2021 ൽ കേരളത്തിൽ നടക്കുന്ന നിയമസഭാ തെരഞ്ഞടുപ്പിൽ ആംആദ്മിക്ക് വിജയസൂത്രം ഓതി കൊടുത്ത പ്രശാന്ത് കിഷോർ കേരളത്തിലെത്തുമോ? ഇന്ത്യ ഉറ്റു നോക്കുന്ന മുഖമാണ് പ്രശാന്ത് കിഷോറിന്റേത്. ഭരണത്തുടർച്ച ആഗ്രഹിക്കുന്ന പിണറായിയോട് പ്രശാന്ത് കിഷോറിനെ കേരളത്തിലെത്തിക്കണമെന്ന് സി പി എം ശക്തമായി ആവശ്യപ്പെടുന്നു. പ്രശാന്ത് എന്ന വാക്കിനർത്ഥം വിജയത്തിന്റെ സൂത്രം എന്നാണ്.

രാജ്യത്ത് നടക്കുന്ന തെരഞ്ഞടുപ്പുകളിൽ പ്രശാന്ത് വിജയശിൽപിയായത് നരേന്ദ്ര മോദിയുടെ നേതൃത്വത്തിൽ ബി ജെ പി കേന്ദ്രത്തിൽ അധികാരത്തിലെത്തിയതോടെയാണ്. 2014 ൽ പ്രധാനമന്ത്രി സ്ഥാനാർത്ഥിയായി നരേന്ദ്രമോദിയെ പ്രഖ്യാപിച്ചത് മുതൽ അണിയറയിൽ തന്ത്രങ്ങൾ മെനഞ്ഞത് പ്രശാന്താണ്. ചായ പേ ചർച്ച എന്ന മോദിയുടെ പ്രധാന പദധതിയുടെ ആസൂത്രകനും അദ്ദേഹമായിരുന്നു. ത്രീ ഡി റാലികൾ ആയിരുന്നു ഹിറ്റായ മറ്റൊരു ഐറ്റം. സാമൂഹിക മാധ്യമങ്ങളിലൂടെയുള്ള അതിശക്തമായ പ്രചരണം വഴി നരേന്ദ്ര മോദിക്ക് ഇന്ത്യൻ മണ്ണിൽ ലബ്ദ പ്രതിഷ്ഠ നേടി കൊടുത്തതും പ്രശാന്താണ്. അക്കാലത്ത് സാമൂഹിക മാധ്യമങ്ങളിൽ നിന്ന് ബി ജെ പി അകന്നു നിന്നിരുന്നു. അതേ സമയം സാമൂഹിക മാധ്യങ്ങളാണ് അക്കാലത്ത് ഇന്ത്യൻ രാഷ്ട്രീയത്തിന്റെ ഗതിവിഗതികൾ നിയന്ത്രിച്ചിരുന്നത്. കാലം മാറുന്നത് അനുസരിച്ച് രാഷ്ട്രീയ പാർട്ടികൾ മാറാത്തതാണ് പരാജയത്തിന് കാരണമെന്ന തിരിച്ചറിവിന്റെ പ്രചാരണമാണ് പ്രശാന്ത് കിഷോറിനെ വ്യത്യസ്തനാക്കിയത്.

എത്ര വലിയ പ്രമാണിയായാലും രാഷ്ട്രീയത്തിൽ തന്ത്രങ്ങൾ അറിയില്ലെങ്കിൽ വിജയിക്കാൻ പ്രയാസമാണ്. രാഹുൽ ഗാന്ധിക്ക് സംഭവിച്ചുകൊണ്ടിരാക്കുന്നത് അതാണ്. പഴയ കാല തന്ത്രങ്ങൾ ഇപ്പോൾ അതേപടി വിലപ്പോവില്ല. ഇന്ത്യൻ സംസ്ഥാനങ്ങളിൽ പലയിടത്തും രാഷ്ട്രീയ തന്ത്രങ്ങൾ മെനയുന്നത് പബ്ളിക് റിലേഷൻസ് വിദഗ്ദ്ധൻമാരാണ്. ഇത്തരകാർക്ക് കോടികളാണ് ഫീസായി നൽകേണ്ടി വരുന്നത്.

പ്രശാന്ത് കിഷോർ മാധ്യമ ആസൂത്രണത്തിൽ നിന്നും പിന്നീട് രാഷ്ടീയ രംഗത്തെത്തി. ജെ. ഡി. യുവിലായിരുന്നു രംഗപ്രവേശം. പ്രശാന്തിന്റെ തന്ത്രങ്ങൾ കാരണമാണ് നിതീഷ്കുമാറിന് വിജയ കിരീടം അണിയാൻ കഴിഞ്ഞത്. എന്നാൽ ജെ ഡി യുവിലെ പ്രശാന്തിന്റെ സ്ഥാനം ഭദ്രമായിരുന്നില്ല. പൗരത്വ വിഷയത്തിൽ ബിജെപിയെ വിമർശിച്ചതോടെ അദ്ദേഹം നിതീഷ് കുമാറിൽ നിന്നകന്നു. ജെ. ഡി യുവിൽ നിന്നും പുറത്തായി. ഇക്കൊല്ലം ഒക്ടോബറിൽ ബീഹാറിൽ നടക്കുന്ന തെരഞ്ഞടുപ്പിൽ നിതീഷ് കുമാറിനെ തറ പറ്റിക്കുകയാണ് പ്രശാന്തിന്റെ ലക്ഷ്യം. താൻ കൂടി വിചാരിച്ചതു കൊണ്ട് മാത്രം അധികാരത്തിലെത്തിയ നിതീഷ് കുമാർ തന്നെ നിഷ്കരുണം ചവിട്ടി പുറത്താക്കിയതിൽ പകരം ചോദിക്കുമെന്നാണ് പ്രശാന്ത് പറയുന്നത്. നിയമസഭാ തെരഞ്ഞടുപ്പിൽ താൻ ബീഹാറിൽ ക്യാമ്പ് ചെയ്യുമെന്ന് പ്രശാന്ത് പരസ്യമാക്കിയിട്ടുണ്ട്. ഇത് നിതീഷിന്റെ അവസരങ്ങളെ തീർച്ചയായും ബാധിക്കുമെന്ന കാര്യത്തിൽ സംശയമില്ല.

ഏറ്റെടുത്ത ദൗത്യങ്ങൾ വിജയിപ്പിക്കുക എന്നത് പ്രശാന്തിന്റെ ഭൗർബല്യമാണ്. പാർട്ടികളുടെ ശക്തി പഠിക്കുക എന്നതാണ് പ്രശാന്തിന്റെ ആദ്യപടി. ആന്‌ധ്രയിൽ ജഗ മോഹൻ റെഡ്ഡിക്ക് വലിയ വിജയം കരസ്ഥമാക്കാൻ കഴിഞ്ഞത് പ്രശാന്തിന്റെ സഹായത്തോടെയാണ്. ചന്ദ്രബാബു നായിഡു എന്ന തന്ത്രശാലിയെയാണ് ജഗൻ തോൽപ്പിച്ചത്. അത് ഒരു നിസാര കാര്യമല്ല. നമുക്ക് ജഗൻ വേണം,ജഗൻ ജയിക്കണം എന്ന മുദ്രാവാക്യം പ്രശാന്ത് രൂപകൽപ്പന ചെയ്തതാണ്. ഇത് രണ്ടേകാൽ കോടിയിലേറെ പേർ കണ്ടു. ബൈ ബൈ ബാബു എന്ന മുദ്രാവാക്യവും പ്രശാന്തിന്റെതായിരുന്നു. 15 മാസം നീണ്ടു നിന്ന ജഗന്റെ പ്രജാ സങ്കല്പ യാത്ര ആസൂത്രണം ചെയ്തതും പ്രശാന്താണ്. ബീഹാർ നിയമസഭാ തെരഞ്ഞടുപ്പിൽ ലാലു-നിതീഷ്-കോൺഗ്രസ് കൂട്ടുകെട്ട് വലിയ വിജയം നേടിയതിന് പിന്നിലും പ്രശാന്തിന്റെ കരങ്ങൾ ഉണ്ടായിരുന്നു പഞ്ചാബ് തെരഞ്ഞടുപ്പിൽ അമരീന്ദർ സിംഗിനെ മുഖ്യമന്ത്രിയാക്കിയതിലും പ്രശാന്ത് തിർണായക സ്വാധീനം വഹിച്ചു. ഇന്ത്യൻ പൊളിറ്റിക്കൽ ആക്ഷൻ കമ്മിറ്റി എന്ന സംഘടനയുടെ നേതൃത്വത്തിലാണ് പ്രശാന്ത് പ്രവർത്തനങ്ങൾ തുടരുന്നത്.

പിണറായിക്ക് രാഷ്ട്രീയ കേരളം സാധ്യതകൾ കൽപ്പിക്കുന്നുണ്ട്. കൃത്യമായ ആസൂത്രണമുണ്ടെങ്കിൽ വിജയം അനായാസമാണ്. അതിനാവശ്യമായ പ്രതിഭയാണ് പിണറായിയും സിപിഎമ്മും അന്വേഷിക്കുന്നത്. പ്രശാന്ത് ഉത്തരം പറയുമോ എന്ന് വൈകാതെ അറിയാം.