ബത്തേരി സർക്കാർ സ്കൂളിൽ അഞ്ചാം ക്ലാസ് വിദ്യാർത്ഥിനി പാമ്പ്കടിയേറ്റ് മരിച്ചതിന് പിന്നാലെ ഇടുക്കി, വയനാട് ജില്ലകളിലെ സർക്കാർ വിദ്യാലയങ്ങളുടെ ദുരവസ്ഥകൾ ഒന്നൊന്നായി പുറത്തു വരുന്നു. സർക്കാർ അഭിമാനിക്കുന്ന സ്മാർട്ട് ക്ലാസ്, സ്മാർട്ട് സ്കൂൾ പദധതികളും ഹൈടെക് വിദ്യാലയ പദ്ധതിയും പിന്നാക്ക ജില്ലകളിൽ എത്തിയിട്ടില്ലെന്ന് നിസംശയം പറയാം.

സർക്കാരിന്റെ അഭിമാന പദ്ധതികൾ എല്ലാം തന്നെ നടപ്പിലാകുന്നത് സംസ്ഥാനത്തെ വികസിത ജില്ലകളിലാണ്. തിരുവനന്തപുരത്തും എറണാകുളത്തും നിരവധി സ്കൂളുകൾ ഹൈടെക്കും സ്മാർട്ടുമായി കഴിഞ്ഞു. പല സർക്കാർ സ്കൂളുകളിലും ഹൈടെക് സംവിധാനങ്ങൾ നിലവിലുണ്ടെങ്കിലും പഠിക്കാൻ കുട്ടികളില്ല. അത്തരം സ്കൂളുകളിൽ സർക്കാർ വീണ്ടും വീണ്ടും കോടികളാണ് മുടക്കുന്നത്. കടുത്ത സാമ്പത്തിക പ്രതിസന്ധി ഉഴലുമ്പോഴും വിദ്യാഭ്യാസ മേഖലയിൽ പണം മുടക്കുന്നതിൽ സർക്കാരിന് യാതൊരു മടിയുമില്ല. വിദ്യാഭ്യാസ മന്ത്രിമാർ നൽകുന്ന പദ്ധതികൾ ധനമന്ത്രി കണ്ണുമടച്ച് പാസാക്കാറാണ് പതിവ്.

ക്ലാസ് മുറിയിലെ സംവിധാനങ്ങൾ വർധിപ്പിച്ചിട്ടും സ്കൂളുകളിലെ ഭൗതിക സൗകര്യങ്ങൾ വർധിപ്പിക്കാൻ സർക്കാർ ശ്രമിച്ചിട്ടില്ല. വിദ്യാഭ്യാസ നിലവാരത്തിന്റെ മികവിൽ മാത്രമാണ് വിദ്യാഭ്യാസമന്ത്രി ശ്രദ്ധിക്കുന്നത്. കെട്ടിടങ്ങൾ കൊണ്ട് സ്കൂളുകൾ നിറയ്ക്കുക എന്നതാണ് സർക്കാരിന്റെ ലക്ഷ്യം. 266 സ്കൂളുകളാണ് വയനാട്ടിൽ ഉള്ളത്. 138339 കുട്ടികളാണ് വയനാട്ടിൽ സ്കൂൾ വിദ്യാഭ്യാസം നടത്തുന്നത്. ആദിവാസികൾ ഏറെയുള്ള ജില്ലയിൽ ആദിവാസികൾക്ക് വിദ്യാഭ്യാസം നൽകാനുള്ള ഒരു സംവിധാനവും വയനാട്ടിലില്ല.

വയനാട് ജില്ലയിലെ ജനപ്രതിനിധികളുടെ പിടിപ്പുകേടാണ് വിദ്യാഭ്യാസ മേഖലയിലെ ഇന്നത്തെ അവസ്ഥക്കുള്ള പ്രധാന കാരണം. ഇതര ജില്ലകളിലെ ജനപ്രതിനിധികൾ തങ്ങളുടെ വിദ്യാലയങ്ങൾക്ക് കോടികൾ കരസ്ഥമാക്കുമ്പോഴാണ് വയനാട്ടിലും ഇടുക്കിയിലും ഇത്തരം ദുരവസ്ഥയുള്ളത്. കിലോമീറ്ററുകൾ നടന്നാൽ മാത്രമേ ഇവിടങ്ങളിൽ ഒരു വിദ്യാഭ്യാസ സ്ഥാപനം കാണാൻ കഴിയുകയുള്ളു അത് ജനവാസം മേഖലയിൽ അല്ലെങ്കിൽ കുട്ടികൾ പഠിക്കാൻ എത്താറില്ല. ആദിവാസി കുട്ടികളെ സ്കൂളിൽ എത്തിക്കുവാനുള്ള സംവിധാനങ്ങൾ വയനാട്ടിലും ഇടുക്കിയിലുമില്ല. വിദ്യാഭ്യാസ വകുപ്പിൽ നിന്നുള്ള ഉദ്യോഗസ്ഥരിൽ നിന്നും ഗുരുതമായ കൃത്യവിലോപമാണ് ഇക്കാര്യത്തിൽ ഉണ്ടായിട്ടുള്ളത്. മലയോര ജില്ലകളിൽ ജോലി ചെയ്യാനെത്തുന്ന സർക്കാർ ഉദ്യോഗസ്ഥരുടെ ആത്മാർത്ഥതാ കുറവ് വ്യക്തമായി കാണാം.

സർക്കാർ സംവിധാനങ്ങൾ പരാജയപ്പെട്ടതിന്റെ ഉദാഹരണമാണ് വയനാട്ടിൽ നടന്നത്. സർക്കാർ സംവിധാനങ്ങൾ എയ്ഡഡ് മേഖലയിൽ ലഭ്യമല്ലാത്തതിനാൽ ഇവിടെയും ദുരവസ്ഥകളാണ് അധികവുമുള്ളത്. അത് വയനാട്ടിലും ഇടുക്കിയിലും മാത്രമല്ല സംസ്ഥാനത്തിന്റെ ഇതര ജില്ലകളിലുമുണ്ട്.