ഉത്തരകേരളത്തിലെ പല ബൂത്തുകളിലും സി.പി.എം കള്ളവോട്ട് ചെയ്‌തെന്ന ആരോപണം വിവാദമായതിന് പിന്നാലെ മുസ്ലിംലീഗും കള്ളവോട്ട് ചെയ്യാന്‍ ശ്രമിച്ചെന്നും തടയാന്‍ ശ്രമിച്ച പ്രിസൈഡിംഗ് ഓഫീസറെയും പൊളിംഗ് ഉദ്യോഗസ്ഥരെയും ഭീഷണിപ്പെടുത്തിയെന്നും ആക്ഷേപം. ഇത് സംബന്ധിച്ച വീഡിയോ സി.പി.എം പ്രവര്‍ത്തകര്‍ സമൂഹമാധ്യമങ്ങളിലൂടെ പുറത്ത് വിട്ടു. ഉദുമ മണ്ഡലത്തിലെ പള്ളിക്കരയിലെ 126 നമ്പര്‍ ബൂത്തില്‍ കള്ളവോട്ട് തടഞ്ഞ പ്രിസൈഡിങ്ങ് ഓഫീസറെയും, പോളിങ്ങ് ഉദ്യോഗസ്ഥരെയുമാണ് ലീഗിന്റെ നേതാക്കള്‍ ഭീഷണിപ്പെടുത്തിയത്. ഗള്‍ഫിലുള്ള അനിയന്റെ വോട്ട് ചെയ്യാന്‍ ജ്യേഷ്ഠന്‍ വന്നപ്പോഴാണ് പിടിക്കപ്പെട്ടത്. ഇതു പോലെ ആയിരക്കണക്കിന് വോട്ടാണ് കാസര്‍ഗോഡ് ലീഗ് നടത്തിയതെന്ന് ഇടത്പക്ഷം ആരോപിക്കുന്നു.

ഉംറക്ക് പോയവരുടെയും ഗള്‍ഫില്‍ വെക്കേഷന്‍ ടൂര്‍ പോയവരുടെയും ജോലി ചെയ്യുന്നവരുടെയും ഉള്‍പ്പെടെയുള്ള വോട്ടുകള്‍ ഇതു പോലെ കള്ളവോട്ടായി ചെയ്തിട്ടുണ്ട്. ഇതൊക്കെ പുറത്ത് വരുമെന്ന് ഭയന്നതുകൊണ്ടാണ് കാസര്‍കോട്ടെ വ്യവസായിയും ലീഗ് നേതാവുമായ ആളുടെ പണം വാങ്ങി ഓപ്പണ്‍ വോട്ട് കള്ളവോട്ടാക്കി ചില മാധ്യമങ്ങള്‍ പുറത്ത് വിട്ടതെന്ന് ഇടത്പ്രവര്‍ത്തകര്‍ ആരോപിച്ചു. മാധ്യമങ്ങള്‍ ഈ വാര്‍ത്ത നല്‍കിയില്ലെങ്കിലും ലീഗിന്റെ ബൂത്ത് പിടുത്തം നമ്മള്‍ തുറന്നു കാണിക്കുമെന്നും അവര്‍ വ്യക്തമാക്കി. മുസ്്‌ലിം ലീഗ് നേതാവ് സിദ്ദിഖ് പ്രിസൈഡിങ് ഓഫീസറോട് കയര്‍ത്തു സംസാരിക്കുന്ന ദൃശ്യങ്ങളാണ് പുറത്തു വന്നിട്ടുണ്ട്. ഇയാളുടെ 
നേതൃത്വത്തില്‍ നാട്ടിലില്ലാത്തവരുടെ വോട്ടുകള്‍ രേഖപ്പെടുത്തിയെന്നാണ് ആക്ഷേപം. ഇത് സംബന്ധിച്ച് തെരഞ്ഞെടുപ്പ് കമ്മീഷന് പരാതി നല്‍കിയിട്ടുണ്ടോ എന്ന് ഇടത്പക്ഷം വ്യക്തമാക്കിയിട്ടില്ല.

മുസ്്‌ലിംലീഗിനെതിരെ മുമ്പും കള്ളവോട്ട് ആരോപണവും പരാതിയും ഉയര്‍ന്നിട്ടുണ്ട്. ഇത് സംബന്ധിച്ച കേസ് ഹൈക്കോടതി വരെ എത്തിയിരുന്നു. കഴിഞ്ഞ നിയമസഭാ തെരഞ്ഞെടുപ്പില്‍ മഞ്ചേശ്വരം മണ്ഡലത്തില്‍ മുസ്്‌ലിംലീഗ് കള്ളവോട്ട് ചെയ്ത് തന്നെ പരാജയപ്പെടുത്തിയെന്ന് ആരോപിച്ച് ബി ജെ പി സ്ഥാനാര്‍ഥി കെ സുരേന്ദ്രന്‍ കോടതിയെ സമീപിച്ചിരുന്നു. കേവലം 89 വോട്ടിനായിരുന്നു സുരേന്ദ്രന്റെ തോല്‍വി. മരിച്ചുപോയവരുടെയും നാട്ടില്‍ ഇല്ലാത്തവരുടെയും വോട്ട് രേഖപ്പെടുത്തിയാണ് മുസ്ലിം ലീഗ് സ്ഥാനാര്‍ഥി പി ബി അബ്ദുല്‍ റസാഖ് വിജയിച്ചതെന്നായിരുന്നു ആരോപണം. അബ്ദുല്‍ റസാഖിന്റെ നിര്യാണത്തെ തുടര്‍ന്ന് കേസ് തീര്‍പ്പാക്കാക്കാന്‍ കെ. സുരേന്ദ്രന്‍ തയ്യാറായി. അപ്പോഴും കോടതി മുന്‍പാകെ സുരേന്ദ്രന്‍ പറഞ്ഞത് സാക്ഷികളെ ഹാജരാക്കാന്‍ ലീഗും കോണ്‍ഗ്രസ്സും തടസ്സം നില്‍ക്കുന്നെന്നാണ് പറഞ്ഞത്. 

89 വോട്ടുകളുടെ വ്യത്യാസമാണ് സുരേന്ദ്രനും അബ്ദുള്‍ റസാഖും തമ്മിലുണ്ടായിരുന്നത്. 259 പേര് കള്ളവോട്ടു ചെയതെന്നാണ് സുരേന്ദ്രന്റെ പരാതി. അവരുടെ പേര്, പ്രായം, വിലാസം തുടങ്ങിയ എല്ലാ രേഖകളും സുരേന്ദ്രന്‍ കോടതിയില്‍ ഹാജരാക്കിയിരുന്നു. ഇതിന്റെ വിശദ പരിശോധന നടക്കുന്നതിനിടെയാണ് അബ്ദുള്‍ റസാഖ് മരിച്ചത്. എന്നാല്‍ കള്ളവോട്ട് ചെയ്തവര്‍ക്ക് നോട്ടീസ് അയച്ചിട്ടും അവരെ ഹാജരാക്കാന്‍ മുസ്്‌ലിംലീഗ് , കോണ്‍ഗ്രസ് പ്രവര്‍ത്തകര്‍ തയ്യാറായില്ല. കോടതിക്ക് ഇവരെ വിളിച്ച് വരുത്തുന്നതിന് പരിമിതികളുണ്ട്. മാത്രമല്ല കള്ളവോട്ട് ചെയ്‌തെന്ന് തളിഞ്ഞാല്‍ ആയിരം രൂപ പിഴയും ഒരു വര്‍ഷം തടവും മാത്രമേ ലഭിക്കുകയുള്ളൂ.