സൈനികന് ജോലി സ്ഥലത്തേക്കു മടങ്ങവേ ട്രെയിനില് നിന്നു വീണു മരിച്ചു
ജോലി സ്ഥലത്തേക്കു മടങ്ങുകയായിരുന്ന സൈനികന് എറണാകുളം സൗത്ത് റെയില്വെ സ്റ്റേഷനില് ട്രെയിനില് നിന്നു വീണു മരിച്ചു. കൊല്ലത്ത് ബന്ധുവിന്റെ വിവാഹച്ചടങ്ങില് പങ്കെടുത്തശേഷം ഉത്തരേന്ത്യയിലേക്കുള്ള ട്രെയിന് എന്നു കരുതി തിരുവനന്തപുരത്തേക്കുള്ള രാജധാനി എക്സ്പ്രസില് കയറുന്നതിനിടെ പ്ലാറ്റ്ഫോമിനും പാളത്തിനും ഇടയിലേക്ക് വീണാണ് അപകടമുണ്ടായത്. കൊല്ലം പടിഞ്ഞാറെ കല്ലട കോയിക്കല് പെരുവേലിക്കര കരിങ്ങോട്ട് തെക്കതില് വിഷ്ണു (26) ആണ് മരിച്ചത്.
കരസേനയുടെ റാഞ്ചിയിലെ ഇഎംഇ ( ഇലക്ട്രോണിക്സ് ആന്ഡ് മെക്കാനിക്കല് എന്ജിനീയേഴ്സ്) വിഭാഗത്തില് ജോലി ചെയ്തിരുന്ന വിഷ്ണു അമ്മാവന്റെ മകന്റെ വിവാഹത്തില് പങ്കെടുക്കാനാണ് നാട്ടിലെത്തിയത്. കഴിഞ്ഞ 10-നായിരുന്നു വിവാഹം. പുലര്ച്ചെ ഒന്നരയോടെ എറണാകുളം സൗത്ത് സ്റ്റേഷനിലെ ഒന്നാംനമ്പര് പ്ലാറ്റ്ഫോമിലായിരുന്നു അപകടം.
എറണാകുളത്തു നിന്ന് പ്രതിവാര എക്സ്പ്രസ് ട്രെയിനില് ജോലി സ്ഥലത്തേക്ക് മടങ്ങാന് ബുധനാഴ്ച രാത്രി വഞ്ചിനാട് എക്സ്പ്രസില് എറണാകുളം സൗത്ത് സ്റ്റേഷനിലെത്തിയ വിഷ്ണു പ്ലാറ്റ്ഫോമിലിരുന്നു ഉറങ്ങിപ്പോയി. ഈ സമയം ഒന്നാം നമ്പര് പ്ലാറ്റ്ഫോമില് എത്തിയ നിസാമുദ്ദീന്- തിരുവനന്തപുരം രാജധാനി എക്സ്പ്രസ് ട്രെയിന് സ്റ്റേഷന് വിടുന്നതിനിടെ പെട്ടെന്ന് ഉണര്ന്ന വിഷ്ണു പ്രതിവാര എക്സ്പ്രസാണെന്നു തെറ്റിദ്ധരിച്ചു ട്രെയ്നില് ചാടിക്കയറാന് ശ്രമിക്കുന്നതിനിടെ പാളത്തിലേക്ക് വീഴുകയായിരുന്നു.
ആര്പിഎഫും റെയില്വെ പൊലീസും ചേര്ന്നു എറണാകുളം ജനറല് ആശുപത്രിയില് എത്തിച്ചെങ്കിലും രക്ഷിക്കാനായില്ല. രണ്ടരമാസം മുന്പായിരുന്നു വിഷ്ണുവിന്റെ വിവാഹം. ഭാര്യ: ഐശ്വര്യ. പിതാവ്: രഘു. മാതാവ്: വിമല. വിശാഖ് സഹോദരനാണ്. മൃതദേഹം പോസ്റ്റ്മോര്ട്ടത്തിനു ശേഷം ബന്ധുക്കള്ക്ക് കൈമാറി.
https://www.facebook.com/Malayalivartha