കൊച്ചിയല് യുവനടിയെ തട്ടിക്കൊണ്ട് പോയി പീഡിപ്പിച്ച സംഭവത്തില് ഗൂഢാലോചന നടത്തിയ കേസിന്റെ വിചാരണയ്ക്ക് തുരങ്കം വയ്ക്കാന് നടന് ദിലീപും സംഘവും കളി തുടങ്ങി
കൊച്ചിയല് യുവനടിയെ തട്ടിക്കൊണ്ട് പോയി പീഡിപ്പിച്ച സംഭവത്തില് ഗൂഢാലോചന നടത്തിയ കേസിന്റെ വിചാരണയ്ക്ക് തുരങ്കം വയ്ക്കാന് നടന് ദിലീപും സംഘവും കളി തുടങ്ങി. അഭിഭാഷകനും സാങ്കേതികവിദഗ്ധനും ഒപ്പം ദൃശ്യങ്ങള് കണ്ട ശേഷം അതിന്റെ ആധികാരികതയില് സംശയമുണ്ടെന്നാണ് ദിലീപ് ആക്ഷേപിക്കുന്നത്. ഇതേ തുടര്ന്ന് പ്രതിപട്ടികയില് നിന്ന് ഒഴിവാക്കണമെന്ന് ആവശ്യപ്പെട്ട് ദിലീപ് വിചാരണ കോടതിയില് വിടുതല് ഹര്ജി നല്കി. വരുന്ന ചൊവ്വാഴ്ച ഹര്ജി പരിഗണിക്കും. സാധാരണഗതിയില് കോടതി ഹര്ജി തള്ളാനാണ് സാധ്യതയെന്ന് നിയമവിദഗ്ധര് ചൂണ്ടിക്കാട്ടുന്നു. അങ്ങനെയെങ്കില് ഹൈക്കോടതിയേയും സുപ്രീംകോടതിയേയും സമീപിക്കാം. മുമ്പ് പല ഹര്ജികളുമായി ദിലീപ് വിചാരണ കോടതി മുതല് സുപ്രീംകോടതി വരെ പോയിരുന്നു. വിചാരണ അട്ടിമറിക്കാനുള്ള നീക്കമാണിതെന്ന് സര്ക്കാര് അന്ന് ആരോപിച്ചിരുന്നു.
കേസിലെ പ്രധാന തെളിവായ ദൃശ്യങ്ങള് എഡിറ്റ് ചെയ്താലും ഇല്ലെങ്കിലും ദിലീപിനും മറ്റ് പ്രതികള്ക്കും തിരിച്ചടിയാകുമെന്ന് മുതിര്ന്ന അഭിഭാഷകര് ചൂണ്ടിക്കാണിക്കുന്നു. ദേശീയ ഫോറന്സിക് സയന്സ് ലബോറട്ടറി ഉള്പ്പെടെയുള്ള സ്വതന്ത്ര ഏജന്സികളെ കൊണ്ട് പരിശോധിപ്പിക്കാമെന്ന് സുപ്രീം കോടതി നിര്ദ്ദേശിച്ചിട്ടുണ്ട്. ആ പരിശോധനയില് ദൃശ്യങ്ങള് ആധാകാരികമാണെന്നോ, അല്ലെന്നോ കണ്ടെത്തും. രണ്ടും പ്രതിഭാഗത്തിന് തിരിച്ചടിയാകും. കാരണം നടിയെ ആക്രമിച്ച് പീഡിപ്പിക്കുന്ന ദൃശ്യങ്ങള് പകര്ത്തിയ മെമ്മറി കാര്ഡ് പൊലീസിന് നല്കിയത് ഇരയായ നടിയോ, പ്രോസിക്യൂഷനോ, പൊലീസോ അല്ല. മുഖ്യപ്രതി പള്സര് സുനി എന്ന സുനില്കുമാറിന്റെ അഭിഭാഷകരനാണ്. അതിനാല് എഡിറ്റിംഗ് നടന്നിട്ടുണ്ടെങ്കില് ആര്? എന്തിന്? എവിടെ വെച്ച് നടത്തിയെന്ന് കണ്ടെത്തേണ്ടിവരും. അത് പ്രതികള്ക്ക് കൂടുതല് കരുക്കാകും സൃഷ്ടിക്കുക.
തൊണ്ടിമുതലില് കൃത്രിമം നടന്നിട്ടുണ്ടെങ്കില് അതിന് കാരണക്കാര് ഇരയോ, പ്രോസിക്യൂഷനോ, പൊലീസോ അല്ല. ദൃശ്യങ്ങള് ഹാജരാക്കിയവരാണ് ആധികാരികത സംബന്ധിച്ച് വ്യക്തത വരുത്തേണ്ടത്. ദൃശ്യങ്ങള് എഡിറ്റ് ചെയ്തെന്നും മറ്റ് പല ശബ്ദങ്ങളും അതില് കടന്ന് കൂടിയിട്ടുണ്ടെന്നുമാണ് ദിലീപിന്റെ ആരോപണം. ദിലീപ് , പ്രധാനപ്രതി പള്സര് സുനിയുമായി ഗൂഢാലോചന നടത്തിയിട്ടാണ് നടിയെ ആക്രമിച്ചതെന്നാണ് പ്രോസിക്യൂഷന്റെ വാദം. അങ്ങനെയെങ്കില് ആരായിരിക്കും കൃത്രിമത്വം നടത്താന് ശ്രമിക്കുക? എന്ന ചോദ്യം വിചാരണക്കോടതിയില് ഏറെ ശ്രദ്ധേയമാകും. ദൃശ്യങ്ങള് ചിത്രീകരിച്ച മൊബൈല് ഫോണ് കണ്ടെത്താന് അന്വേഷണസംഘത്തിന് കഴിഞ്ഞിട്ടില്ല. അതിനാല് തെളിവ് നശിപ്പിച്ചതിന് ദൃശ്യങ്ങള് ഹാജരാക്കിയവര്ക്കെതിരെ കേസ് എടുക്കാനാകുമെന്ന് മുതിര്ന്ന അഭിഭാഷകന് അജയകുമാര് ചൂണ്ടിക്കാട്ടുന്നു.
ആറ് മാസത്തിനുള്ളില് വിചാരണ പൂര്ത്തിയാക്കാനാണ് സുപ്രീംകോടതി നിര്ദ്ദേശിച്ചിരിക്കുന്നത്. ചിലപ്പോള് ഒന്നോ രണ്ടോ മാസം മുന്നോട്ട് പോകാനും സാധ്യതയുണ്ട്. വിചാരണ നടപടികളില് നിന്ന് ഒഴിവാക്കണമെന്ന് ആവശ്യപ്പെട്ട് ദിലീപ് നല്കിയ ഹര്ജി എത്രത്തോളം അദ്ദേഹത്തിന് ഗുണം ചെയ്യുമെന്ന് പ്രവചിക്കാനൊക്കില്ല. പത്ത് പ്രതികളില് ആറ് പേരും ദൃശ്യത്തില് എഡിറ്റിംഗ് നടന്നിട്ടുണ്ടെന്നാണ് ആരോപിക്കുന്നത്. ഓരോ ഘട്ടത്തിലും പ്രതികള് വാചാരണ തടസ്സപ്പെടുത്താന് ശ്രമിക്കുന്നത് കോടതിയില് തിരിച്ചടിയാകുമോ എന്നും സംശയമുണ്ട്. അതേസമയം ദൃശ്യങ്ങള് കാണണമെന്നുള്ളത് പ്രതിയുടെ സ്വാഭാവിക നീതിയാണെന്ന് പ്രോസിക്യൂഷനെ അനുകൂലിക്കുന്ന അഭിഭാഷകര് വരെ ചൂണ്ടിക്കാണിക്കുന്നു. അത് കണ്ട ശേഷം വീണ്ടും തടസ്സഹര്ജിയുമായി മുന്നോട്ട് നീങ്ങുന്നതില് പ്രോസിക്യൂഷനും സര്ക്കാരിനും കടുത്ത അതൃപ്തിയുണ്ട്.
https://www.facebook.com/Malayalivartha
