'സംസ്ഥാനങ്ങളുടെ അവകാശങ്ങളെക്കുറിച്ച് ഗവർണർ ആരിഫ് മുഹമ്മദ് ഖാന് ഭരണഘടന പഠിച്ച് മനസിലാക്കണം'; ഗവർണ്ണർക്കെതിരെ ആഞ്ഞടിച്ച് സീതാറാം യെച്ചൂരി
കേരള ഗവർണ്ണർ ആരിഫ് മുഹമ്മദ് ഖാനെതിരെ ആഞ്ഞടിച്ച് സിപിഐഎം ജനറല് സെക്രട്ടറി സിതാറാം യെച്ചൂരി. പൗരത്വ നിയമഭേദഗതിക്കെതിരെ സുപ്രീം കോടതിയില് സ്യൂട്ട്ഹര്ജി ഫയല് ചെയ്ത സംസ്ഥാന സര്ക്കാരിന്റെ നടപടിയെ വിമർശിച്ച ഗവർണർക്കുള്ള മറുപടി നൽകുകയായിരുന്നു അദ്ദേഹം. "സംസ്ഥാനത്ത് ഗവര്ണറുടെ ഇടപെടലും നിലപാടുകളും ന്യായീകരണമില്ലാത്തതാണ്. സംസ്ഥാനങ്ങളുടെ അവകാശങ്ങളെക്കുറിച്ച് ഗവർണർ ആരിഫ് മുഹമ്മദ് ഖാന് ഭരണഘടന പഠിച്ച് മനസിലാക്കണം. ബ്രിട്ടീഷ് കൊളോണിയലിസത്തിന്റെ ഭാഗമാണ് ഗവർണർ. ഇത് ഗവർണർ പദവി ഇല്ലാതാക്കുന്നതിനെക്കുറിച്ച് ചിന്തിക്കേണ്ട സമയമാണ്". സീതാറാം യെച്ചൂരി പ്രതികരിക്കുന്നു.
സ്വതന്ത്ര ഇന്ത്യയിൽ ഗവർണർ പദവിയുടെ പ്രസക്തി എന്തെന്ന് ചിന്തിക്കണമെന്നും ഇക്കാര്യത്തില് ചർച്ചകൾ ഉയരണമെന്നും അദ്ദേഹം കൂട്ടിച്ചേർത്തു. സംസ്ഥാന സർക്കാരുടെ നിലപാടുകളെ വിമർശിക്കുന്ന ഗവർണ്ണർക്കെതിരെ നിരവധി രൂക്ഷ വിമർശനങ്ങൾ ഉയർന്നു വന്നിരുന്നു. ഗവർണ്ണർ കേന്ദ്രത്തിന്റെ വക്താവാണ് എന്ന വിമർശനങ്ങളാണ് കൂടുതലായും ഉയർന്നു വരുന്നത്.
https://www.facebook.com/Malayalivartha