പതിവായി ലോട്ടറി എടുക്കുന്ന കലവൂരിലെ സന്തോഷിന് ഭാഗ്യം കൊണ്ടെത്തിച്ചത് മകന്‍ ബ്ലെസണാണ്. മകന്റെ ഭാഗ്യത്തില്‍ അച്ഛന്‍ വിശ്വസിച്ചപ്പോള്‍ വീട്ടിലെത്തിയതോട 65 ലക്ഷവും. എന്നും ലോട്ടറി എടുക്കാന്‍ പോകുന്ന പിതാവിന് അവസാന മൂന്ന് അക്കം പറഞ്ഞ് കൊടുക്കുന്നത് ബ്ലെസണാണ്. ആ നമ്ബറുകള്‍ നോക്കി സന്തോഷും ലോട്ടറി എടുക്കും. ഈ പതിവ് ഇപ്പോള്‍ സന്തോഷിന് 65 ലക്ഷം രൂപയുടെ ഭാഗ്യം നല്‍കിയിരിക്കുകയാണ്. മത്സ്യത്തൊഴിലാളിയാണ് സന്തോഷ്.

കേരള സംസ്ഥാന ലോട്ടറിയുടെ 536ാമത് വിന്‍വിന്‍ ഭാഗ്യക്കുറിയുടെ നറുക്കെടുപ്പിലൂടെയാണ് ഒന്നാംസമ്മാനമായ അറുപത്തിയഞ്ച് ലക്ഷം രൂപ സന്തോഷിന് ലഭിച്ചത്. ഭാഗ്യപരീക്ഷണത്തിന് മകന്‍ പറഞ്ഞു കൊടുത്ത നമ്പറിനാണ് സന്തോഷിനെ തേടി അറുപത്തിയഞ്ച് ലക്ഷവും സമാശ്വാസസമ്മാനങ്ങളും എത്തിയത്. കൂടാതെ എണ്‍പത്തി എണ്ണായിരം രൂപയും എട്ട് ടിക്കറ്റുകളിലായും കിട്ടി.

കാട്ടൂര്‍ കുന്നേല്‍ സന്തോഷ് മകന്‍ ബ്ലെസണിന്റെ താത്പര്യം കൂടി കണക്കിലെടുത്താണ് മിക്കപ്പോഴും ടിക്കറ്റ് എടുക്കാറുള്ളത്. സി.എസ്.ബാബുവിന്റെ ഉടമസ്ഥതയില്‍ കലവൂര്‍ ബസ് സ്റ്റാന്‍ഡിലുള്ള മനോരമ ഏജന്‍സിയില്‍നിന്ന് ഞായറാഴ്ച പന്ത്രണ്ട് ടിക്കറ്റുകളാണ് സന്തോഷ് എടുത്തത്.

ചെല്ലുന്ന ഏജന്‍സിയില്‍ ഉദ്ദേശിക്കുന്ന നമ്ബര്‍ ഇല്ലെങ്കില്‍ അത് തേടിപ്പിടിച്ച് എടുക്കുകയാണ് പതിവെന്ന് സന്തോഷ് പറഞ്ഞു. പലപ്പോഴും ചെറിയ ചെറിയ സമ്മാനങ്ങള്‍ അടിച്ചിട്ടുണ്ടെങ്കിലും ഒന്നാം സമ്മാനം ആദ്യമായാണ് കുന്നേല്‍ വീട്ടിലേക്കു എത്തുന്നത്. പൊന്തുവള്ളത്തിലാണ് മീന്‍പിടിക്കാന്‍ പോകുന്നത്. ഒരുമാസത്തോളമായി കടല്‍ പ്രക്ഷുബ്ധമായതിനാല്‍ കാര്യമായ പണിയില്ലാതെ ബുദ്ധിമുട്ടുമ്പോഴാണ് ഭാഗ്യദേവത കടാക്ഷിച്ചത്.

വിദ്യാര്‍ഥികളായ അഷ്‌നയും അഞ്ജിതയുമാണ് മറ്റ് രണ്ട് മക്കള്‍. ഭാര്യ റീനയും അച്ഛന്‍ മൈക്കിളും, അമ്മ അന്നമ്മയും അടങ്ങുന്നതാണ് സന്തോഷിന്റെ കുടുംബം. ജീവിതത്തില്‍ ഒരിക്കലെങ്കിലും ഭാഗ്യം പരീക്ഷിക്കാത്തവര്‍ ആരുമില്ല. ആ ഭാഗ്യ പരീക്ഷണത്തിലൂടെ സര്‍ക്കാരിന് കിട്ടുന്നതോ വലിയ വരുമാനമാണ്. ലോട്ടറി വരുമാനത്തില്‍ ഈ സാമ്പത്തിക വര്‍ഷം കേരള സര്‍ക്കാരിന് വന്‍ സാമ്പത്തിക നേട്ടമാണ് ഉണ്ടായത് . കഴിഞ്ഞ സാമ്പത്തിക വര്‍ഷം 10,000 കോടി രൂപയാണ് ലോട്ടറി വില്‍പ്പനയിലൂടെ സര്‍ക്കാര്‍ നേടിയെടുത്ത ആകെ വരുമാനം.

വരുമാനം 10,000 കോടി കവിഞ്ഞാല്‍ അത് നൂറ് വര്‍ഷത്തെ ചരിത്ര നേട്ടമാകും. ക്രിസ്തുമസ് കൂടി വിപണിയിലേക്ക് എത്തുന്നതോടെ വരുമാനത്തില്‍ വരുന്ന മാസം 800 കോടിയുടെ വര്‍ദ്ധനവുണ്ടായേക്കുമെന്നാണ് നിഗമനം.

എന്നാല്‍, കഴിഞ്ഞവര്‍ഷം പ്രളയം ഓണം ബംപറിന്റെ വില്‍പ്പനയില്‍ തിരിച്ചടിയുണ്ടാക്കി. ഓണം ബംപറില്‍ ലോട്ടറി വകുപ്പ് 75 ലക്ഷം ലോട്ടറി വില്‍പ്പന ലക്ഷ്യമിട്ടെങ്കിലും 43 ലക്ഷം ലോട്ടറികള്‍ മാത്രമേ വില്‍ക്കാന്‍ കഴിഞ്ഞൊളളൂ. 2017 ല്‍ 65 ലക്ഷം ഓണം ബംപര്‍ വില്‍പ്പന നടന്ന സ്ഥാനത്താണിത്. നവകേരള നിര്‍മാണത്തിനായി 30 ലക്ഷം ലോട്ടറി അച്ചടിച്ചപ്പോള്‍ 16.1 ലക്ഷം മാത്രമേ വില്‍ക്കാനായൊള്ളു. അച്ചടിക്കുന്ന ലോട്ടറികള്‍ക്കെല്ലാം ജിഎസ്ടി അടയ്ക്കണം എന്ന വ്യവസ്ഥയുളളതിനാല്‍ വില്‍പ്പന നടന്നില്ലെങ്കില്‍ സര്‍ക്കാരിന് വന്‍ നഷ്ടം ഉണ്ടാകും.

അതേസമയം ഈ വരുന്ന ജനുവരി മുതല്‍ ക്യു.ആര്‍. കോഡുള്ള ലോട്ടറി ടിക്കറ്റുകള്‍ എത്തും. ലോട്ടറി ടിക്കറ്റിന്മേല്‍ നടത്തുന്ന തട്ടിപ്പുകള്‍ തടയുന്നതിന്റെ ഭാഗമായാണ് പുതിയ നടപടി. ഇതിനായി നാഷണല്‍ ഇന്‍ഫോമാറ്റിക് സെന്ററിന്റെ നേതൃത്വത്തില്‍ പുതിയ ലോട്ടറി സോഫ്റ്റ്‌വേര്‍ തയ്യാറാക്കല്‍ പൂര്‍ത്തിയായിവരികയാണ്. നിലവില്‍ ബാര്‍ കോഡുള്ള ലോട്ടറി ടിക്കറ്റുകളാണ് വിതരണം ചെയ്യുന്നത്. പക്ഷേ ടിക്കറ്റിന്റെ നമ്പര്‍ മായ്ച്ചും കളര്‍ ഫോട്ടോകോപ്പിയെടുത്തും വന്‍തോതില്‍ തട്ടിപ്പുനടക്കുന്നതായി പരാതിയുയര്‍ന്നിരുന്നു. ഇത് പരിഹരിക്കാനാണ് ലോട്ടിസ് എന്ന പുതിയ സോഫ്റ്റ്‌വേര്‍ വരുന്നത്. നേരത്തേയുള്ള ലോട്ടറി മാനേജ്‌മെന്റ് സിസ്റ്റത്തിന് പകരമാണിത്. ഇതിനൊപ്പം പ്രത്യേക മൊബൈല്‍ ആപ്ലിക്കേഷനും ഉണ്ടാവും. ഏജന്റുമാര്‍ക്ക്് എല്ലാ ടിക്കറ്റും ഈ ആപ്ലിക്കേഷനിലൂടെ പരിശോധിക്കാനും സാധിക്കും.