മുന്‍ വര്‍ഷങ്ങളില്‍ നിന്നും വ്യത്യസ്തമായി പുതുവത്സരത്തോട് അനുബന്ധിച്ച് കേരളത്തിലെ വന്‍കിട ഹോട്ടലുകളില്‍ നടക്കുന്ന ഡി.ജെ പാര്‍ട്ടികളില്‍ വിദ്യാര്‍ത്ഥികള്‍ പങ്കെടുക്കാന്‍ സാധ്യതയുള്ളതായി എക്‌സൈസ് രഹസ്യാന്വേഷണ വിഭാഗം.

പുതുവര്‍ഷം പിറക്കാന്‍ പോകുന്നതോടെ ലഹരി മരുന്നുകളുടെ സഹായത്തോടെ നടക്കുന്ന ഡിജെ പാര്‍ട്ടികള്‍ക്ക് വന്‍ നഗരങ്ങള്‍ ഉണര്‍ന്നു. പുതുവത്സര രാവില്‍ മാത്രമല്ല ഒരാഴ്ചകൂടി നീണ്ടു നില്‍ക്കുന്ന ഡിജെ പാര്‍ട്ടികളാണ് വന്‍കിട ഹോട്ടലുള്‍ ഒരുക്കിയിരിക്കുന്നത്.

ലഹരി മരുന്നുകളുടെ ഉപയോഗത്തിനെതിരെ കൊച്ചിന്‍ പോലീസ് കമ്മീഷണറേറ്റ് കൊച്ചിയില്‍ നടത്തിയ പരിശോധനയില്‍ അതീവ മാരകമായ 38 എക്സ്റ്റസി പില്‍സും 5 ഗ്രാം MDMA യുമായി രണ്ട് യുവാക്കളെ പോലീസ് പിടികൂടി. ഇത്തരം ഗുളികകളെ ഡോങ്കിയെന്നും, യുവതീയുവാക്കളുടെയും, കമിതാക്കളുടെയും ലഹരിയായതുകൊണ്ട് ഇതിനെ ലവ്പില്‍ എന്നും അറിയപ്പെടുന്നു.

കൊച്ചി, തിരുവനന്തപുരം നഗരങ്ങളിലെ വിദ്യാര്‍ത്ഥികളും ഐ. ടി ഉള്‍പ്പെടെയുള്ള പ്രൊഫഷണലുകളും പാര്‍ട്ടികളില്‍ ഇത്തരം മയക്കുമരുന്ന് ഉപയോഗിക്കുന്നുണ്ടെന്നാണ് വിവരം.

ബാംഗ്ലൂര്‍ വൈറ്റ് സിറ്റി ലേഔട്ടില്‍ അഭയ് രാജ് (25). തൃപ്പൂണിത്തുറ എരൂര്‍ കുരിക്കല്‍ വീട്ടില്‍ നൗഫല്‍ (22) എന്നിവരെയാണ് കൊച്ചി പോലീസ് അറസ്റ്റ് ചെയ്തത്.

ബാംഗ്ലൂരില്‍ സ്ഥിരതാമസമാക്കിയ മലയാളി കുടുംബത്തിലെ അംഗമായ അഭയ് രാജും, തൃപ്പൂണിത്തുറ സ്വദേശി നൗഫലും ഡി.ജെപാര്‍ട്ടിയുടെ കോഡിനേറ്റര്‍മാരാണ്. ഇവര്‍ ബാംഗ്ലൂരിലെ ലഹരി മാഫിയ ബന്ധങ്ങള്‍ ഉപയോഗിച്ച് ലഹരി മരുന്നുകള്‍ ശേഖരിച്ച് കേരളത്തില്‍ ഡി ജെ പാര്‍ട്ടികളിലും മറ്റും വില്‍പ്പന നടത്തി വരികയായിരുന്നു.

കൊച്ചി നഗരത്തിലെ പ്രമുഖ ഹോട്ടലുകള്‍ കേന്ദ്രീകരിച്ച് ഡിജെ പാര്‍ട്ടികള്‍ സംഘടിപ്പിച്ചിരുന്നവരാണ് പിടിയിലായവര്‍. അഭയ് രാജിനെ SCAR FACE എന്നും നൗഫലിനെ ALIE HOOK എന്നീ പേരുകളിലാണ് പാര്‍ട്ടികളില്‍ അറിയപ്പെട്ടിരുന്നത്. പാര്‍ട്ടികള്‍ സംഘടിപ്പിച്ച് വന്‍തോതില്‍ മയക്കുമരുന്ന് വിറ്റഴിക്കകയായിരുന്നു ഇവരുടെ ലക്ഷ്യം.പുതിയ ഉപയോക്താക്കളെ കണ്ടെത്തുന്നതിനുള്ള മാര്‍ഗ്ഗമായിരുന്നുഉഖ പാര്‍ട്ടികള്‍.

ഡിസംബര്‍ 31 ന് നഗരത്തിലെ പ്രമുഖ ഹോട്ടലില്‍ ഇവര്‍ പാര്‍ട്ടി അറേഞ്ച് ചെയ്തിരുന്നു. അതിനായി എത്തിച്ച മയക്കുമരുന്നുകള്‍ സഹിതം പാര്‍ട്ടിക്കുള്ള മുന്നൊരുക്കങ്ങള്‍ക്കിടെയാണ് പിടിയിലായത്.

അതിനിടെ 3 വര്‍ഷത്തിനിടെ 627 മയക്കുമരുന്ന് കേസുകള്‍ സംസ്ഥാനത്തെ സ്‌കൂളുകള്‍ക്ക് സമീപത്ത് നിന്ന് രജിസ്റ്റര്‍ ചെയ്തിട്ടുണ്ടെന്ന് കേരള പോലീസ് ഹൈക്കോടതിയെ അറിയിച്ചു. കേരളത്തിലെ യുവജനങ്ങളില്‍ 31 ശതമാനം മദ്യത്തിനും മയക്കുമരുന്നിനും അടിമയാണെന്നും പോലീസ് ഹൈക്കോടതിയില്‍ എഴുതി നല്‍കിയിട്ടുണ്ട്. 2020 പിറക്കുമ്പോള്‍ കേരളത്തിലെ പുതിയ തലമുറ മയക്കുമരുന്ന് മാഫിയയുടെ കൈയിലാണെന്നതാണ് പുതിയവിവരം. ശക്തമായ ഇടപെടലുകളിലൂടെ മാത്രമേ അവരെ തിരികെ കൊണ്ടുവരാന്‍ സാധിക്കൂ.