വീട്ടുമുറ്റത്ത് നിന്നും പന്ത് കാണാതായി; പഴയന്നൂര്‍ സ്റ്റേഷനിലേയ്ക്ക് വിളിച്ച് പന്ത് കാണ്ടുപിടിച്ച് തരണമെന്ന് ആവശ്യപ്പെട്ട് 10 വയസ്സുകാരന്റെ പരാതി
പഴയന്നൂര്‍ സ്റ്റേഷനിലേയ്ക്ക് കാണാതായ പന്ത് കാണ്ടുപിടിച്ച് തരണമെന്ന് ആവശ്യപ്പെട്ട് 10 വയസ്സുകാരന്റെ പരാതി. തിരുവില്വാമല പുനര്‍ജനി ഗാര്‍ഡന്‍സിലെ ക്രൈസ്റ്റ് ന്യൂ ലൈഫ് സ്കൂളില്‍ 5-ാം ക്ലാസ് വിദ്യാര്‍ഥിയാണ് അതുല്‍. വീട്ടുമുറ്റത്ത് നിന്ന് ആരോ മോഷ്ടിച്ച ഫുട്ബോള്‍ കണ്ടെത്തി തരണമെന്നായിരുന്നു അതുലിന്റെ ആവശ്യം.
ആദ്യം പരാതി തമാശയാകുമെന്നാണ് പോലീസ് കരുതിയത്. പിന്നീട് അമ്മയുമായി സംസാരിച്ചതോടെയാണ് കാര്യം സത്യമാണെന്ന് മനസിലായത്. ഏറെ നാളായി അതുലും കൂട്ടരും കളിച്ചു കൊണ്ടിരുന്ന പന്ത് ഈ മാസം ഒന്നിനു മുറ്റത്തു നിന്നു കാണാതായി. വീടിനടുത്തു നടന്ന പന്തുകളി മത്സരത്തിനെത്തിയവരില്‍ ചിലരാണതു കൈക്കലാക്കിയതെന്ന് അതുലിന് സംശയം. തൃശൂരിലെ ഹോട്ടലില്‍ ജീവനക്കാരനായ അച്ഛന്‍ കൊന്നംപ്ലാക്കല്‍ സുധീഷിനോടും അമ്മയോടും പന്ത് കണ്ടെത്തി തരണമെന്ന് അതുല്‍ പറഞ്ഞു. വേറെ പന്തു വാങ്ങിത്തരാമെന്ന മാതാപിതാക്കളുടെ മറുപടിയില്‍ അതുല്‍ തൃപ്തനായില്ല. ഗൂഗിളില്‍ പരതി പൊലീസ് സ്റ്റേഷനിലെ ഫോണ്‍ നമ്പർ തപ്പിയെടുത്തു വിളിക്കുകയായിരുന്നു.
പരാതി കേട്ട പൊലീസും പകരം പന്ത് വാങ്ങിത്തരാമെന്നു പറഞ്ഞ് സമാധാനിപ്പിക്കാന്‍ ശ്രമിച്ചെങ്കിലും അതുല്‍ സമ്മതിച്ചില്ല. അവനു പഴയ പന്തു മതി. പന്തു പോയതുമായി ബന്ധപ്പെട്ട ചില സൂചനകളും നല്‍കി. അവന്റെ നിഷ്കളങ്കതയ്ക്കു മുന്നില്‍ തോറ്റ് പൊലീസ് പന്തിനായി അന്വേഷണം തുടങ്ങി. അയല്‍പക്കത്തെ വീടുകളില്‍ അന്വേഷിച്ചപ്പോള്‍ പന്തുമായി പോയ സംഘം ഒരു വീട്ടില്‍ വെള്ളം കുടിക്കാന്‍ കയറിയതായി വിവരം ലഭിച്ചു. കോടത്തൂരില്‍ ഫുട്ബോള്‍ മത്സരത്തിനെത്തിയ കുട്ടികളാണ് അതെന്നു മനസ്സിലായി. നാട്ടുകാരില്‍ നിന്നു ചില സൂചനകള്‍ കൂടി കിട്ടിയതോടെ പൊലീസ് പന്ത് കണ്ടെത്തി അതുലിനെ തിരിച്ചേല്‍പ്പിച്ചു.
https://www.facebook.com/Malayalivartha
