കേരളം അതിരൂക്ഷമായ കാല വർഷക്കെടുതി നേരിടുമ്പോള്‍ വ്യാജവാര്‍ത്തകള്‍ പ്രചരിപ്പിച്ച്‌ ജനങ്ങളെ ആശങ്കയിലാഴ്ത്തുന്നവർ കര്‍ശന നടപടികള്‍ നേരിടേണ്ടി വരുമെന്ന് വൈദ്യുതിബോര്‍ഡ് അറിയിച്ചു. അടുത്ത മൂന്നു ദിവസങ്ങളില്‍ കേരളമാകെ വൈദ്യുതി മുടങ്ങും, പെട്രോള്‍ പമ്പുകള്‍ തുറക്കില്ല എന്നീ സന്ദേശങ്ങളാണ് വാട്‌സ് ആപ്പില്‍ വ്യാപകമായി പ്രചരിക്കുന്നത്. എന്നാൽ ഇത്തരത്തില്‍ യാതൊരു അറിയിപ്പും അധികൃതര്‍ ഇത് വരെ അറിയിച്ചിട്ടില്ല. ഇത്തരത്തില്‍ വ്യാജവാര്‍ത്തകള്‍ പ്രചരിപ്പിക്കുന്നത് നാഷണല്‍ ഡിസാസ്റ്റര്‍ മാനേജ്‌മെന്റ് ആക്‌ട്, 2005ലെ സെക്ഷന്‍ 54 പ്രകാരം ഒരു വര്‍ഷം വരെ തടവും പിഴയും ലഭിക്കാവുന്ന കുറ്റകൃത്യമാണ്. കെഎസ്‌ഇബിയാണ് ഈ വിവരം ഫെയ്‌സ്ബുക്ക് പോസ്റ്റിലൂടെ അറിയിച്ചത്.

കെഎസ്‌ഇബിയുടെ ഫെയ്‌സ്ബുക്ക്‌ പോസ്റ്റ് ഇങ്ങനെ;

മഴക്കെടുതികളോടും പ്രളയത്തിനോടും നാം പോരാടിക്കൊണ്ടിരിക്കുമ്പോള്‍ വ്യാജവാര്‍ത്തകള്‍ പ്രചരിപ്പിച്ചു ജനങ്ങളെ ഭീതിയില്‍ ആഴ്ത്തുന്നവര്‍ക്കെതിരെ കര്‍ശന നടപടികള്‍ സ്വീകരിക്കുന്നതാണ്. ഇത്തരത്തില്‍ ഉള്ള വ്യാജവാര്‍ത്തകള്‍ പ്രചരിപ്പിക്കുന്നത് നാഷണല്‍ ഡിസാസ്റ്റര്‍ മാനേജ്‌മെന്റ് ആക്‌ട്, 2005ലെ സെക്ഷന്‍ 54 പ്രകാരം ഒരു വര്‍ഷം വരെ തടവും പിഴയും ലഭിക്കാവുന്ന കുറ്റകൃത്യമാണ്.

അടുത്ത 3 ദിവസങ്ങളില്‍ കേരളമാകെ വൈദ്യുതി മുടങ്ങും എന്നും പെട്രോള്‍ പമ്പുകള്‍ അവധി ആണെന്നും ഒക്കെ വാട്‌സപ്പില്‍ വ്യാപകമായി പ്രചരിക്കുന്നതായി കാണുന്നു. ഇത്തരത്തില്‍ യാതൊരു അറിയിപ്പും അധികൃതര്‍ നല്‍കിയിട്ടില്ല. ദയവായി വെരിഫൈ ചെയ്യാത്ത യാതൊരു വിധ അറിയിപ്പുകളും പ്രചരിപ്പിക്കാതെയിരിക്കുക. ഉപകാരം ചെയ്തില്ലെങ്കിലും ഉപദ്രവിക്കാതെ ഇരിക്കുക.