തീരുമാനങ്ങളിൽ കൂടിയാലോചനകൾ നടക്കുന്നില്ലെന്ന പരാതി പരസ്യമാക്കിയതിന് പിന്നാലെ, വിഷയം കോൺഗ്രസ് ദേശീയ നേതൃത്വത്തിന് മുന്നിലെത്തിക്കാനായി യുഡിഎഫ് കൺവീനർ അടൂർ പ്രകാശ്.

തിങ്കളാഴ്ച ഡൽഹിയിലെത്തുന്ന അദ്ദേഹം ലോക്സഭാ പ്രതിപക്ഷ നേതാവ് രാഹുൽ ഗാന്ധി, എഐസിസി പ്രസിഡന്റ് മല്ലികാർജുൻ ഖാർഗെ എന്നിവർക്ക് നേരിട്ട് പരാതി നൽകുകയും ചെയ്യും. വിഷയം അടിയന്തരമായി പരിഹരിക്കാനായി ഹൈക്കമാൻഡ് ഇടപെടണമെന്നാണ് അദ്ദേഹത്തിന്റെ ആവശ്യം. സംസ്ഥാന കോൺഗ്രസിലെയും മുന്നണിയിലെയും പ്രധാന തീരുമാനങ്ങളിൽ നിന്ന് തന്നെ ബോധപൂർവം മാറ്റിനിർത്തുന്നു എന്നാണ് അടൂർ പ്രകാശിന്റെ പ്രധാന പരാതിയുള്ളത്.

തിങ്കൾ, ചൊവ്വ ദിവസങ്ങളിൽ കെപിസിസി പ്രസിഡന്റ് സണ്ണി ജോസഫും മുഖ്യമന്ത്രി വിഡി സതീശനും ഡൽഹിയിലുണ്ടാകും. അതിനാൽ ദേശീയ നേതൃത്വത്തിന് സംസ്ഥാന നേതാക്കളുമായി നേരിട്ട് ചർച്ച നടത്താൻ വഴിയൊരുങ്ങുകയും ചെയ്യും.

മുഖ്യമന്ത്രിയെ പിന്തുണയ്ക്കുന്ന വിഭാഗത്തിൽ നിന്ന് വലിയ രീതിയിലുള്ള പ്രതികരണങ്ങളാണ് ഉയരുന്നത്. അതേസമയം, മുതിർന്ന ചില നേതാക്കളുടെ പിന്തുണയോടെ മുഖ്യമന്ത്രിയെ ലക്ഷ്യമിട്ടുള്ള നീക്കമാണിതെന്ന സംശയത്തിലാണ് വിഡി സതീശൻ അനുകൂലികൾ. വിഷയം വച്ചുതാമസിപ്പിക്കാതെ ഹൈക്കമാൻഡ് ഉടൻ ഇടപെട്ട് പരിഹാരം കാണുമെന്നാണ് സൂചന.