കേരളത്തില്‍ മഹാപ്രളയത്തിന് സമാനമായ അവസരമല്ല ഇതെന്നും അന്ന് 25 ശതമാനം മഴയാണ് ഈ സമയത്ത് പെയ്തത്. എന്നാല്‍, ഇപ്പോള്‍ സംസ്ഥാനത്ത് 14 ശതമാനം മഴമാത്രമാണ് പെയ്തത് എന്നും അതിനാല്‍ മഹാപ്രളയമുണ്ടാകുവാന്‍ സാധ്യതയില്ലെന്നും അദ്ദേഹം പറയുന്നു. ഇന്ന് കേരളത്തില്‍ മഴയുടെ ശക്തി കുറയുമെന്ന് മാധ്യമറിപ്പോര്‍ട്ട്. നിലവില്‍ ശക്തമായി മഴ പെയ്യുന്ന വടക്കന്‍ കേരളത്തില്‍ ഇന്നും മഴ തുടരുമെങ്കിലും ശക്തമായി പെയ്യില്ലെന്നാണ് റിപ്പോര്‍ട്ടുകളുള്ളത്. അതേസമയം, തെക്കന്‍ കേരളത്തില്‍ ശനിയാഴ്ച മുതല്‍ മഴയുടെ അളവില്‍ ഗണ്യമായ കുറവുണ്ടാകുമെന്നാണ് റിപ്പോര്‍ട്ട്. ഇന്ത്യന്‍ കാലാവസ്ഥാ കേന്ദ്രം മേധാവി ഡോ. എം. മഹാപത്രയെ ഉദ്ധരിച്ചാണ് മാധ്യമറിപ്പോര്‍ട്ട് പുറത്ത് വന്നിരിക്കുന്നത്. ഈ മാസം 12ന് ബംഗാള്‍ ഉള്‍ക്കടലില്‍ വീണ്ടുമൊരു ന്യൂനമര്‍ദ്ദം രൂപപ്പെടുന്നുണ്ടെങ്കിലും ഇത് അതീവ ന്യൂനമര്‍ദ്ദമാകില്ലെന്നും റിപ്പോര്‍ട്ടുണ്ട്. ഒഡീഷ തീരത്ത് രൂപം കൊള്ളുന്ന ന്യൂനമര്‍ദ്ദം പടിഞ്ഞാറന്‍ ദിശയിലേക്ക് പോകുന്നത് പതിവാണ്. അതിനാല്‍ കേരളത്തില്‍ അടക്കം മഴ ലഭിക്കാന്‍ സാധ്യതയുണ്ട്. എന്നാല്‍ ഇത് തീവ്രമാകുവാന്‍ സാധ്യതയില്ലെന്നാണ് ആശ്വാസകരമായ മാധ്യമറിപ്പോര്‍ട്ടുകള്‍ വന്നിരിക്കുന്നത്. അതിന് പുറമെ വടക്കോട്ട് നീങ്ങി ബംഗാളിലാവും മഴയെത്തുക എന്നും സൂചനയുണ്ട്.