ആശ്വസിപ്പിച്ച് വി. മുരളീധരന്‍ ... മെഡിക്കല്‍ കോളേജ് ആശുപത്രിയില്‍ ചികിത്സയില്‍ കഴിയുന്ന വാവാ സുരേഷിനെ ആശുപത്രിയില്‍ സന്ദര്‍ശിച്ച് കേന്ദ്രമന്ത്രി വി. മുരളീധരന്‍; ന്യൂദല്‍ഹി എയിംസില്‍ ചികിത്സ ലഭ്യമാക്കാമെന്ന് മുരളീധരന്‍
മലയാളികള്‍ക്ക് ഏറെ ആശ്വാസം തന്ന വാര്‍ത്തയാണ് വാവ സുരേഷ് ജീവിതത്തിലേക്ക് തിരിച്ചു വന്നുവെന്ന വാര്‍ത്ത. അതിനിടെ മെഡിക്കല്‍ കോളേജ് ആശുപത്രിയില്‍ ചികിത്സയിലുള്ള വാവാ സുരേഷിനെ കേന്ദ്ര മന്ത്രി വി. മുരളീധരന്‍ സന്ദര്‍ശിച്ചു. സുരേഷിന്റെ സുഖ വിവരങ്ങള്‍ ചോദിച്ചറിഞ്ഞ കേന്ദ്ര സഹമന്ത്രി അദ്ദേഹത്തെ ചികിത്സിക്കുന്ന ഡോക്ടറ്മാരോടും വിവരങ്ങള്‍ ആരാഞ്ഞു. ആവശ്യമെങ്കില്‍ സുരേഷിന് ന്യൂഡല്‍ഹി എയിംസില്‍ മെച്ചപ്പെട്ട ചികിത്സ ലഭ്യമാക്കാമെന്ന് അദേഹം വ്യക്തമാക്കി. ഇന്നലെ വൈകിട്ടാണ് വാവ സുരേഷിനെ സന്ദര്‍ശിക്കാന്‍ മെഡിക്കല്‍ കോജേളില്‍ എത്തിയത്.
കഴിഞ്ഞ വ്യാഴാഴ്ചയാണ് വാവ സുരേഷിന് ഉഗ്രവിഷമുള്ള അണലി വിഭാഗത്തില്‍പെട്ട പാമ്പിന്റെ കടിയേറ്റത്. പത്താനാപുരത്ത് ഒരു വീട്ടിലെ കിണറ്റിലിറങ്ങി പാമ്പിനെ പിടികൂടുന്നതിനിടെയായിരുന്നു സംഭവം. കിണറ്റില്‍ നിന്നു പാമ്പിനെ പിടികൂടി പുറത്തെത്തിച്ചപ്പോഴാണ് വലതുകൈയിലെ വിരലിന് കടിയേറ്റത്. തിരുവനന്തപുരം മെഡിക്കല്‍ കോളെജിലെത്തിച്ച വാവ സുരേഷ് തീവ്ര പരിചരണ വിഭാഗത്തില്‍ ചികിത്സയിലായിരുന്നു. നേരത്തേ, പലതവണയും സുരേഷിന് പാമ്പിന്റെ കടിയേറ്റിരുന്നു.
അതേസമയം വാവ സുരേഷിന്റെ ആരോഗ്യനില തൃപ്തികരമാണ്. സംസ്ഥാന ആരോഗ്യമന്ത്രി കെ.കെ. ശൈലജ ടീച്ചര്‍ ഇടപെട്ട് വാവ സുരേഷിന്റെ ചികിത്സ സൗജന്യമാക്കിയിരുന്നു.
വാവ സുരേഷിന്റെ ജീവന്‍ രക്ഷിക്കാന്‍ സാധ്യമായതെല്ലാം ചെയ്യുമെന്ന് ബിജെപി നേതാവ് വി.വി രാജേഷും നേരത്തെ വ്യക്തമാക്കിയിരുന്നു. വാവ സുരേഷ് സമൂഹത്തിന്റെ സ്വത്താണെന്നും വിദഗ്ധ ചികിത്സ നല്‍കുന്നതിനെക്കുറിച്ച് കേന്ദ്ര മന്ത്രി വി. മുരളീധരനോട് സംസാരിച്ചതായും രാജേഷ് ഫേയ്‌സ്ബുക്ക് പോസ്റ്റില്‍ പറഞ്ഞു.
സുരേഷിന്റെ ആരോഗ്യസ്ഥിതിയെക്കുറിച്ച് എല്ലാ ദിവസവും അറിയുന്നുണ്ടായിരുന്നെങ്കിലും സോഷ്യല്‍ മീഡിയയില്‍ പ്രചരിക്കുന്ന വാര്‍ത്തകള്‍ കടുത്ത ആശങ്കയുണ്ടാക്കിയതു കാരണം കൂടുതല്‍ ചികിത്സയ്ക്കായി എയിംസ് ഉള്‍പ്പെടെയുള്ള സ്ഥലങ്ങളിലേയ്ക്ക് കൊണ്ടുപോകുന്നതിന്റെ സാധ്യതകള്‍ ആരായാന്‍ കേന്ദ്രമന്ത്രി വി. മുരളീധരനുമായി ബന്ധപ്പെട്ടിരുന്നു. തിരുവനന്തപുരത്തെ ഡോക്ടര്‍മാരുടെ നിര്‍ദ്ദേശാനുസരണം എന്ത് സഹായവും ചെയ്യാമെന്ന് അദ്ദേഹമറിയിച്ചതായും രാജേഷ് ഫേയ്‌സ്ബുക്ക് കുറിപ്പില്‍ വ്യക്തമാക്കി.
എന്നാല്‍, ആര്‍എംഒയോട് സംസാരിച്ചപ്പോള്‍ വാവയുടെ ആരോഗ്യാവസ്ഥയില്‍ പുരോഗതിയുണ്ടെന്നും ഇപ്പോഴത്തെ സാഹചര്യത്തില്‍ ഇവിടെത്തന്നെ തുടര്‍ന്നാല്‍ മതിയെന്നും പറഞ്ഞു. വാവ സമൂഹത്തിന്റെ സ്വത്താണ്, സാധാരണ ജീവിതത്തിലേയ്ക്ക് കൊണ്ടുവരാന്‍ സാധ്യമായതെല്ലാം ചെയ്യുമെന്നും രാജേഷ് ഫേയ്‌സ്ബുക്ക് കുറിപ്പില്‍ പറയുന്നു. ഇതിനെ തുടര്‍ന്നാണ് വി. മുരളീധരന്‍ മെഡിക്കല്‍ കോളേജിലെത്തി വാവ സുരേഷിനെ കണ്ടത്.
അതേസമയം വാവ സുരേഷിന്റെ പാമ്പുപിടുത്ത രീതിയെ അതിരൂക്ഷമായി വിമര്‍ശിച്ച് രംഗത്തെത്തിയിരിക്കുകയാണ് തിരുവനന്തപുരം മെഡിക്കല്‍ കോളജിലെ ഡോ. മനോജ് വെള്ളനാട് രംഗത്തെത്തി. പാമ്പുപിടുത്തത്തിനിടെ അണലിയുടെ കടിയേറ്റ വാവാ സുരേഷിന്റെ ആരോഗ്യനില മെച്ചപ്പെട്ടു വരികയാണ് ഡോക്ടറിന്റെ വിമര്‍ശനം. വാവ സുരേഷ് തന്റെ മണ്ടത്തരങ്ങള്‍ ഇനിയെങ്കിലും തിരിച്ചറിയണമെന്നും ഡോക്ടര്‍ ആവശ്യപ്പെടുന്നു. ഈ വിഷയത്തില്‍ സോഷ്യല്‍ മീഡിയകളില്‍ വാവ സുരേഷിനെ അനുകൂലിച്ചും പ്രതികൂലിച്ചും പ്രതികരണങ്ങള്‍ ഉണ്ടാകാറുണ്ട്.
ഇതിനു മുമ്പും സുരേഷിന് പാമ്പു കടിയേറ്റിട്ടുണ്ട്. എന്നിട്ടും അദ്ദേഹം ശാസ്ത്രീയ രീതിയിലുള്ള പാമ്പു പിടിത്തത്തിനു തയാറാകുന്നില്ല. ഇപ്പോഴത്തെ ആശുപത്രി വാസം കഴിഞ്ഞ് പുറത്തിറങ്ങുമ്പോഴെങ്കിലും വാവ സുരേഷ് തന്റെ മണ്ടത്തരങ്ങള്‍ തിരിച്ചറിയണമെന്നും ഇത്തിരി ബോധമുള്ള ആരെങ്കിലും അദ്ദേഹത്തെ അത് ബോധ്യപ്പെടുത്തണമെന്നും പറയുകയാണ് തിരുവനന്തപുരം മെഡിക്കല്‍ കോളജിലെ ഡോക്ടര്‍.
https://www.facebook.com/Malayalivartha
