ബത്തേരിയില്‍ വിദ്യാര്‍ഥി പാമ്പുകടിയേറ്റ് മരിച്ച സംഭവത്തില്‍ സ്‌കൂളിന് വീഴ്ച പറ്റിയെന്ന് വിദ്യാഭ്യാസമന്ത്രി
സുല്‍ത്താന്‍ബത്തേരിയില്‍ സ്‌കൂളിലെ ക്ലാസ്സ് മുറിയില്‍ നിന്നും പാമ്ബുകടിയേറ്റ് വിദ്യാര്‍ഥി മരിച്ച സംഭവത്തില്‍ സ്‌കൂളിന് വീഴ്ചപറ്റിയെന്ന് വിദ്യാഭ്യാസമന്ത്രി പ്രൊഫസര്‍ സി.രവീന്ദ്രനാഥ്. സംഭവത്തെ കുറിച്ചുള്ള പ്രാഥമിക റിപ്പോര്‍ട്ട് ലഭിച്ചു. ഇതിന്റെ അടിസ്ഥാനത്തിലാണ് ഒരു അധ്യാപകനെ സസ്‌പെന്‍ഡ് ചെയ്തത്.
വിശദമായ അന്വേഷണത്തില്‍ മാത്രമേ ഇക്കാര്യത്തില്‍ കൂടുതല്‍ വ്യക്തത വരൂവെന്നും അദ്ദേഹം വ്യക്തമാക്കി.സര്‍വജന ഹയര്‍സെക്കന്‍ഡറി സ്‌കൂളിലെ ക്ലാസ്മുറികളിലെ കുഴികള്‍ അടക്കാന്‍ നിര്‍ദേശം നല്‍കിയിട്ടുണ്ട്. ചെരിപ്പിടാതെ ക്ലാസ്മുറികളിലിരിക്കണമെന്ന ഒരു നിര്‍ദേശവും നല്‍കിയിട്ടില്ല.
സ്‌കൂള്‍ കെട്ടിടം പുതുക്കിപണിയാന്‍ നേരത്തെ തന്നെ പണം നല്‍കിയിരുന്നുവെന്നും വിദ്യാഭ്യാസ മന്ത്രി വ്യക്തമാക്കി. ബുധനാഴ്ച വൈകീട്ട് നാലോടെയാണ് ബത്തേരി ഗവ. സര്‍വജന സ്‌കൂളിലെ വിദ്യാര്‍ഥിയായ പുത്തന്‍കുന്ന് ചിറ്റൂരിലെ നൊത്തന്‍വീട്ടില്‍ അഡ്വ. അസീസിന്റെയും അഡ്വ. സജ്‌നയുടെയും മകള്‍ ഷഹല ഷെറിന്‍ പാമ്ബുകടിയേറ്റ് മരിച്ചത്.
https://www.facebook.com/Malayalivartha
