ഭൂലോക തട്ടിപ്പ്; പ്രവാസികള്ക്കായി സംസ്ഥാന സര്ക്കാര് തിരുവനന്തപുരത്ത് നടത്തുന്ന ലോക കേരളസഭ ഭൂലോക തട്ടിപ്പ്; പ്രവാസികള്ക്കായി മാമാങ്കം നടത്തുകയല്ല വേണ്ടത്; ആഞ്ഞടിച്ച് കേന്ദ്ര വിദേശകാര്യ സഹമന്ത്രി വി. മുരളീധരന്
പ്രവാസികള്ക്കായി സംസ്ഥാന സര്ക്കാര് തിരുവനന്തപുരത്ത് നടത്തുന്ന ലോക കേരളസഭ ഭൂലോക തട്ടിപ്പാണെന്ന് ആഞ്ഞടിച്ച് കേന്ദ്ര വിദേശകാര്യ സഹമന്ത്രി വി. മുരളീധരന്. ഇന്നും നാളെയുമായി സംസ്ഥാന സര്ക്കാര് തിരുവനന്തപുരത്ത് നടത്തുന്ന ലോക കേരളസഭ ഭൂലോക തട്ടിപ്പാണെന്നും അത് വെറും രാഷ്ട്രീയ പരിപാടിയായി അധഃപതിച്ചെന്നുവെന്നുമാണ് വി. മുരളീധരന്റെ വിമർശനം. സി.പി.എമ്മിന് പണം നല്കുന്നവരെ വിളിച്ചുവരുത്തിക്കൊണ്ട് വിരുന്ന് നല്കുന്ന പരിപാടിയാക്കി സര്ക്കാര് അതിനെ മാറ്റിയെന്നും മുരളീധരന് വിമര്ശിക്കുന്നു . ഒരു സ്വകാര്യ മലയാളം ചാനലുമായുള്ള അഭിമുഖത്തിലാണ് അദ്ദേഹം ഇക്കാര്യങ്ങള് വ്യക്തമാക്കിയത്.
ലോക കേരളസഭയില് പങ്കെടുത്തവരുടെ പശ്ചാത്തലം പോലും ആര്ക്കും അറിയില്ല. കേരള സര്ക്കാരിന്റെ സമീപനം പാര്ലമെന്ററി സംവിധാനത്തെയും ഭരണഘടനയെയും വെല്ലുവിളിക്കുന തരത്തിലുള്ള സമീപനമാണ്. ലോക കേരളസഭയുടെ നടത്തിപ്പ് സംബന്ധിച്ച് കേന്ദ്ര സര്ക്കാരുമായി ഒരു കൂടിയാലോചനകളും സംസ്ഥാന സര്ക്കാര് നടത്തിയിട്ടില്ല. പൗരത്വ നിയമഭേദഗതിക്കെതിരെ പ്രമേയം പാസാക്കിയ ഒരു സര്ക്കാര് ആയതുകൊണ്ടാണ് പരിപാടിയില് പങ്കെടുക്കാതിരുന്നത്. പരിപാടി സംഘടിപ്പിക്കുന്നത് സംഭവിച്ച് തനിക്ക് സംസ്ഥാന സര്ക്കാരില് നിന്നും ഒരു കത്ത് ലഭിച്ചിരുന്നു, സ്പീക്കര് ഫോണ് വിളിക്കുകയും ചെയ്തു. അത്രമാത്രം. കേന്ദ്രമന്ത്രി പറയുന്നു.
കോണ്ഗ്രസിന് പല കാര്യങ്ങളിലും രണ്ട് നയങ്ങളുണ്ട്. ഞങ്ങള്ക്ക് ഒരു നയം മാത്രമേയുള്ളൂ. സംസ്ഥാനങ്ങള്ക്ക് നിയമം നിര്മിക്കാനുള്ള അധികാരമില്ല. അങ്ങനെ നിയമം ഉണ്ടാക്കി കഴിഞ്ഞാല് അതിന് രാഷ്ട്രപതിയുടെയോ ഗവര്ണറുടെയോ അനുവാദം വേണം. പൗരത്വ നിയമഭേദഗതിക്കെതിരെ പ്രമേയം പാസാക്കാനുള്ള അധികാരം കേരള സര്ക്കാരിനുണ്ട്. എന്നാല് പ്രമേയം പാസാക്കുന്നതിനായി 140 എം.എല്.എമാരെ വിളിച്ചുവരുത്തി കേരളത്തിലെ ജനങ്ങളുടെ പണം ധൂര്ത്തടിക്കുന്നത് എങ്ങനെ ന്യായീകരിക്കുന്നു എന്നതാണ് എന്റെ ചോദ്യം എന്നും വി. മുരളീധരന് പറഞ്ഞു.
അതേസമയം യു.ഡി.എഫ് ബഹിഷ്കരിച്ച ലോക കേരള സഭയ്ക്ക് കോണ്ഗ്രസ് നേതാവ് രാഹുല് ഗാന്ധിയുടെ അഭിനന്ദനം. മുഖ്യമന്ത്രി പിണറായി വിജയന് രാഹുല് ഗാന്ധി അഭിനന്ദന കത്തയച്ചു. പ്രവാസികളുടെ ഏറ്റവും വലിയ വേദിയാണ് ലോക കേരളസഭ എന്ന് വിശേഷിപ്പിച്ചു കൊണ്ടുളള രാഹുലിന്റെ കത്ത് മുഖ്യമന്ത്രിയുടെ ഓഫീസ് ട്വിറ്ററില് പങ്കുവെച്ചു. രാഹുലിനു നന്ദി അറിയിച്ചുകൊണ്ട് മുഖ്യമന്ത്രിയുടെ ഓഫീസ് ട്വീറ്റ് ചെയ്തിട്ടുമുണ്ട്.
പ്രവാസി സമൂഹവുമായി ബന്ധപ്പെടാനും അവരെ അംഗീകരിക്കാനുമുള്ള ഏറ്റവും മികച്ച വേദിയാണ് ലോക കേരള സഭയെന്ന് രാഹുലിന്റെ കത്തില് പറയുന്നു. പല രാജ്യങ്ങളിലും രാഷ്ട്ര നിര്മാണ പ്രക്രിയകളില് മലയാളികള് നിര്ണായക പങ്ക് വഹിക്കുന്നതായി അദ്ദേഹം പറഞ്ഞു.
ലോക കേരള സഭ പരിപാടികള് ബഹിഷ്കരിക്കുന്നതായി പ്രതിപക്ഷം നേരത്തേ അറിയിച്ചിരുന്നു. ഉദ്ഘാടന സമ്മേളനത്തില് ഇതിന്റെ ഭാഗമായി ആരും പങ്കെടുത്തിരുന്നില്ല. ആന്തൂരില് കണ്വെന്ഷന് സെന്ററിന് അനുമതി നിഷേധിച്ചതില് മനംനൊന്ത് പ്രവാസി സംരംഭകന് ആത്മഹത്യ ചെയ്ത സംഭവത്തെത്തുടര്ന്ന് ലോക കേരള സഭയില് നിന്നു പ്രതിപക്ഷ നേതാവ് രമേശ് ചെന്നിത്തലയും യു.ഡി.എഫ് എം.എല്.എമാരും നേരത്തേ രാജിവെച്ചിരുന്നു.
ലോക കേരള സഭ ധൂര്ത്ത് ആണെന്നത് ഉള്പ്പെടെയുളള ആക്ഷേപങ്ങള് ഉന്നയിച്ചാണ് പ്രതിപക്ഷം സമ്മേളനത്തില് നിന്ന് വിട്ടുനില്കുന്നത്. പ്രവാസികള്ക്ക് വാഗ്ദാനങ്ങള് വാരിച്ചൊരിയുന്നതല്ലാതെ അവയൊന്നും നടപ്പാക്കാത്ത സര്ക്കാര് നടത്തുന്ന ലോക കേരളസഭ പ്രവാസികളുടെ പേരിലുള്ള പ്രഹസനമാണെന്ന് പ്രതിപക്ഷം ആരോപിച്ചു. ഒന്നാം ലോക കേരള സഭയിലെ തീരുമാനങ്ങളില് ഒരെണ്ണം പോലും നടപ്പാക്കാന് സാധിച്ചിട്ടില്ലെന്നും സഭയ്ക്കായി സെക്രട്ടേറിയറ്റ് രൂപീകരിച്ചതും നിയമസഭയിലെ ശങ്കരനാരായണന് തമ്പി ഹാള് പൊളിച്ച് 16.5 കോടി രൂപ ചെലവാക്കി പുനര്നിര്മിച്ചതുമാണ് ആകെ നടന്ന കാര്യങ്ങളെന്നും ചെന്നിത്തല കുറ്റപ്പെടുത്തിയിരുന്നു. ഇന്നും നാളെയുമായുള്ള സമ്മേളനങ്ങളിലും യു.ഡി.എഫ് അംഗങ്ങള് പങ്കെടുക്കില്ലെന്ന് അറിയിച്ചിരുന്നു. ഈ പശ്ചാത്തലത്തിലാണ് പ്രവാസി മലയാളികള് വിവിധ രാജ്യങ്ങളുടെ വികസനത്തിന് വഹിക്കുന്ന പങ്ക് വ്യക്തമാക്കി കൊണ്ടുളള രാഹുലിന്റെ കത്ത് പുറത്തുവന്നത്.
https://www.facebook.com/Malayalivartha
