യു.ഡി.എഫ് സര്ക്കാരിന്റെ കാലത്ത് സ്പീക്കറുടെ ഡയസില് കയറി കസേര മറിച്ചിടാന് നേതൃത്വം നല്കിയ ഇന്നത്തെ സ്പീക്കര് പി. ശ്രീരാമകൃഷ്ണന് നാല് എം.എല്.എമാരെ ശാസിച്ചതിനെതിരെ പ്രതിപക്ഷം രംഗത്ത്
കഴിഞ്ഞ യു.ഡി.എഫ് സര്ക്കാരിന്റെ കാലത്ത് ബാര്ക്കോഴ വിവാദത്തില് അകപ്പെട്ട മന്ത്രി കെ.എം മാണി ബജറ്റ് അവതരിപ്പിച്ചതില് പ്രതിഷേധിച്ച് സ്പീക്കറുടെ ഡയസില് കയറി അദ്ദേഹത്തിന്റെ കസേര മറിച്ചിടാന് നേതൃത്വം നല്കിയ ഇന്നത്തെ സ്പീക്കര് പി. ശ്രീരാമകൃഷ്ണന് നാല് എം.എല്.എമാരെ ശാസിച്ചതിനെതിരെ പ്രതിപക്ഷം രംഗത്ത്. കേരളാ യൂണിവേഴ്സിറ്റി മാര്ക്ക് ക്രമക്കേടിനെതിരെ കെ.എസ്.യു നടത്തിയ മാര്ച്ച് ഉദ്ഘാടനം ചെയ്ത് മടങ്ങിയ ഷാഫി പറമ്പില് എം.എല്.എയെ യാതൊരു പ്രകോപനവും കൂടാതെ പൊലീസ് തല്ലിച്ചതച്ചതില് പ്രതിഷേധിച്ച് ഇന്നലെ സ്പീക്കറുടെ ഡയസില് കയറി മുദ്രാവാക്യം വിളിച്ച റോജി എം. ജോണ്, എല്ദോസ് പി. കുന്നപ്പിള്ളില്, ഐ.സി. ബാലകൃഷ്ണന്, അന്വര് സാദത്ത് എന്നീ എം.എല്.എമാരെയാണ് സ്പീക്കര് പി.ശ്രീരാമകൃഷ്ണന് ഇന്ന് ശാസിച്ചത്.
ഇന്നലെ ചട്ടം 50 പ്രകാരം ലഭിച്ച നോട്ടീസിനുള്ള പരിഗണന പൂര്ത്തിയായതിനുശേഷം സഭായില് ചില അനിഷ്ട സംഭവങ്ങള് ഉണ്ടാവുകയും തുടര്ന്ന് സഭാ നടപടികള് തടസ്സപ്പെടുകയും ചെയ്തു. പ്രതിപക്ഷനേതാവ് വാക്കൗട്ട് പ്രസംഗം പൂര്ത്തീകരിക്കുന്നതിനു മുമ്പു പ്രതിപക്ഷ കക്ഷിയില്പ്പെട്ട ഏതാനും അംഗങ്ങള് ചെയറിനെതിരെ മുദ്രാവാക്യം വിളിച്ചുകൊണ്ട് സഭയുടെ വെല്ലിലിറങ്ങുകയും പ്രതിഷേധിക്കുകയും ചെയ്തു. തുടര്ന്ന് റോജി എം. ജോണ്, എല്ദോസ് പി.കുന്നപ്പിള്ളില്, ഐ.സി. ബാലകൃഷ്ണന്, അന്വര് സാദത്ത് എന്നീ അംഗങ്ങള് മുദ്രാവാക്യം വിളിച്ചുകൊണ്ട് ഡയസ്സിലേക്ക് കടന്നുകയറുകയും ചെയറിനു നേരെ പാഞ്ഞടുക്കുകയും ചെയ്തു. തുടര്ന്ന് സഭാനടപടികള് തടസ്സപ്പെടുകയും സമ്മേളനം താല്കാലികമായി നിര്ത്തിവയ്ക്കേണ്ടി വരികയും ചെയ്തു.
ജനാഭിലാഷം പ്രതിഫലിക്കുന്നതും ആരോഗ്യകരമായ ചര്ച്ചകള് നടക്കേണ്ടതുമായ ജനപ്രതിനിധി സഭകളില് സംവാദങ്ങളൊടൊപ്പം പ്രതിഷേധങ്ങളും ഉയര്ന്നു വരുന്നത് സ്വാഭാവികമാണ്. ഒരുപരിധിവരെ അത് സ്വാഗതാര്ഹവുമാണ്. എന്നാല് നമ്മുടെ സഭയുടെ ചട്ടങ്ങളും നടപടിക്രമങ്ങളും കീഴ്വഴക്കങ്ങളും അംഗങ്ങള്ക്കായുള്ള പെരുമാറ്റചട്ടവും ലംഘിക്കപ്പെടുമ്പോള് അതിനെതിരെ നടപടി സ്വീകരിക്കേണ്ടത് ചെയറിന്റെ കര്ത്തവ്യവും ഉത്തരവാദിത്വവുമാണ്. മുന്കാലങ്ങളിലും സഭയുടെ അന്തസ്സിനു നിരക്കാത്ത നടപടികള് ഉണ്ടായ സാഹചര്യങ്ങളിലൊക്കെ സഭയുടെ കൂട്ടായ തിരിച്ചറിവിന്റെ ഭാഗമായി യുക്തമായ നടപടികള് സ്വീകരിച്ച ഒരു കീഴ്വഴക്കമാണ് നമ്മുടെ സഭയ്ക്കുള്ളത്.
ഈ സാഹചര്യത്തില്, 20.11.2019ന് സഭാ നടപടികളുടെ ഭാഗമായി ഉയര്ന്നുവന്ന പ്രതിഷേധത്തിനിടെ സഭയുടെ ഡയസ്സിലേക്ക് തള്ളിക്കയറുകയും മുദ്രാവാക്യം വിളിക്കുകയും സഭയുടെ ചട്ടങ്ങളും അംഗങ്ങള്ക്കായുള്ള പെരുമാറ്റ ചട്ടങ്ങളും ലംഘിക്കുകയും സഭയുടെ അന്തസ്സിന് ചേരാത്തവിധം പെരുമാറുകയും ചെയ്ത അംഗങ്ങളായ റോജി എം. ജോണ്, എല്ദോസ് പി. കുന്നപ്പിള്ളില്, ഐ.സി. ബാലകൃഷ്ണന്, . അന്വര് സാദത്ത് എന്നിവരെ നിയമസഭാ അംഗങ്ങള്ക്കുള്ള പെരുമാറ്റചട്ടങ്ങളിലെ ചട്ടം 53 പ്രകാരം ചെയറില് നിക്ഷിപ്തമാക്കിയിട്ടുള്ള അധികാരം വിനിയോഗിച്ചുകൊണ്ട് സെന്ഷര് (ശാസന) ചെയ്തതായി സ്പീക്കര് അറിയിച്ചു. നടപടിക്കെതിരെ പ്രതിപക്ഷം ശക്തമായി രംഗത്തെത്തി. മുന് സ്പീക്കറുടെ കസേര മറിച്ചിട്ട ഇപ്പോഴത്തെ സ്പീക്കര് ഇത്തരത്തിലൊരു നടപടിയെടുത്തത് വിരോധാഭാസമാണെന്ന് ചൂണ്ടിക്കാട്ടി, നടപടിക്കെതിരെ പ്രതിപക്ഷ എം.എല്.എമാര് സഭയുടെ മുന്നില് കുത്തിയിരുന്ന് പ്രതിഷേധിക്കുകയും ചെയ്തു.
https://www.facebook.com/Malayalivartha
