വനിത ശിശുവികസന വകുപ്പിന്റെ കീഴിലുള്ള വിമന്‍ ആന്റ് ചില്‍ഡ്രന്‍ ഹോമിലെ താമസക്കാരിയും എല്‍.എല്‍.ബി.യില്‍ മികച്ച വിജയം കൈവരിക്കുകയും ചെയ്ത റഹനാസിന്റെ ജീവിതം ആസ്പദമാക്കി നിര്‍മ്മിച്ച 'My Story is your story' (എന്റെ കഥ നിന്റേയും) പ്രിവ്യൂ ലെനിന്‍ സിനിമാസില്‍ നടന്നു. കേവലം 12 വയസുള്ളപ്പോള്‍ സ്വന്തം പിതാവിനാലും 15ാം വയസില്‍ അച്ഛന്റെ സഹായത്തോടെ റിസോര്‍ട്ടില്‍ വച്ച് മറ്റുള്ളവരാലും പീഡിപ്പിക്കപ്പെട്ട ജീവിതത്തില്‍ നിന്നും വനിത ശിശുവികസന വകുപ്പിന്റെ പിന്തുണയോടെയാണ് രഹനാസ് ശക്തമായ തിരിച്ചു വരവ് നടത്തിയത്. രഹനാസും ഉമ്മയും സഹോദങ്ങളും എന്തിന് ജയിലില്‍ കിടക്കുന്ന അച്ഛന്‍ പോലും എല്ലാം തുറന്ന് പറയുന്നു. അച്ഛനെന്നതിന് പകരം അ എന്ന് പറയാന്‍ പോലും അര്‍ഹതയില്ലെന്നാണ് അയാള്‍ പറയുന്നത്. ഏറെ ഹൃദയസ്പര്‍ശിയായ ഒന്നായി മാറി ഈ ഡോക്യുമെന്ററി.

എന്റെ സ്ഥലപ്പേരിലല്ല... എന്റെ പേരില്‍ തന്നെ എനിക്ക് ജീവിക്കണം... എന്റെ കഥ നിന്റെയും ( മൈ സ്റ്റോറി ഈസ് യുവര്‍ സ്‌റ്റോറി) അവസാനിക്കുന്നത് രഹനാസിന്റെ ഈ വാക്കുകളിലാണ്. സ്വന്തം അച്ഛനും മറ്റുള്ളവരും ചേര്‍ന്ന് പിച്ചിച്ചീന്തിയ ജീവിതത്തെ മനക്കരുത്തുകൊണ്ട് അതിജീവിച്ച പെണ്‍കുട്ടിയാണ് രഹനാസ്. 12 വയസ്സുള്ളപ്പോഴാണ് രഹനാസ് സ്വന്തം പിതാവിനാല്‍ ആക്രമിക്കപ്പെടുന്നത്. ബാല്യകാലമത്രയും കൊടിയ പീഡനങ്ങളാണ് ഈ പെണ്‍കുട്ടി അനുഭവിച്ചത്. അവിടെ നിന്ന് സധൈര്യം തിരിച്ചു വന്നു. പഠിച്ച് അഭിഭാഷകയായി. രഹനാസിന്റെ ഈ അതിജീവന കഥയാണ് ലീന മണിമേഖല സംവിധാനം ചെയ്ത എന്റെ കഥ നിന്റെയും( മൈ സ്റ്റോറി ഈസ് യുവര്‍ സ്‌റ്റോറി ) എന്ന ഡോക്യുമെന്ററി.

സംഭവിച്ചതോര്‍ത്ത് തളര്‍ന്നിരിക്കാനും മുഖമില്ലാതെ ഒളിഞ്ഞു ജീവിക്കാനും ഞാന്‍ തയ്യാറല്ലായിരുന്നു. സമാന അനുഭവങ്ങളുള്ള നിരവധി പെണ്‍കുട്ടികള്‍ നമുക്കു ചുറ്റുമുണ്ട്. പലരും മുന്നിലേക്ക് വരാനാവാതെ മറഞ്ഞിരിക്കുകയാണ്. അനുഭവിച്ച വേദനകള്‍ തുറന്ന് പറയുന്നത് മറ്റുള്ളവര്‍ക്ക് പ്രചോദനമാകാനാണ്. നമ്മള്‍ കാരണം ഒരാളെങ്കിലും പോസിറ്റീവായി ചിന്തിക്കുന്നത് ഏറെ സന്തോഷം നല്‍കും. 2008 മുതലുള്ള തന്റെ യാത്രയില്‍ നേരിട്ടും അല്ലാതെയും പിന്തുണ നല്‍കിയ എല്ലാവര്‍ക്കും നന്ദിയെന്ന് രഹനാസ് പറഞ്ഞു. വനിതാ ശിശു വികസന വകുപ്പിന്റെ പിന്തുണയോടെയാണ് രഹനാസ് ശക്തമായ തിരിച്ചു വരവ് നടത്തിയത്. വകുപ്പിന്റെ കീഴിലുള്ള വിമന്‍ ആന്‍ഡ് ചില്‍ഡ്രണ്‍ ഹോമില്‍ നിന്ന് പഠിച്ചു. എല്‍എല്‍ ബി വിജയകരമായി പൂര്‍ത്തിയാക്കിയ രഹനാസ് അഭിഭാഷകയാണ്. സിവില്‍ സര്‍വീസ് നേടുകയെന്നതാണ് അടുത്ത ലക്ഷ്യം.
രഹനാസിന്റെ ശബ്ദത്തില്‍ തന്നെയാണ് ഡോക്യുമെന്ററി മുന്നോട്ടു പോകുന്നത്. ചിലയിടങ്ങളില്‍ വിതുമ്പിപ്പോയെങ്കിലും പതറാത്ത ശബ്ദത്തില്‍ തോറ്റു കൊടുക്കില്ലെന്ന്് അവള്‍ പറയുന്നു. ഉമ്മയും സഹോദരങ്ങളും ശിക്ഷിക്കപ്പെട്ട് ജയിലില്‍ കിടക്കുന്ന അച്ഛന്‍ പോലും എല്ലാം തുറന്നു പറയുന്നുണ്ട് ഡോക്യുമെന്ററിയില്‍.


രഹന സമൂഹത്തിനാകെ മാതൃകയാണെന്ന് ആരോഗ്യ സാമൂഹ്യനീതി വനിത ശിശുവികസന വകുപ്പ് മന്ത്രി കെ.കെ. ശൈലജ ടീച്ചര്‍ പറഞ്ഞു. ആക്രമിക്കപ്പെട്ട ആളുകള്‍ അകത്ത് അടച്ചിരിക്കുകയും അക്രമികള്‍ വെളിയില്‍ ഇഷ്ടാനുസരണം ജീവിക്കുകയും ചെയ്യുന്ന അവസ്ഥയാണ് സമൂഹം സമ്മാനിക്കുന്നത്. എന്നാല്‍ അങ്ങനെയല്ല അതിനെ അതിജീവിക്കുകയാണ് വേണ്ടത്. കൂടുതല്‍ ഉയരങ്ങളിലേക്ക് പോകാനാണ് രഹനാസ് ശ്രമിക്കുന്നത്. വേദനയനുഭവിക്കുന്ന ഒട്ടേറെ മനസുകളുണ്ട്. പതറിപ്പോകുന്ന മക്കള്‍ക്ക് രഹനാസ് ഒരു ആശ്വാസമാകും. ഇത്തരക്കാര്‍ക്ക് ധൈര്യവും ആത്മവിശ്വാസവും ലഭിക്കാന്‍ ഈ ചിത്രത്തിന് കഴിയുമെന്നും മന്ത്രി വ്യക്തമാക്കി.

2008 മുതലുള്ള തന്റെ യാത്രയില്‍ നേരിട്ടും അല്ലാതെയും പിന്തുണ നല്‍കിയ എല്ലാവര്‍ക്കും രഹനാസ് നന്ദി പറഞ്ഞു. താന്‍ അനുഭവിച്ച വേദനകള്‍ തുറന്ന് പറയുന്നത് മറ്റുള്ളവര്‍ക്ക് പ്രചോദനമാകാനാണ്. നമ്മള്‍ കാരണം ഒരാളെങ്കിലും പോസിറ്റിവായി ചിന്തിക്കുന്നത് സന്തോഷമാണെന്ന് രഹനാസ് പറഞ്ഞു.

സാമൂഹ്യനീതി വകുപ്പ് സ്‌പെഷ്യല്‍ സെക്രട്ടറി ബിജു പ്രഭാകര്‍, സാമൂഹ്യനീതി വകുപ്പ് ഡയറക്ടര്‍ ടി.വി. അനുപമ, ബാലാവകാശ കമ്മീഷന്‍ ചെയര്‍മാന്‍ പി. സുരേഷ്, നിര്‍ഭയ സെല്‍ സ്‌റ്റേറ്റ് കോഓര്‍ഡിനേറ്റര്‍ സബീന ബീഗം എസ്., രഹനാസിന്റെ കുടുംബാംഗങ്ങള്‍ എന്നിവര്‍ പ്രിവ്യൂ കാണാനെത്തി.