മരുഭൂമിയിലെ ഒട്ടകം, തൊഴുത്തിലെ പശു, കാട്ടിലെ കഴുത ഇവ മൂന്നും കൂടി ഒന്നിച്ച് നിൽക്കുന്നത് അൽപം കൗതുകമുള്ള കാര്യം തന്നെയാണല്ലേ ? സോഷ്യൽ മീഡിയയിൽ ഇപ്പോൾ വൈറലായിക്കൊണ്ടിരിക്കുന്ന ചിത്രവും കൗതമുണർത്തുന്നു. ഒരു ഒട്ടകവും പശുവും കഴുതയും കൂടി നടന്നു പോകുന്ന ചിത്രമാണിപ്പോൾ വൈറലാകുന്നത്. അമേരിക്കയിലെ കൻസാസിൽ നിന്നായിരുന്നു ഈ ഫോട്ടോ സോഷ്യൽ മീഡിയയിൽ പങ്ക് വച്ചിരിക്കുന്നത്. എങ്ങനെ ഇവർ മൂന്നുപേരും ഒന്നിച്ചായി എന്ന ചോദ്യം ഉയരുകയാണ്. ഗോദ്ദാർദ്ദ് പൊലീസ് ഡിപ്പാർട്ട്മെന്റിന്റെ ഫേസ്ബുക്ക് പേജിലൂടെയാണ് ഈ ചിത്രം പോസ്റ്റ് ചെയ്യ്തിരിക്കുന്നത്. നിമിഷങ്ങൾക്കകം ചിത്രം സൈബറിടത്തിലും ചർച്ചകൾക്ക് വഴിയൊരുക്കി.

മൃ​ഗങ്ങളുടെ ഉടമയെ തിരിച്ചറിയാൻ സഹായിക്കണമെന്നും പൊലീസ് പോസ്റ്റിനൊപ്പം അഭ്യർത്ഥിച്ചു. പിന്നീട് ഇവർ മൂന്നുപ്പേരും തങ്ങളുടെ ഉടമയുടെ അടുത്ത് എത്തിച്ചേർന്നതായി അറിയാൻ കഴി‍ഞ്ഞു. ആയിരത്തിലധികം പേർ ഈ ഫോട്ടോ ഷെയർ ചെയ്തു കഴിഞ്ഞു. ക്രിസ്മസ് അടുത്തതോടെ തിരുപ്പിറവി അന്വേഷിച്ച് എത്തിയതാണോ എന്ന് രസകരമായ കമന്റുകളും ഫോട്ടോയ്ക്ക് വന്നിട്ടുണ്ട്. അടച്ചിട്ട സ്ഥലത്ത് നിന്ന് രക്ഷപ്പെട്ട് തുറന്ന റോഡിലൂടെ ഇവർ നടന്നുപോയതാണെന്നും തൊട്ടടുത്ത് തന്നെയാണ് അവരുടെ ഉടമ താമസിച്ചിരുന്നതെന്നും പൊലീസ് പറഞ്ഞു.