ജീപ്പ് നിയന്ത്രണം വിട്ടു മറിഞ്ഞു യുവാവു മരിച്ചു. സഹയാത്രികനായ 18 വയസുകാരന് ഗുരുതര പരുക്ക്. രാജാക്കാട് പന്നിയാര്‍കുട്ടി മൈലന്‍കുഴി സെബാസ്റ്റിയന്റെ മകന്‍ ബോബന്‍ (38) ആണ് മരിച്ചത്. ഇന്നലെ രാത്രി ഒന്‍പതു മണിയോടെ പന്നിയാര്‍കുട്ടിക്ക് സമീപം മുല്ലക്കാനം പനച്ചികുഴിയില്‍ ജീപ്പ് നിയന്ത്രണം വിട്ട് മറിഞ്ഞാണ് അപകടം.

ജീപ്പിലുണ്ടായിരുന്ന പന്നിയാര്‍കുട്ടി മൈലാടൂര്‍ അലന്‍ സണ്ണിക്കു(18 ) പരുക്കേറ്റു. ഇയാളെ അടിമാലിയിലെ സ്വകാര്യ ആശുപത്രിയില്‍ പ്രവേശിപ്പിച്ചു. പന്നിയാര്‍കുട്ടിയില്‍നിന്നും ഇരുവരും ആനപ്പാറയിലേക്ക് പോകുന്ന വഴിയാണ് അപകടം സംഭവിച്ചുവെന്നാണ് പ്രാഥമിക നിഗമനം.

ബ്രേക്ക് പോയ ജീപ്പ് 100 അടി താഴ്ചയിലേക്ക് മറിയുകയായിരുന്നു. ഗുരുതരമായി പരിക്കേറ്റ ബോബനെ രാജാക്കാട്ട് ആശുപത്രിയില്‍ എത്തിച്ചശേഷം വിദഗ്ധ ചികില്‍സയ്ക്കായി അടിമാലിയിലേക്ക് കൊണ്ടുപോകും വഴിയായിരുന്നു മരണം. മൃതദേഹം പത്തു മണിയോടെ അടിമാലി താലൂക്ക് ആശുപത്രി മോര്‍ച്ചറിയിലേക്കു മാറ്റി. രാജാക്കാട് പോലീസ് മേല്‍ നടപടികള്‍ സ്വീകരിച്ചു. ഭാര്യ: ജിനു. ഒന്നരമാസം പ്രായമുള്ള കുഞ്ഞുണ്ട്.