. രഹസ്യബാലറ്റ് സംവിധാനമാണ് രാജ്യത്തുള്ളത്. അതേസമയം കംപാനിയന്‍വോട്ട് ,പ്രോക്‌സിവോട്ട്, പോസ്റ്റല്‍വോട്ട്, ടെണ്ടേര്‍ഡ് വോട്ട് സംവിധാനങ്ങളുണ്ട്. പോസ്റ്റല്‍ വോട്ട് തിരഞ്ഞെടുപ്പ് ജോലികള്‍ക്ക് നിയോഗിക്കപ്പെട്ട സര്‍ക്കാര്‍ ഉദ്യോഗസ്ഥര്‍ക്ക് വോട്ടവകാശം വിനിയോഗിക്കാനുള്ളതാണ്. ഇതിന് ഫോറം 12 പൂരിപ്പിച്ച് നല്‍കി അനുമതിതേടണം. ടെണ്ടേര്‍ഡ് വോട്ട് കള്ളവോട്ടിന് ഇരയായവര്‍ക്കുള്ളതാണ്. ഏതെങ്കിലും വോട്ടറുടെ വോട്ട് മറ്റൊരാള്‍ ചെയ്തുപോയിട്ടുണ്ടെങ്കില്‍ വോട്ടര്‍ക്ക് ടെണ്ടേര്‍ഡ് വോട്ട് ചെയ്യാന്‍ അവകാശമുണ്ടായിരിക്കും. ഇത് പ്രിസൈഡിംഗ് ഓഫീസറാണ് തീരുമാനിക്കേണ്ടത്. ഈ വോട്ട് പ്രത്യേകം വോട്ടിംഗ് യന്ത്രത്തിലാണ് നടത്തുക. ഇത് പ്രത്യേകം സൂക്ഷിക്കുകയും ചെയ്യും.