കടമുറി ഒഴിയുന്നത് സംബന്ധിച്ച തർക്കം ചെന്നെത്തിയത് കൊലപാതകശ്രമത്തിൽ. കടയുടമ വാടകക്കാരൻ നടത്തുന്ന ഹോട്ടലിനു തീവെക്കുകയായിരുന്നു. പത്തോളംപേർ ഹോട്ടലിൽ ഇരുന്നു ഭക്ഷണം കഴിക്കുന്നതിനിടക്കാണ് തീവെപ്പ് നടക്കുന്നത്. ആളുകൾ ഹോട്ടലിനു പുറത്തേക്കു ചിതറിയോടി. . പൊള്ളലേറ്റ വാടകക്കാരൻ കോതനല്ലൂർ പാലത്തടത്തിൽ ദേവസ്യയെയും (60) ആക്രമണം നടത്തിയ കടയുടമ പൊന്നുംമാക്കൽ ബേബിയെയും (70) ആശുപത്രിയിൽ പ്രവേശിപ്പിച്ചു. ഇരുവരും അപകടനില തരണം ചെയ്തതായി ഡോക്ടർ അറിയിച്ചു. ബേബിക്കെതിരെ വധശ്രമത്തിനു പൊലീസ്കേസെടുത്തിരിക്കുകയാണ് . ഇന്നലെ രാവിലെ 9ന് കാണക്കാരിയിലെ അപ്പൂസ് ഹോട്ടലിലായിരുന്നു വധശ്രമം നടന്നത്.

കാണക്കാരിയിൽ ബേബിയുടെ ഉടമസ്ഥതയിലുള്ള കടയിൽ 7 വർഷം മുൻപ് ദേവസ്യ മറ്റൊരു ഹോട്ടൽ നടത്തിയിരുന്നു. വാടകത്തർക്കത്തെത്തുടർന്ന് ഹോട്ടൽ ഒഴിയാൻ ബേബി ദേവസ്യയോട് ആവശ്യപ്പെട്ടു. എന്നാൽ ദേവസ്യ ഇതിനു തയ്യാറായില്ല. താൻ 8 ലക്ഷം രൂപ മുടക്കി ഹോട്ടലിന്റെ നവീകരണം നടത്തിയെന്നും ആ പണം തിരികെ തന്നാൽ മാത്രമേ ഒഴിഞ്ഞു തരൂ എന്നും ദേവസ്യ പറഞ്ഞതായി പോലീസ് പറയുന്നു. ഇതിൽ ബേബി പ്രകോപിതനായിരുന്നു. നാലാഴ്ച മുൻപ് ദേവസ്യ ഈ ഹോട്ടൽ നിർത്തി. എന്നാൽ ഇരുവരും തമ്മിലുള്ള തർക്കം തുടർന്നു.

ഇതിനിടെയാണ് ദേവസ്യ നടത്തുന്ന ബേബിയുടെ ഉടമസ്ഥതയിലുള്ള രണ്ടാമത്തെ ഹോട്ടലിൽ വച്ച് ഇന്നലെ ആക്രമണം ഉണ്ടായത്. കന്നാസിൽ പെട്രോളുമായി എത്തിയ ബേബി കൗണ്ടറിലിരുന്ന മാനേജർ മായയുടെ കൈയിൽ ഒരു കത്തു കൊടുത്ത ശേഷം പെട്രോൾ അകത്തേക്ക് ഒഴിക്കുകയും തീ വെക്കുകയും ചെയ്തു. ദേഹത്ത് തീപടർന്ന ദേവസ്യ ഓടി അടുക്കളയിൽ കയറി. ഏഴു പാചകവാതക സിലിണ്ടറുകളാണ് ഇവിടെ സൂക്ഷിച്ചിരുന്നത്. എന്നാൽ ഭാഗ്യത്തിനു തീ സിലിണ്ടറുകളിലേക്കു പടർന്നില്ല. ഇത് വലിയ അപകടം വിളിച്ചു വരുത്തുന്നതിൽ നിന്നു രക്ഷിച്ചു. ആളിപ്പടർന്ന തീയിൽ നിന്ന് ദേവസ്യയ്ക്കൊപ്പം ബേബിക്കും പൊള്ളലേറ്റിരുന്നു.

10 മിനിറ്റോളം തീ ആളിക്കത്തിയതായി ഹോട്ടൽ ജീവനക്കാർ പറയുന്നു. മായ ഉൾപ്പെടെയുള്ള ആറു ജീവനക്കാർക്കു പരുക്കില്ല. ബേബി ആക്രമണത്തിന് മുൻപ് കൈമാറിയ കത്തു മുഴുവനും കത്തിനശിച്ചു. ഹോട്ടലിലെ ടിവി, ഫ്രിജ്, ഫർണിച്ചർ അടക്കമുള്ള വസ്തുക്കൾ പൂർണമായും അഗ്നിക്കിരയായി. നാട്ടുകാർ വിളിച്ചറിയിച്ചതിനെ തുടർന്ന് അഗ്നിശമന സേന എത്തി തീയണക്കുകയായിരുന്നു. പെട്രോൾ ഒഴിച്ച് ബേബി തന്നെ കൊല്ലാൻ ശ്രമിച്ചതായി ദേവസ്യ പൊലീസിന് മൊഴി നൽകി. എന്നാൽ താൻ ആക്രമണം നടത്തിയില്ലെന്നു ബേബിയും പൊലീസിന് മൊഴി നൽകി.

സംഭവശേഷം മാധ്യമ പ്രവർത്തകർ ഉൾപ്പെടെ സ്ഥലത്തെത്തിയപ്പോൾ അടുക്കളയിൽ ഉപയോഗിച്ചു കൊണ്ടിരുന്ന സിലിണ്ടറിൽനിന്നുള്ള വാതക ചോർച്ച ശ്രദ്ധയിൽപ്പെട്ടു. വിവരങ്ങൾ ശേഖരിക്കാനെത്തിയ അഗ്നിരക്ഷാ സേന ഉദ്യോഗസ്ഥരെ അറിയിച്ചതോടെ ഉടൻ തന്നെ സിലിണ്ടർ സമീപത്തെ പറമ്പിലേക്ക് മാറ്റുകയായിരുന്നു. അതുകൊണ്ടു തന്നെ വലിയൊരു ദുരന്തം ഒഴിവാക്കാൻ സാധിച്ചു.

രാവിലെ ഏകദേശം ഒൻപതിനായിരുന്നു സംഭവം നടക്കുന്നത്. ഹോട്ടൽ ഉടമ ദേവസ്യയും മായയും കൗണ്ടറിന്റെ മുൻവശത്ത് നിൽക്കുകയായിരുന്നു. കുറച്ചു കഴിഞ്ഞപ്പോൾ ബേബി ഒരു വലിയ കന്നാസുമായി കയറി വന്നു. തുടർന്ന് മായയുടെ നേർക്ക് ചില കടലാസുകൾ ബേബി വച്ച് നീട്ടുകയും പൊലീസ് അന്വേഷിച്ചു വരുമ്പോൾ ഈ കടലാസുകൾ അവർക്കു കൊടുത്തേക്കണമെന്നും മായയോട് നിർദേശിച്ചു. തൊട്ടു പിന്നാലെ ബേബി കന്നാസ് തുറന്ന് ദേവസ്യയുടെ ദേഹത്തേക്കും ഹോട്ടലിന്റെയുള്ളിലേക്കും പെട്രോൾ ഒഴിച്ചു. ബേബി ലൈറ്റർ കൊളുത്തിയപ്പോഴാണ് എന്താണ് സംഭവിക്കുന്നതെന്നു ശരിക്കും മനസ്സിലാകുന്നത്.താൻ തടയാൻ ശ്രമിച്ചു. തന്റെ കൈയ്ക്കും പൊള്ളലെറ്റു. ദേഹത്തു തീ ആളിപ്പടർന്നതോടെ ദേവസ്യ ഷർട്ട്ഊരിയെറിഞ്ഞു അടുക്കളയിലേക്കു ഓടുകയായിരുന്നു. അപ്പോഴാണ് ബേബി സ്വയം തീയുടെ ഉള്ളിലേക്കിറങ്ങി നിൽക്കുന്ന കാര്യം ശ്രദ്ധയിൽപെടുന്നത്. കടയിൽ ഭക്ഷണം കഴിച്ചുകൊണ്ടിരുന്നവർ ഉടൻ തന്നെ പുറത്തേക്കിറങ്ങിയോടി. അധികം വൈകാതെ ഫയർഫോഴ്സും സ്ഥലത്തെത്തി. ബേബി തനിക്കു നൽകിയ കടലാസ് അതിനിടെ കൈയിൽ നിന്നു താഴെപ്പോയിഎന്നും അതിലെന്താണ് എഴുതിയിരുന്നതെന്നു തനിക്കറിയില്ല  എന്നും മായ സംഭവം വിവരിച്ചുകൊണ്ട് പറയുന്നു.