പുതുവര്ഷത്തലേന്ന് യുവാക്കള്ക്ക് നേരെ കുരച്ച നായയുടെ ഉടമസ്ഥന് മര്ദ്ദനം, വീടും വാഹനവും അടിച്ചു തകര്ത്തു!
ആലപ്പുഴയ്ക്കടുത്ത് വള്ളിക്കോട്ട് പുതുവര്ഷം ആഘോഷിക്കാന് പോയ യുവാക്കള്ക്കുനേരെ നായ കുരച്ചതിനെ തുടര്ന്ന്, ഗൃഹനാഥനെ മര്ദിക്കുകയും വീട് അടിച്ചു തകര്ക്കുകയും ചെയ്തു. കൂടാതെ അവിടെ മുറ്റത്ത് പാര്ക്ക് ചെയ്തിരുന്ന അയല്വാസിയുടെ കാറും അടിച്ചു തകര്ത്തു.
അയ്യംകുളത്ത് ഉണ്ണികൃഷ്ണന് നായരുടെ വീടിന് നേര്ക്കാണ് ചൊവ്വാഴ്ച രാത്രി 11 ഓടെയാണ് ആക്രമണം നടന്നത്. ഇദ്ദേഹത്തിന്റെ വീട്ടു മുറ്റത്ത് പാര്ക്ക് ചെയ്തിരുന്ന അയല്വാസി സൗമ്യ ഭവനില് മുരളീധരന്റെ കാറും സംഘം അടിച്ചു തകര്ത്തു.
വീട്ടുകാരെല്ലാം തൊട്ടടുത്ത് നടക്കുന്ന ഗാനമേള കേള്ക്കാന് പോയിരുന്നതിനാല് ഉണ്ണിക്കൃഷ്ണന് നായര് വീട്ടില് ഒറ്റയ്ക്കായിരുന്നു. ഇദ്ദേഹം സിറ്റൗട്ടില് കിടക്കുമ്പോഴാണ് നാലംഗ സംഘം സ്കൂട്ടറില് ആ വഴി പുതുവര്ഷം ആഘോഷിക്കാന് എത്തിയത്. ഇവര്ക്കു നേരെ നായ കുരച്ചപ്പോള് പട്ടിയെ പിടിച്ചു കെട്ടണമെന്ന് പറഞ്ഞ് അസഭ്യം പറഞ്ഞു.അത് തന്റെ നായ അല്ല എന്ന് ഉണ്ണി പറയുകയും ഇരുകൂട്ടരും തമ്മില് വാക്കേറ്റം ഉണ്ടാവുകയും ചെയ്തു.
10 പേരടങ്ങുന്ന യുവാക്കളുടെ സംഘം അരമണിക്കൂറിന് ശേഷം മടങ്ങി എത്തി. ഇവര് തന്നെ മര്ദിക്കുമെന്ന് മനസിലാക്കിയ ഉണ്ണിക്കൃഷ്ണന് വീടിനുള്ളില് കടന്ന് വാതില് അടയ്ക്കാന് ശ്രമിച്ചു. അക്രമി സംഘം വാതില് ചവിട്ടിത്തുറന്ന ശേഷം മര്ദിക്കുകയായിരുന്നുവെന്ന് പറയുന്നു. കൂട്ടത്തിലുണ്ടായിരുന്നവര് ഇതിനിടെ വീട്ടുമുറ്റത്ത് കിടന്ന കാര് അടിച്ചു തകര്ത്തു. അയല്വാസിയായ മുരളീധരന് വീട്ടില് കല്യാണപന്തല് ഇട്ടതിനാല് ഉണ്ണിയുടെ വീട്ടിലേക്ക് മാറ്റിയിട്ടതായിരുന്നു കാര്.
അരമണിക്കൂറോളം അക്രമി സംഘം അഴിഞ്ഞാടി. ഭീഷണി മുഴക്കിയാണ് ഇവര് സ്ഥലം വിട്ടത്. വിവരമറിഞ്ഞ് രണ്ടു തവണ പോലീസ് സ്ഥലത്തു വന്നു. വള്ളിക്കോട്, ഞക്കുനിലം സ്വദേശികളുടെ പേരില് മൊഴിയുടെ അടിസ്ഥാനത്തില് പോലീസ് കേസെടുത്തിട്ടുണ്ട്.
https://www.facebook.com/Malayalivartha
