അടുക്കളയില്‍ പാചകം ചെയ്യുകയായിരുന്ന അമ്മയുടെ ദേഹത്തേക്ക് തീ ആളി പടരുന്നത് കണ്ട് മക്കള്‍ ഓടി വന്ന് കെട്ടിപിടിച്ചു, പാചക വാതക സിലിണ്ടറില്‍ നിന്ന് തീ പടര്‍ന്ന് പൊള്ളലേറ്റ അമ്മ മരിച്ചതിന് പിന്നാലെ ചികിത്സയില്‍ കഴിഞ്ഞിരുന്ന ആറ് വയസുകാരി മകളും മരിച്ചു. ഒക്കല്‍ ആന്റോപുരം പള്ളിക്കരക്കാരന്‍ സെബിയുടേയും നിമ്മി(34)യുടേയും ഇളയ മകള്‍ ദിയയാണ് മരിച്ചത്.

കഴിഞ്ഞ എട്ടിന് നിമ്മി ചികിത്സയില്‍ ഇരിക്കെ മരിച്ചിരുന്നു. മൂത്ത മകള്‍ ഡെല്ല (8) ഗുരുതര പരുക്കുകളോടെ കോയമ്പത്തൂരിലെ ആശുപത്രിയില്‍ ചികി്ത്സയിലാണ്. കഴിഞ്ഞ അഞ്ചിന് രാത്രി 10.30നായിരുന്നു സംഭവം ഉണ്ടായത്. സിവില്‍ പൊലീസ് ഓഫീസറായ സെബി ഡ്യൂട്ടിക്ക് പോയ സമയത്തായിരുന്നു അപകടം. അമ്മയുടെ ദേഹത്ത് തീ പടരുന്നത് കണ്ട് കുട്ടികള്‍ കെട്ടിപ്പിടിക്കുകയായിരുന്നു. മൂന്ന് പേര്‍ക്കും പരുക്കേറ്റെങ്കിലും കുട്ടികളുടെ പരുക്ക് സാരമുള്ളതല്ലെന്നായിരുന്നു നിഗമനം. എന്നാല്‍ പൊള്ളല്‍ ആന്തരികാവയവങ്ങളെ ബാധിച്ചതാണ് മരണ കാരണം. താന്നിപ്പുഴ അനിത വിദ്യാലയത്തിലെ ഒന്നാം ക്ലാസ് വിദ്യാര്‍ത്ഥിനിയാണ് ദിയ.