കൊല്ലത്ത് ചൂടേറിയ കശുവണ്ടിപ്പോര് കടുക്കുന്നു... വകുപ്പ് ഭരിക്കുന്ന സി.പി.എമ്മും ഫാക്ടറി തൊഴിലാളികള്ക്ക് നേതൃത്വം നല്കുന്ന സി.പി.ഐയും തമ്മിലാണ് അടി, ഇതിനിടയില്പ്പെട്ട് പാവം കശുവണ്ടി വികസനവകുപ്പ് മന്ത്രി ജെ.മേഴ്സിക്കുട്ടി അമ്മ പെട്ടു.
കൊല്ലത്ത് ചൂടേറിയ കശുവണ്ടിപ്പോര് കടുക്കുന്നു... വകുപ്പ് ഭരിക്കുന്ന സി.പി.എമ്മും ഫാക്ടറി തൊഴിലാളികള്ക്ക് നേതൃത്വം നല്കുന്ന സി.പി.ഐയും തമ്മിലാണ് അടി. ഇതിനിടയില്പ്പെട്ട് പാവം കശുവണ്ടി വികസനവകുപ്പ് മന്ത്രി ജെ.മേഴ്സിക്കുട്ടി അമ്മ പെട്ടു. പാര്ട്ടിയുടെ സമ്മര്ദ്ദത്തിന് വഴങ്ങി അവസാനം സി.പി.ഐക്കെതിരെ മന്ത്രി അരയും തലയും മുറിക്കി ഇറങ്ങിയതോടെ അവരുടെ തൊഴിലാളി സംഘടനയായ എ.ഐ.ടി.യു.സി മന്ത്രി വകുപ്പ് ഒഴിഞ്ഞ് പുറത്ത് പോകണമെന്ന ആവശ്യവുമായി രംഗത്തെത്തി. ഭരണകക്ഷിയിലെ പ്രമുഖ പാര്ട്ടി തന്നെ മന്ത്രിയുടെ രാജിക്ക് മുറവിളി കൂട്ടുന്നതോടെ എല്.ഡി.എഫില് പ്രതിസന്ധി രൂക്ഷമായേക്കും. യാതൊരുതരത്തിലുമുള്ള വീട്ടുവീഴ്ച സി.പി.ഐയുമായി വേണ്ടെന്നാണ് സി.പി.എം സംസ്ഥാന കമ്മിറ്റിയും കൊല്ലം ജില്ലാകമ്മിറ്റിയും തീരുമാനിച്ചിരിക്കുന്നത്.
ഗ്രേഡിങ് തൊഴിലാളികളുടെ ജോലിഭാരം കശുവണ്ടി വികസന കോര്പറേഷന് വര്ധിപ്പിച്ചതോടെയാണ് സമരവുമായി എ.ഐ.ടി.യു.സി രംഗത്തെത്തിയത്. എ.ഐ.ടി.യു.സി നേതൃത്വം കശുവണ്ടി തൊഴിലാളി കേന്ദ്ര കൗണ്സിലും ഇതിന് പിന്തുണനല്കി. അവരുടെ പ്രതിനിധിയും കോര്പറേഷന് ഡയറക്ടര് ബോര്ഡിലുണ്ട്. പക്ഷെ, യൂണിയനുമായി ആലോചിക്കാതെ ഏകപക്ഷീയമായി
പരിഷ്കരണം നടപ്പാക്കുകയായിരുന്നെന്ന് സി.ഐ.ടി.യു ചൂണ്ടികാട്ടുന്നു. സമരം നടത്തുന്ന എ.ഐ.ടി.യു.സിയെയും നേതാക്കളെയും മന്ത്രി അപമാനിച്ചത് പൊറുക്കാനാവില്ലെന്നും മാപ്പ് പറയണമെന്നും ചില നേതാക്കള് ആവശ്യപ്പെട്ടു. സി.പി.എം ജില്ലാ നേതൃത്വം ഇടപ്പെട്ട് മന്തന്ത്രിയെ വിലക്കണമെന്നും യൂണിയന്റെയും തൊഴിലാളികളുടെയും വോട്ട് വാങ്ങിയാണ് മന്ത്രി വിജയിച്ചതെന്ന് ഓര്ക്കണമെന്നും അവര് പറയുന്നു.
കഴിഞ്ഞ വര്ഷം ഇതേ പരിഷ്ക്കരണവുമായി മന്ത്രിയും ബോര്ഡിലെ സി.പി.എം പ്രതിനിധികളും എത്തിയിരുന്നു. എ.ഐ.ടി.യു.സി ശക്തമായ പ്രതിഷേധം രേഖപ്പെടുത്തിയതോടെ അന്ന് കശുവണ്ടി വികസമ കോര്പ്പറേഷന് നിലപാടില് നിന്ന് പിന്മാറിയിരുന്നു. എന്നാല് അടുത്തിടെ അതേ കാര്യം പെട്ടെന്ന് നടപ്പാക്കിയതാണ് സി.പി.ഐയേയും എ.ഐ.ടി.യു.സിയേയും ചൊടിപ്പിച്ചത്. കഴിഞ്ഞ തവണ യൂണിയന് വ്യത്യാസമില്ലാതെ തൊഴിലാളികള് എ.ഐ.ടി.യു.സി സമരത്തിന് പിന്തുണയുമായി രംഗത്തെത്തിയത് സി.പി.എമ്മും അവരുടെ യൂണിയനായ സി.ഐ.ടി.യു.വിനും വലിയ നാണക്കേടുണ്ടാക്കിയിരുന്നു. അതിന്റെ പ്രതികാരമായാണ് ഇപ്പോള് പരിഷ്ക്കരണം നടപ്പാക്കിയതെന്നും സി.പി.ഐ ആരോപിക്കുന്നു.
എ.ഐ.ടി.യു.സി മുമ്പ് സമരങ്ങള് നടത്തിയതിന്റെ ഭാഗമായി ചില കശുവണ്ടി ഫാക്ടറികള് പൂട്ടിയിരുന്നു. അതിനാല് ഫാക്ടറി പൂട്ടിക്കാന് നേതൃത്വം നല്കിയവര്ക്കൊപ്പം മറ്റുള്ളവരും ചേര്ന്ന് വീണ്ടും പൂട്ടിക്കലിന് അവസരം ഒരുക്കരുതെന്ന് മന്ത്രി ജെ.മേഴ്സിക്കുട്ടിയമ്മ പ്രതികരിച്ചതാണ് സി.പി.ഐയെ ചൊടിപ്പിച്ചത്. മന്ത്രി മേഴ്സിക്കുട്ടിയമ്മ വകുപ്പ് ഒഴിഞ്ഞ് പോകണമെന്നാണ് ഇപ്പോള് എ.ഐ.ടി.യു.സിയുടെ ആവശ്യം നാളെയത് രാജിയായി മാറിയില് ജില്ലയിലെ എല്.ഡി.എഫില് വലിയ പ്രതിസന്ധിയുണ്ടാകും. കാരണം തദ്ദേശ സ്വയംഭരണ തെരഞ്ഞെടുപ്പ് അടുത്തിരിക്കുകയാണ്. സി.പി.ഐയ്ക്ക് ഏറെ സ്വാധീനമുള്ള മേഖലകള് കൊല്ലത്തുണ്ട്. അതിനാല് പ്രശ്നം എത്രയും വേഗം പരിഹരിച്ച് ഐക്യത്തോടെ മുന്നോട്ട് പോകണമെന്ന് മറ്റ് ചില ഘടകക്ഷികള് ആവശ്യപ്പെട്ടിട്ടുണ്ട്.
https://www.facebook.com/Malayalivartha
