ആലപ്പുഴ ജില്ലയില്‍ ഇന്ന് പ്രാദേശിക അവധി ....ജില്ലയിലെ സര്‍ക്കാര്‍ ഓഫീസുകള്‍ക്കും വിദ്യാഭ്യാസ സ്ഥാപനങ്ങള്‍ക്കും ഇന്ന് പൊതു അവധിയായിരിക്കുമെന്ന് കളക്ടര്‍ . മണ്ണാറശാല നാഗരാജ ക്ഷേത്രത്തിലെ ആയില്യത്തോടനുബന്ധിച്ചാണ് അവധി നല്‍കിയത്. ഇന്ന് പുലര്‍ച്ചെ 4നു നിര്‍മാല്യ ദര്‍ശനത്തോടെ ചടങ്ങുകള്‍ ആരംഭിച്ചു. 6ന് അഭിഷേകത്തിനു ശേഷം കുടുംബ കാരണവര്‍ എം.കെ. പരമേശ്വരന്‍ നമ്ബൂതിരി ആയില്യം നാളിലെ പൂജകള്‍ ആരംഭിച്ചു. 10നു മഹാപ്രസാദമൂട്ട്. കുടുംബ കാരണവരുടെ കാര്‍മികത്വത്തില്‍ നാഗരാജാവിനും സര്‍പ്പയക്ഷിയമ്മയ്ക്കും തിരുവാഭരണം ചാര്‍ത്തിയുള്ള ആയില്യം നാളിലെ വിശേഷാല്‍ പൂജകള്‍.ഭക്ത സഹസ്രങ്ങളാകും ഇന്ന് നാഗരാജപ്രീതിക്കായി ക്ഷേത്രത്തിലേക്ക് എത്തുക
. മണ്ണാറശ്ശാല വലിയമ്മ നാഗരാജാവിന്റെ തങ്കതിരുമുഖവും നാഗഫണവും കൈയിലേന്തി രാജചിഹ്നങ്ങളായ ഛത്ര-ചാമര- ധ്വജങ്ങളുടെ അകമ്ബടിയില്‍ നടത്താറുള്ള എഴുന്നള്ളത്താണ് ആയില്യം നാളിലെ ഏറ്റവും പ്രധാന ചടങ്ങ്. വലിയമ്മയ്ക്ക് അസൗകര്യമുണ്ടായാല്‍ വലിയമ്മ നടത്താറുള്ള പൂജകളും എഴുന്നള്ളത്തും പകരം മറ്റാരും നടത്തേണ്ടതില്ലെന്നതാണ് മണ്ണാറശാലയിലെ ആചാരം. രണ്ടുവര്‍ഷമായി ഈ ആചാരം പാലിച്ചാണ് ആയില്യം ഉത്സവം നടക്കുന്നത്. കാരണവരുടെ കാര്‍മ്മികത്വത്തില്‍ നാഗരാജാവിനും സര്‍പ്പയക്ഷിക്കും തിരുവാഭരണം ചാര്‍ത്തിയുള്ള ആയില്യം നാളിലെ വിശേഷാല്‍ പൂജ ദര്‍ശനം ഏറെ പ്രധാനമാണ്. ഇതിന് ശേഷം ക്ഷേത്രനടയില്‍ വിവിധ മേള-വാദ്യങ്ങളോടെ സേവ നടക്കും. തുടര്‍ന്ന് ഉച്ചയ്ക്ക് 2.30 മുതല്‍ മണ്ണാറശാലയിലെ പുരാതനമായ നിലവറ ഉള്‍പ്പെടുന്ന ഇല്ലത്തിന്റെ മുറ്റത്തുള്ള സര്‍പ്പം പാട്ടുതറയിലും മേള-വാദ്യസേവ നടത്തും.

ഇന്ന് പ്രാദേശിക അവധിയാണെങ്കിലും പൊതുപരീക്ഷകള്‍ മുന്‍നിശ്ചയിച്ച പ്രകാരം നടക്കും. കെ.എസ്ആര്‍ടിസി ആലപ്പുഴ, പത്തനംതിട്ട, കൊല്ലം ജില്ലകളിലെ പ്രധാന ഡിപ്പോകളില്‍ നിന്നും മണ്ണാറശാലയിലേക്ക് പ്രത്യേക ബസ് സര്‍വീസ് ഏര്‍പ്പെടുത്തിയിട്ടുണ്ട്.