സംസ്ഥാനത്തെ രാഷ്ട്രീയ, സാമൂഹ്യ സാഹചര്യങ്ങള് എല്.ഡി.എഫിലും യു.ഡി.എഫിലും സൃഷ്ടിച്ച തലവേദന പാര്ട്ടികള്ക്കും നേതാക്കള്ക്കും ഊരാക്കുടുക്കായി മാറുന്നു
സംസ്ഥാനത്തെ രാഷ്ട്രീയ, സാമൂഹ്യ സാഹചര്യങ്ങള് എല്.ഡി.എഫിലും യു.ഡി.എഫിലും സൃഷ്ടിച്ച തലവേദന പാര്ട്ടികള്ക്കും നേതാക്കള്ക്കും ഊരാക്കുടുക്കായി മാറുന്നു. ഇടത് മുന്നണിയില് യു.എ.പി.എയും മാവോയിസ്റ്റ് കേസുകളും തര്ക്കത്തിന് വഴിയൊരുക്കിയപ്പോള് യു.ഡി.എഫില് പൗരത്വഭേദഗതി നിയമത്തിനെതിരെ സര്ക്കാരുമായി യോജിച്ച് നടത്തിയ സമരവും നേതാക്കള് തമ്മിലുള്ള അഭിപ്രായ ഭിന്നതയ്ക്ക് വഴിമരുന്നായി. അങ്ങനെ ഇരുമുന്നണികളും രാഷ്ട്രീയ പ്രതിസന്ധിയിലാണ്. എല്.ഡി.എഫില് സി.പി.ഐയാണ് വെടിപൊട്ടിക്കലിന് തുടക്കമിട്ടത്. സി.എ.എ നടപ്പാക്കില്ലെന്ന് പ്രഖ്യാപിച്ച മുഖ്യമന്ത്രി പിണറായി വിജയന് എന്തുകൊണ്ട് യു.എ.പി.എ നടപ്പാക്കില്ലെന്ന് പറയാത്തത്? അദ്ദേഹവും സി.പി.എമ്മും ഇടത്പക്ഷവും ഈ കരിനിയമത്തിനെതിരെ സമരം ചെയ്തതല്ലേ എന്നും കാനം തുറന്നടിച്ചു.
കാനത്തിന് മറുപടി നല്കാന് പിണറായി തയ്യാറായിട്ടില്ല. കോഴിക്കോട് പന്തീരങ്കാവില് മാവോയിസ്റ്റ് ബന്ധം ആരോപിച്ച് പൊലീസ് അറസ്റ്റ് ചെയ്ത സി.പി.എം പ്രവര്ത്തകരായ അലനും താഹയ്ക്കും എതിരെ യു.എ.പി.എ ചുമത്തിയതിന് പുറമേ കേസ് എന്.ഐ.എ ഏറ്റെടുക്കുകയും ചെയ്തു. അത് സര്ക്കാരിന്റെ അറിവില്ലാതെ നടക്കില്ലെന്ന് അരിയാഹാരം കഴിക്കുന്ന എല്ലാവര്ക്കും അറിയാം. കേസ് എന്.ഐ.എ ഏറ്റെടുക്കുന്ന സാഹചര്യത്തിലേക്ക് നയിച്ചത് സര്ക്കാരും പൊലീസും അല്ലേ എന്ന ചോദ്യം സി.പി.എമ്മില് തന്നെ ഉയരുന്നുണ്ട്. ഇത് സംബന്ധിച്ച് പ്രതിപക്ഷ പാര്ട്ടികളും സാമൂഹ്യരാഷ്ട്രീയ പ്രവര്ത്തകരും വിമര്ശനം ഉന്നയിച്ചെങ്കിലും സര്ക്കാരോ , സി.പി.എമ്മോ മറുപടി നല്കിയിട്ടില്ല. ഇക്കാര്യങ്ങളില് പരസ്പരവിരുദ്ധമായ പ്രതികരങ്ങള് നേതാക്കള് നടത്തി വിവാദം ഉണ്ടാക്കേണ്ടെന്ന് പാര്ട്ടി നിര്ദ്ദേശിച്ചിട്ടുണ്ട്.
യു.ഡിഎഫിനെ നയിക്കുന്ന കോണ്ഗ്രസ് നേതാക്കള് തമ്മിലുള്ള അനൈക്യമാണ് പ്രധാന വിഷയം. പൗരത്വഭേദഗതി നിയമത്തിനെതിരെ പ്രതിപക്ഷനേതാവ് രമേശ് ചെന്നിത്തലയും ഉമ്മന്ചാണ്ടിയും മുഖ്യമന്ത്രി പിണറായി വിജയനുമായി കൈകോര്ത്ത് സമരം നടത്തിയത് കെ.പി.സി.സി പ്രസിഡന്റ് വീണുകിട്ടിയ അവസരമായി കാണുന്നു. പിണറായി വിജയനെതിരെ ശക്തമായനിലപാട് എടുക്കുന്ന മുല്ലപ്പള്ളി ഒരിഞ്ച് പോലും പിന്നോട്ട് പോകാന് തയ്യാറായില്ല. സര്ക്കാരുമായി ചേര്ന്ന് സമരം നടത്തിയത് തെറ്റല്ലെന്ന് മുസ്്ലിംലീഗ് നേതൃത്വം വ്യക്തമാക്കിയിട്ടും മുല്ലപ്പള്ളി അയഞ്ഞില്ല. സംയുക്തസമരത്തിനില്ല, താന് പറയുന്നതാണ് കോണ്ഗ്രസ് നയമെന്ന് മുല്ലപ്പള്ളി പരസ്യമായി പ്രതികരിച്ചു. സി.എ.എ സംബന്ധിച്ച് നാളെ നടക്കുന്ന സര്വ്വകക്ഷിയോഗത്തിലും മുല്ലപ്പള്ളി പങ്കെടുക്കില്ലെന്നാണ് സൂചന.
നേതാക്കള് ഇങ്ങിനെ തമ്മിലടിക്കുമ്പോള് കാലങ്ങളായി യു.ഡി.എഫിനൊപ്പം നില്ക്കുന്ന മുസ്്ലിം സംഘടനയായ സമസ്ത അടക്കം മുഖ്യമന്ത്രി പിണറായി വിജയനൊപ്പം അണിനിരക്കുമെന്ന് മുഖപത്രമായ സുപ്രഭാതത്തിലൂടെ വ്യക്തമാക്കി. തങ്ങളോട് ആലോചിക്കാതെ സര്ക്കാരുമായി സമരത്തിന് പോയതിന്റെ കലിപ്പിലാണ് ആര്.എസ്.പിയും മറ്റും. കോണ്ഗ്രസ് നടത്തുന്ന സരങ്ങള്ക്ക് ശക്തിപോരാ എന്ന അഭിപ്രായം മുസ്്ലിംലീഗിലെ ചില നേതാക്കള്ക്കും മുസ്്ലിംസംഘടനകള്ക്കുമുണ്ട്. അത് യു.ഡി.എഫിന് വലിയ തിരിച്ചടിയാണ്. ഇത്തരത്തില് ഇരുമുന്നണികളും പ്രതിസന്ധികളിലൂടെ കടന്ന് പോകുമ്പോള് ബി.ജെ.പിയും അവരുടെ എന്.ഡി.എ മുന്നണിയും എല്ലാ കാര്യത്തിലും സംയമനം പാലിച്ച് മുന്നോട്ട് പോവുകയാണ്. അടുത്തമാസം ബി.ജെ.പി സംസ്ഥാന അധ്യക്ഷനെ കൂടി തെരഞ്ഞെടുത്ത് കഴിയുമ്പോള് കൂടുതല് കരുത്തോടെ പാര്ട്ടിക്കും മുന്നണിക്കും മുന്നോട്ട് പോകാനാകും.
https://www.facebook.com/Malayalivartha
