ഒരു സീറ്റില്‍ ബിജെപി ജയിക്കുമെന്നും രണ്ട് സീറ്റില്‍ ലീഡ് ചെയ്യുമെന്നുമുള്ള എക്‌സിറ്റ് പോള്‍ ഫലങ്ങള്‍ പുറത്തു വന്നതോടെ സി പി എം കോണ്‍ഗ്രസ് നേതാക്കളുടെ രക്ത സമ്മര്‍ദ്ദം കൂടി. തിരുവനന്തപുരത്തെ ബിജെപി സ്ഥാനാര്‍ത്ഥി കുമ്മനം രാജശേഖരന്‍ ജയിക്കുമെന്ന പ്രവചനം കേട്ട് പിണറായി വിജയന്‍ ഉള്‍പ്പെടെയുള്ള നേതാക്കള്‍ ഞെട്ടി.

ബിജെപി ജയിക്കുന്ന സാഹചര്യം ഒരിക്കലും സംഭവിക്കരുതെന്ന് സിപിഎം നേതാക്കള്‍ അണികള്‍ക്ക് നിര്‍ദ്ദേശം നല്‍കിയിരുന്നതാണ്. തിരുവനന്തപുരത്തെ സിപിഐ സ്ഥാനാര്‍ത്ഥി സി. ദിവാകരന് ലഭിക്കേണ്ടിയിരുന്ന വോട്ടുകള്‍ ശശിതരൂരിനാണ് ചെയ്തത്. ഇക്കാര്യം മനസിലാക്കിയാണ് സി.ദിവാകരന്‍ സിപിഎമ്മിനെതിരെ രംഗത്തെത്തിയത്. വി.എസ് അച്ചുതാനന്ദനും തോമസ് ഐസക്കും ചേര്‍ന്ന് സിപിഐ മന്ത്രിമാരുടെ ഫയലുകള്‍ അട്ടിമറിച്ചെന്ന ദിവാകരന്റെ പ്രസ്താവന മനപൂര്‍വ്വം തന്നെയാണ്. 

പാറശാല, നെയ്യാറ്റിന്‍കര, കോവളം മണ്ഡലങ്ങളില്‍ കുമ്മനത്തെ രണ്ടാം സ്ഥാനത്ത് എത്തിക്കാനാണ് ബി ജെ പി ശ്രമിച്ചത്. കഴിഞ്ഞ തവണ 45000 വോട്ടുകളുടെ ലീഡാണ് ശശിതരൂര്‍ നേടിയത്. ഇത്തവണ അങ്ങനെ സംഭവിച്ചാലും മൂന്നാം സ്ഥാനതേക്ക് പോകാതിരിക്കാന്‍ ബി ജെ പി ശ്രമിച്ചു. ഇവിടെ കുമ്മനം രണ്ടാം സ്ഥാനത്ത് എത്തുകയും മറ്റ് സ്ഥലങ്ങളില്‍ ഒന്നാമതെത്തുകയും ചെയ്താല്‍ ജയം ഉറപ്പാണ്. അതേ സമയം കഴക്കൂട്ടത്ത് ദിവാകരന്‍ വ്യക്തമായ ലീഡ് പ്രതീക്ഷിക്കുന്നു. മന്ത്രി കടകംപള്ളിയുടെ നേതൃത്വത്തില്‍ അതിശക്തമായ പ്രവര്‍ത്തനമാണ് ഇവിടെ ഇടതുമുന്നണി കാഴ്ചവച്ചത്. 

പിണറായിയും കോടിയേരിയും ഉമ്മന്‍ ചാണ്ടിയും യോജിച്ചത് ഒരു കാര്യത്തില്‍ മാത്രമാണ്. അത് ബി ജെ പിയുടെ ശോഭ കെടുത്തുക എന്നതായിരുന്നു. ശബരിമല വിഷയം കത്തിച്ച പിണറായിയോട് സി പി എമ്മിലെ പ്രമുഖ നേതാക്കള്‍ക്കെല്ലാം വിരോധമുണ്ട്. പിണറായിയായതു കൊണ്ടു മാത്രമാണ് അസ്വാരസ്യങ്ങളെ അഭിമുഖീകരിക്കാതെ കഴിഞ്ഞു പോകുന്നത്. എന്നാല്‍ ഇലക്ഷന്‍ റിസള്‍റ്റ് പുറത്തു വരുമ്പോള്‍ പിണറായി ഇതു പോലെ തന്നെ തുടരുമോ എന്ന് കണ്ടറിയണം. 

റിസള്‍റ്റ് പുറത്തുവരുമ്പോള്‍ തന്നെ തിരുവനന്തപുരത്ത് മധുര പലഹാരം വിതരണം ചെയ്യാനുള്ള ഒരുക്കത്തിലാണ് ബിജെപി നേതാക്കള്‍. കുമ്മനം ജയിക്കുമെന്ന് തന്നെയാണ് ബി ജെ പിയുടെ പ്രതീക്ഷ. പത്തനംതിട്ടയിലും ഇവര്‍ പ്രതീക്ഷ കൈ വിടുന്നില്ല. ചെറിയ മാര്‍ജിനിലെങ്കിലും കെ. സുരേന്ദ്രന്‍ ജയിക്കുമെന്ന് പാര്‍ട്ടി വിശ്വസിക്കുന്നു. അയ്യപ്പന് വേണ്ടി ജയിലില്‍ കിടന്ന തന്നെ അയ്യപ്പന്‍ കൈവിടില്ലെന്നാണ് സുരേന്ദ്രന്റെ പ്രതീക്ഷ. തൃശൂരില്‍ സുരേഷ് ഗോപി ജയിക്കുമെന്ന് തീര്‍ത്തു പ്രതീക്ഷിക്കുന്നില്ലെങ്കിലും വോട്ട് ശതമാനത്തില്‍ ഗണ്യമായ വര്‍ധനവ് കൊണ്ടുവരാന്‍ സുരേഷിന് കഴിഞ്ഞതായി പാര്‍ട്ടി വിശ്വസിക്കുന്നു. 

ശശിതരൂര്‍ ജയിച്ചില്ലെങ്കിലും കോണ്‍ഗ്രസിന് വേദനയില്ല. കാരണം കേരളത്തില്‍ സീറ്റുകള്‍ തൂത്തുവാരാമെന്നു കോണ്‍ഗ്രസ് കരുതുന്നു. തരൂര്‍ തോറ്റാല്‍ അതിനെ കോണ്‍ഗ്രസ് നേരിടുന്നത് കേരളത്തിലെ തെളിവാര്‍ന്ന വിജയം ചൂണ്ടി കാണിച്ച് കൊണ്ടായിരിക്കും. 

ഒരര്‍ത്ഥത്തില്‍ ബിജെപി പിണറായിയോടും സുപ്രീം കോടതി മുന്‍ ചീഫ് ജസ്റ്റിസ് ദീപക് മിശ്രയോടും കടപ്പെട്ടിരിക്കുന്നു. ശബരിമല ഉണ്ടായിരുന്നില്ലെങ്കില്‍ ബിജെപി ഉണ്ടാകുമായിരുന്നില്ല. ഏതായാലും നേതൃത്വത്തില്‍ യോജിപ്പില്ലെങ്കിലും ബിജെപി നൂറുമേനി കൊയ്തു. എന്നാല്‍ അടിസ്ഥാന രഹിതമായ ആരോപണങ്ങള്‍ ഉന്നയിച്ച് ബിജെപിയെ തളര്‍ത്താനുള്ള ശ്രമങ്ങളും സജീവമാണ്. ഏതായാലും ബിജെപി ജയിച്ചാല്‍ ആത്മഹത്യ ചെയ്യുന്നവര്‍ ആരൊക്കെയാണെന്ന് കാത്തിരുന്ന് കാണാം.